ប្រទេសជប៉ុន ៖ ជប៉ុនកាលពីថ្ងៃទី១៩ ធ្នូ បានប្រហារជីវិតដោយព្យួរកអ្នកទោសប្រហារជីវិតពីបទសម្លាប់មនុស្ស២នាក់ ។ នេះជាការប្រកាសរបស់ក្រសួងយុត្តិធម៌ជប៉ុនដែលធ្វើពុំដឹងពុំឮសំណើផ្ទួនៗរបស់បណ្តាអង្គការការពារសិទ្ធិមនុស្សឱ្យប្រទេសនេះបោះបង់ចោលទោសប្រហារជីវិត ។
ការប្រហារជីវិតអ្នកទោសទាំង២នាក់ធ្វើឱ្យចំនួនអ្នកទោសប្រហារជីវិតនៅជប៉ុនត្រូវសម្លាប់ឡើងដល់២១នាក់ ចាប់តាំងពីលោកស៊ីនហ្សូ អាបេ វិលមកកាន់អំណាចជានាយករដ្ឋមន្ត្រីជប៉ុនវិញពីដំណាច់ឆ្នាំ២០១២មក ក្នុងនោះ៤នាក់ត្រូវប្រហារជីវិតនាឆ្នាំ២០១៧នេះ ។
ក្នុងចំណោមអ្នកទោសត្រូវប្រហារជីវិតទាំង២នាក់នាថ្ងៃទី១៩ ធ្នូ ម្នាក់អាយុ៤៤ឆ្នាំ ដែលទទួលការកាត់ទោសប្រហារជីវិតពីបទសម្លាប់មនុស្ស៤នាក់នៅជីបា ភាគអាគ្នេហ៍ជប៉ុនកាលពីឆ្នាំ១៩៩២ ។ អ្នកទោសប្រហារជីវិតម្នាក់ទៀតនាថ្ងៃទី១៩ ធ្នូ ដែរមានអាយុ៦៩ឆ្នាំ ហើយត្រូវកាត់ទោសពីបទសម្លាប់មិត្តស្រីរបស់គេ និងឪពុកម្តាយរបស់នាងកាលពីឆ្នាំ១៩៩៤ ។
ប្រទេសជប៉ុន និងសហរដ្ឋអាមេរិកជាប្រទេស២ក្នុងចំណោមប្រទេសក្រុម G-7 ដែលនៅបន្តអនុវត្តទោសប្រហារជីវិត ៕
ចែករំលែកព័តមាននេះ