ខេត្តបាត់ដំបង ៖ ឃ្លាំងលក់រថយន្តមួយកន្លែង ស្ថិតនៅភូមិរំចេក៤ សង្កាត់រតន: ក្រុងបាត់ដំបង ជាប់ផ្លូវជាតិលេខ៥ នៅខាងមុខផ្លូវចូលផ្សារថ្មី ត្រូវជនមិនស្គាល់មុខជិះរថយន្តម៉ាកMAZDA ទៅឈប់ខាងមុខ…
ខេត្តបាត់ដំបង ៖ ឃ្លាំងលក់រថយន្តមួយកន្លែង ស្ថិតនៅភូមិរំចេក៤ សង្កាត់រតន: ក្រុងបាត់ដំបង ជាប់ផ្លូវជាតិលេខ៥ នៅខាងមុខផ្លូវចូលផ្សារថ្មី ត្រូវជនមិនស្គាល់មុខជិះរថយន្តម៉ាកMAZDA ទៅឈប់ខាងមុខ រួចចុះទៅគប់បំបែកកញ្ចក់ឃ្លាំង បង្កឱ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង០៩ និង២៧នាទីយប់ថ្ងៃទី១៤ ធ្នូ ដែលគេសង្ស័យថា អាចជារឿងគំនុំ ។
សមត្ថកិច្ចបាននិយាយថា បើតាមព័ត៌មានដែលទទូលបានពីសន្តិសុខយាមឃ្លាំងរបស់ក្រុមហ៊ុនម្នាក់ឈ្មោះឡុង ឆុន អាយុ៥៤ឆ្នាំ បានប្រាប់ថា ជនមិនស្គាល់មុខនោះ ជិះរថយន្តម៉ាកMAZDAពណ.ស ពាក់ស្លាកលេខភ្នំពេញ 2AP-3439 ។ ជននោះ បានបើករថយន្តមកឈប់នៅខាងមុខហាង រួចបើកទ្វារចុះដើរទៅគប់ចំកញ្ចក់ក្បែរទ្វារ ដែលមានរថយន្តស៊េរីទំនើបៗជាច្រើនគ្រឿងនៅក្នុងនោះ ។ សមត្ថកិច្ចបានបញ្ជាក់ថា កញ្ចក់ឃ្លាំងបានបែកនៅផ្នែកខាងមុខក្បែរទ្វារចូល ដែលគេសង្ស័យ ជនមិនស្គាល់មុខនោះ ប្រើកែវគប់ទៅលើកញ្ចក់នៃហាងស្ដុករថយន្ត ។ ព្រោះជាមួយនឹងស្នាមបែក និងអំបែងកញ្ចក់រាយប៉ាយ មន្ត្រីជំនាញរកឃើញបំណែកកែវខ្ទាតរាយប៉ាយនៅខាងក្រៅដែរ ។ គេសង្ស័យជននោះយកកែវគប់ទៅលើកញ្ចក់ផ្នែកខាងមុខ ដែលគេសន្និដ្ឋានជំហានដំបូង អាចកើតឡើងដោយសាររឿងគំនុំ ។
បើតាមការបំភ្លឺពីសន្តិសុខយាមឃ្លាំងរថយន្តឈ្មោះឡុង ឆុន បាននិយាយថា ពេលកើតហេតុ គឺខ្លួនកំពុងអង្គុយនៅក្នុងប៉ុស្ដិ៍យាមខាងមុខឃ្លាំង ។ សន្តិសុខរូបនេះនិយាយទៀតថា ពេលនោះគាត់បានឃើញរថយន្តម៉ាកMAZDA ពណ.ស ពាក់ស្លាកលេខភ្នំពេញ2AP-3439 បើកមកពីទិសខាងកើត រួចមកឈប់ខាងកើតប៉ុស្ដិ៍យាមគាត់ប្រហែល៥ម៉ែត្រ ។ ពេលនោះខ្លួនឃើញបុរសម្នាក់បើកទ្វារថយន្តចុះ តែខ្លួនមិនបានចាប់អារម្មណ៍ថា ជននោះចុះដើរទៅណាទេ ។ ប៉ុន្តែគ្រាហ៍នោះ ស្រាប់តែឮស្នូរផ្ទុះដូចបាញ់កាំភ្លើងនៅខាងក្រោយខ្នងខ្លួន ។
