ខេត្តក្រចេះ ៖ នគរបាលស្រុកសំបូរបានបញ្ជាក់ថា ករណីភ្លើងឆេះមនុស្សបណ្តាលឲ្យស្លាប់នៅលើផ្ទះរបស់ខ្លួន គឺនគរបាលកំពុងស្រាវជ្រាវស៊ើបអង្កេត ដើម្បីរកឲ្យឃើញថា តើជាការធ្វើអត្តឃាតដោយដុតសម្លាប់ខ្លួន ឬក៏ជាករណីអ្វីផ្សេង។
មន្ត្រីនគរបាលប៉ុស្តិ៍បានឲ្យដឹងថា បុរសម្នាក់ត្រូវបានគេប្រទះឃើញស្លាប់ដោយត្រូវភ្លើងឆេះរោលខ្មៅពេញខ្លួនប្រាណ និងបង្កឲ្យអ្នកភូមិភ្ញាក់ផ្អើលកាលពីយប់ថ្ងៃទី១៣ ខែធ្នូ នៅលើផ្ទះឈើមួយខ្នងកណ្តាលភូមិ ក្នុងឃុំវឌ្ឍនៈ ស្រុកសំបូរ។ បុរសដែលត្រូវភ្លើងឆេះស្លាប់នេះឈ្មោះ សំមាំង អាយុ៤៧ឆ្នាំ មានកូន២នាក់ និងជាមនុស្សមានជំងឺប្រចាំកាយជាយូរមកហើយ ។ សព្វថ្ងៃបុរសរូបនេះស្នាក់នៅផ្ទះតែម្នាក់ឯងទេ ឯប្រពន្ធ
កូនបានទៅរស់នៅផ្ទះផ្សេងគ្នា ហើយក៏ឈប់មានការរាប់រកគ្នាជាយូរមកហើយដែរ ។
សេចក្តីរាយការណ៍ពីកន្លែងកើតហេតុបានឲ្យដឹងថា កាលពីយប់កើតហេតុនោះ គេឃើញភ្លើងឆេះក្នុងផ្ទះដែលជនរងគ្រោះស្នាក់នៅតែម្នាក់ឯង ហើយអ្នកភូមិបាននាំគ្នាជួយពន្លត់ដែរ តែមិនអាចជួយជីវិតបុរសនេះបានទេ គឺបានស្លាប់នៅលើពូកក្នុងផ្ទះទៅហើយ ដោយត្រូវភ្លើងឆេះរោលខ្មៅពេញខ្លួនប្រាណស្ទើរមើលលែងយល់ ។ ករណីភ្លើងឆេះមនុស្សឲ្យស្លាប់ ដែលសមត្ថកិច្ចមិនទាន់កំណត់បានថាជាមូលហេតុអ្វីឲ្យប្រា
កដនៅឡើយនោះ គឺឆេះស្លាប់តែជនរងគ្រោះ ប៉ុណ្ណោះ និងមិនបណ្តាលឲ្យមានអគ្គិភ័យធ្ងន់ធ្ងរឆេះដល់លំនៅឋានរបស់ជនរងគ្រោះនោះទេ ។
បើទោះជាបែបណា ការស្លាប់របស់ជនរងគ្រោះត្រូវបានប្រភពខ្លះសន្និដ្ឋានថា ជាករណីធ្វើអត្តឃាតដោយចាក់សាំងដុតសម្លាប់ខ្លួន ព្រោះតែជនរងគ្រោះតូចចិត្តនឹងមានជំងឺប្រចាំកាយមើលមិនជារយៈពេលជាច្រើនឆ្នាំមកហើយ និងត្រូវរស់នៅឯកោកណ្តោចកណ្តែង ទើបលែងចង់រស់តទៅទៀត ។
ជុំវិញករណីនេះ អធិការនគរបាលស្រុកសំបូរ លោកវរសេនីយ៍ឯក ប៊ុន ឈឿន ថ្លែងថា នគរបាលជំនាញបានទៅពិនិត្យដល់កន្លែងកើតហេតុដើម្បីស្រាវជ្រាវបន្ថែមលើករណីនេះ តែរហូតមកទល់នឹថ្ងៃទី១៤ ខែធ្នូ នៅមិនទាន់បានកំណត់ឲ្យច្បាស់នៅឡើយទេ ៕
ចែករំលែកព័តមាននេះ