ខេត្តបាត់ដំបង ៖ ជនសង្ស័យចំនួន៤នាក់ត្រូវបានកម្លាំងសមត្ថកិច្ចឃាត់ខ្លួនកាលពីវេលាម៉ោង៨នឹង៣០នាទីយប់ ថ្ងៃទី១៣ ខែធ្នូ ឆ្នាំ២០១៧ ក្រោយពីពួកគេបាននាំគ្នាគាស់បង្អូចចូលលួចយកទូរស័ព្ទរបស់ព្រះសង្ឃនៅកុដិវត្តបាយដំរ៉ាំ ដែលស្ថិតក្នុងភូមិបាយដំរ៉ាំ ឃុំបាយដំរ៉ាំ ស្រុកបាណន់ ។
លោកឧត្តមសេនីត្រី ជេត វណ្ណនី ស្នងការរងខេត្តបានប្រាប់ថា ជនសង្ស័យទាំង៤នាក់ក្រោយធ្វើសកម្មភាព និងក្រោយពីទទូលបានបណ្ដឹងពីព្រះសង្ឃសមត្ថកិច្ចស្រុកបាណន់ក៏បានស្រាវជ្រាវឃាត់ខ្លួនក្រុមនេះបានជាបន្តបន្ទាប់ភ្លាមៗដែរ ។
បើតាមប្រភពព័ត៌មានពីព្រះសង្ឃបានឲ្យដឹងថា កន្លងមកនៅក្នុងវត្តបាយដំរ៉ាំតែងបាត់សម្ភារ និងទ្រព្យសម្បត្តិរបស់ព្រះសង្ឃជាញឹកញ៉ាប់ ហើយពេលខ្លះគេស្គាល់ទាំងមុខជនសង្ស័យទៀតតែសមត្ថកិច្ចហាក់មិនបានយកចិត្តទុកដាក់នឹងជនសង្ស័យទាំងនោះទេ បើទោះជាប្រជាពលរដ្ឋរាយការណ៏ជួនសមត្ថកិច្ចជាបន្តបន្ទាប់ក្ដី ។
ប្រភពដដែលបានបញ្ជាក់ថា ជនប្រព្រឹត្តភាគច្រើនជាមនុស្សរស់នៅក្នុងមូលដ្ឋាន និងជាក្មេងដែលប្រើប្រាសថ្នាំញៀន ។ ប៉ុន្តែការប្រព្រឹត្តលើកនេះដោយសារមានបក្សពួកច្រើនហើយគាស់បង្អូចចូលកុដិលួចទាំងក្បាលព្រលប់ហើយត្រូវគេស្គាល់ច្បាស់ទើបសមត្ថកិច្ចតាមចាប់ខ្លួនបានតែម្ដង ។
សមត្ថកិច្ចបានប្រាប់ថា ក្រោយពីលួចបានទូរស័ព្ទរបស់ព្រះសង្ឃក្រុមនេះបានយកទូរស័ព្ទនេះទៅបញ្ចាំនៅហាងទទូលបញ្ចាំមួយកន្លែងនៅក្រុងបាត់ដំបងភ្លាមៗដែរ លុះបន្តិចក្រោយមកក៏ត្រូវសមត្ថកិច្ចតាមចាប់ខ្លួនបាន និងដកហូតបានម៉ូតូ២គ្រឿងដែលក្រុមនេះជិះធ្វើសកម្មភាព ។ ពេលនេះមន្ត្រីជំនាញកំពុងសួរនាំក្រុមជនសង្ស័យទាំង៤នាក់ដើម្បីកសាងសំណុំរឿងបញ្ជូនទៅតុលាការហើយ ៕
ចែករំលែកព័តមាននេះ