សន្តិសុខរូបនេះបានបញ្ជាក់ទៀតថា ពេលនោះ ខ្លួនបានស្ទុះចេញក្រៅ ស្រាប់តែឃើញជននោះរត់ឡើងរថយន្តវិញ រួចបើកយ៉ាងលឿន ឆ្ពោះទៅទិសខាងលិចបាត់ ។ លុះពេលខ្លួនដើរទៅមើលខាងឃ្លាំងរថយន្តស្រាប់តែឃើញជញ្ជាំងកញ្ចក់បែកខ្ទេចខ្ទីរាយប៉ាយពេញខាងមុខ និងខាងក្នុងឃ្លាំង តែមិនប៉ះពាល់រថយន្តទេ ទើបមានការភ្ញាក់ផ្អើលតែម្ដង ។ បើតាមសន្តិសុខដដែលបានបញ្ជាក់ដែរថា ដំបូងខ្លួនគិតថា ជនមិនស្គាល់មុខនោះ បានប្រើប្រាស់កាំភ្លើងបាញ់ ព្រោះមានស្នាមត្រូវកញ្ចក់ដូចគ្រាប់កាំភ្លើង ។ លុះព្រឹកឡើងពេលសមត្ថកិច្ចចុះពិនិត្យ ទើបមានការសង្ស័យថា ជននោះយកកែវគប់ទៅលើជញ្ជាំងកញ្ចក់ ព្រោះគេប្រទះឃើញបំណែកកែវនៅខាងក្រៅ ។
ជុំវិញករណីនេះ ទាំងសមត្ថកិច្ច ទាំងភាគីខាងក្រុមហ៊ុនតូយ៉ូតា សុទ្ធតែមិនទាន់ហ៊ានសន្និដ្ឋានឱ្យជាក់លាក់អំពីមូលហេតុដែលនាំឲ្យជនមិនស្គាល់មុខ ជិះរថយន្តមកគប់កញ្ចក់ឃ្លាំងលក់រថយន្តនេះនៅឡើយទេ ។ ប៉ុន្តែបើតាមប្រភពព័ត៌បានបង្ហើបឲ្យដឹងថា កាលពីពេលថ្មីៗកន្លងទៅនេះ ម្ចាស់ក្រុមហ៊ុននេះ បានបណ្ដេញបុគ្គលិកប្រុសម្នាក់ចេញពីក្រុមហ៊ុន ដោយសារបុគ្គលិករូបនោះ បង្កឱ្យមានបញ្ហាក្នុងក្រុមហ៊ុន តែគេមិនដឹងថា សំណុំរឿង ជនមិនស្គាល់មុខជិះរថយន្តម៉ាកMAZDA មកគប់កញ្ចក់ហាងលក់រថយន្តខាងលើនេះ មានជាប់ពាក់ព័ន្ធ និងបុគ្គលិកនោះ ឬបែបណានោះទេ ។
លោកឧត្តមសេនីយត្រី ជេត វណ្ណនី ស្នងការរងខេត្ត ដែលបានចុះអន្តរាគមន៍លើករណីនេះផ្ទាល់ បាននិយាយថា បើតាមការបំភ្លឺជាបឋមពីភាគីក្រុមហ៊ុន គឺពិតជាមានរឿងបែបនេះមែន ។ លោកថា នៅកន្លែងកើតហេតុ យើងបានរកឃើញបំណែកកែវមួយនៅខាងក្រៅឃ្លាំងកញ្ចក់ ហើយបើតាមការពិនិត្យរបស់មន្ត្រីជំនាញ គឺស្នាមកញ្ចក់ដែលបែកធ្លុះនោះ ប្រាកដជាត្រូវនឹងកែវមែន ។ ប៉ុន្តែបើតាមការបំភ្លឺនានាពីសាក្សី និងបុគ្គលិករបស់ក្រុមហ៊ុនលោកអាចធ្វើការសន្និដ្ឋានជាបឋមថា នេះជាករណីបំផ្លិចបំផ្លាញទ្រព្យសម្បត្តិអ្នកដទៃ ដែលអាចកើតឡើងដោយសារគំនុំ ។
លោកស្នងការរងបានបញ្ជាក់ថា ពេលនេះ មន្ត្រីជំនាញកំពុងសាកសួរព័ត៌មានបន្ត ដើម្បីធ្វើការស្រាវជ្រាវរកមុខសញ្ញាជនមិនស្គាល់មុខនោះហើយ ។
ចែករំលែកព័តមាននេះ