អម្ពរ ទេវី គ្រោងចូលរួមសម្តែង២រឿងនៅដើមឆ្នាំនេះ
- ភ្នំពេញ
រាជធានីភ្នំពេញ ៖ អ្នកនាងអម្ពរ ទេវី នឹងចូលរួមសម្តែងក្នុងខ្សែភាពយន្តចំនួន២រឿង នាដើមឆ្នាំ២០១៨ ។ ខ្សែភាពយន្តដែលអ្នកនាងអម្ពរ ទេវី ចូលរួមសម្តែងនោះគឺរឿង…
រាជធានីភ្នំពេញ ៖ អ្នកនាងអម្ពរ ទេវី នឹងចូលរួមសម្តែងក្នុងខ្សែភាពយន្តចំនួន២រឿង នាដើមឆ្នាំ២០១៨ ។ ខ្សែភាពយន្តដែលអ្នកនាងអម្ពរ ទេវី ចូលរួមសម្តែងនោះគឺរឿង «កាកី» របស់ផលិតកម្ម LD និងរឿង «ឆន្ទា» របស់ផលិតកម្ម RED Picture គ្រោងនឹងចាក់បញ្ចាំងនៅក្នុងស្ថានីយទូរទស្សន៍CTN ។
មិត្តភក្តិជិតស្និទ្ធរបស់អ្នកនាងអម្ពរ ទេវី រស់នៅសហរដ្ឋអាមេរិកកាលពីពេល ថ្មីៗកន្លងមកឲ្យដឹងថា តាមការគ្រោងទុកអ្នកនាងអម្ពរ ទេវី នឹងមកកាន់ប្រទេសកម្ពុជានៅអំឡុងថ្ងៃទី១០ ខែមករា ឆ្នាំ២០១៨ ។ អ្នកនាង អម្ពរ ទេវី បានត្រៀមរួចរាល់ហើយសម្រាប់ការចេញដំណើរមកកាន់ទឹកដីកំណើត ដើម្បីចូលរួមសម្តែងខ្សែភាពយន្តជាថ្មី ។ អ្នកនាងអម្ពរ ទេវី មកកាន់ប្រទេសកម្ពុជាជាថ្មីនាពេលនេះគឺមិនខុសពីពេលមុនឡើយ ពោលមិនមានស្វាមីអមដំណើរជាមួយឡើយ ដោយនាងមកទៅតែពីរនាក់កូនប្រុសរបស់នាងដែលជាតំណក់ឈាមជាមួយលោកពេជ្រ ភារុណ ប៉ុណ្ណោះ ។
អ្នកនាងអម្ពរ ទេវី អាចនឹងមិនស្នាក់នៅប្រទេសកម្ពុជាលើសពីរយៈពេល២ខែទេ ដោយ សារតែនាងត្រូវរូតរះវិលទៅអាមេរិកវិញ ដើម្បីជួយមើលការខុសត្រូវហាងជាមួយស្វាមីរបស់នាង ដែលទើបបើកដំណើរការ ថ្មីៗកន្លងមក ។
ក្នុងពេលអ្នកនាងអម្ពរ ទេវី ចុះពីយន្តហោះ ទំនងជានឹងមិនផ្តល់បទសម្ភាសន៍ដល់អ្នកសារព័ត៌មានទេ ។
ម្ចាស់ផលិតកម្ម RED Pictre ដែលត្រៀមទទួលអ្នកនាងអម្ពរ ទេវី បានអះអាងថា លោក និងក្រុមការងារបានរៀបចំរួចរាល់ហើយ សម្រាប់ការថតប្លង់សម្តែងរបស់អ្នកនាងអម្ពរ ទេវី ក្នុងរឿង «ឆន្ទា» ។ រឿង ឆន្ទា ដែលអ្នកនាងអម្ពរ ទេវី ជាតួអង្គផ្ទាល់នោះ បានចាប់ផ្តើមថតជា បណ្តើរៗហើយ ដោយត្រូវរង់ចាំតែអ្នកនាងអម្ពរ ទេវី មកបំពេញប្លង់តួដែលនាងត្រូវសម្តែងប៉ុណ្ណោះ ។
លោកបន្ថែមថា រឿង ឆន្ទា នឹងផ្តល់រសជាតិថ្មីមួយទៀត តាមរយៈការចូលរួមសម្តែងពីកំពូលតារាភាពយន្តខ្មែរអ្នកនាងអម្ពរ ទេវី នាពេលនេះ ខណៈពេលដែលខ្សែរឿងភាគមួយនេះគ្រោងនឹងដាក់បញ្ចាំងលើកញ្ចក់ទូរទស្សន៍CTN នៅអំឡុងក្រោយបុណ្យចូលឆ្នាំខ្មែរនាឆ្នាំ២០១៨ខាងមុខនេះ ។
អ្នកនាងអម្ពរ ទេវី នឹងចូលរួមសម្តែងក្នុងខ្សែភាពយន្តរឿងកាកី តែម្ចាស់ផលិតកម្មមិនបញ្ជាក់ថាជាតួអង្គអ្វីទេ ៕
ចែករំលែកព័តមាននេះ