ខេត្តត្បូងឃ្មុំ ៖ គ្រាប់បែកគីមីចំនួន២គ្រាប់ដែលកងកម្លាំងស៊ីម៉ាក ចុះសម្អាតដីក្នុងឃុំជាំក្រវៀន ស្រុកមេមត់ សេសសល់ពីសម័យសង្គ្រាម បានបន្សល់ទុកមកដល់សព្វថ្ងៃ និងបានបង្កក្តីព្រួយបារម្ភសម្រាប់ប្រជាពលរដ្ឋផងដែរ។ ដោយឡែកព្រឹកថ្ងៃទី១៤ ខែធ្នូ…
ខេត្តត្បូងឃ្មុំ ៖ គ្រាប់បែកគីមីចំនួន២គ្រាប់ដែលកងកម្លាំងស៊ីម៉ាក ចុះសម្អាតដីក្នុងឃុំជាំក្រវៀន ស្រុកមេមត់ សេសសល់ពីសម័យសង្គ្រាម បានបន្សល់ទុកមកដល់សព្វថ្ងៃ និងបានបង្កក្តីព្រួយបារម្ភសម្រាប់ប្រជាពលរដ្ឋផងដែរ។ ដោយឡែកព្រឹកថ្ងៃទី១៤ ខែធ្នូ ឆ្នាំ២០១៧ ត្រូវបានកម្លាំងបច្ចេកទេសរបស់អង្គការហាមឃាត់អាវុធគីមីនៃអង្គការសហប្រជាជាតិ(UN-OPCW) បានចុះទៅពិនិត្យដោយផ្ទាល់ផងដែរ។
លោក គីម ហៀង នាយផ្នែកត្រួតពិនិត្យគុណភាពប្រតិបត្តិការនៅកងឯកភាពកំចាត់មីនទី៥ មានប្រសាសន៍ឲ្យដឹងថា ពេលដែលចុះទៅពិនិត្យទីតាំងគ្រាប់បែកគីមីខាងលើនោះ មានកម្លាំងស៊ីម៉ាក១ក្រុមបានចុះទៅអមដើម្បីសម្អាតផ្លូវងាយចូលទៅមើល ដើម្បីឲ្យកម្លាំងសហប្រជាជាតិមើលពីគុណភាពមានកម្រិតណាហើយវានឹងបង្កផលប៉ះពាល់ដល់កម្រិតណានោះ។
ប្រភពដដែលបន្តថា មានពេលមួយដែលកម្លាំងស៊ីម៉ាក បានចុះទៅបោសសម្អាតដីសម្បទានសង្គមកិច្ចក្នុងឃុំជាំក្រវៀន ស្រុកមេមត់ ក៏បានប្រទះឃើញគ្រាប់បែកគីមីចំនួន២គ្រាប់ នៅកន្លែងផ្សេងគ្នាដោយបានលុបគ្របដើម្បីឲ្យអាជ្ញាធរគីមី បោសសម្អាតតាមក្រោយ។ ទើបតែនៅថ្ងៃទី១៤ ខែធ្នូ ឆ្នាំ២០១៧ កម្លាំងរបស់សហប្រជាជាតិចុះមកពិនិត្យពីគុណភាព ហើយមិនទាន់ដឹងថាតើគ្រាប់នោះមានផ្ទុកនៅសារធាតុគីមីអ្វីខ្លះនោះទេ ព្រោះថាសារធាតុគីមីបានបង្កឲ្យមានមនុស្សរងផលប៉ះពាល់ខុសៗគ្នា។ លោក គីម ហៀង នាយផ្នែកត្រួតពិនិត្យគុណភាពប្រតិបត្តិការកងឯកភាពកំចាត់មីនទី៥ បានបញ្ជាក់ថា ក្រោយពីកម្លាំងខាងលើត្រួតពិនិត្យរួចរាល់ក្នុងជំហានទី១ ហើយជំហានទី២នឹងត្រូវវេចខ្ចប់ជាបំណែកតូចមានសុវត្ថិភាពដើម្បីយកទៅពិសោធន៍នៅបរទេស ថាតើគ្រាប់បែកគីមីទាំង២គ្រាប់នេះមានសារធាតុគីមីអ្វីខ្លះ ហើយមានផលប៉ះពាល់កម្រិតណា។
តាមធម្មតាគ្រាប់បែកគីមីទាល់តែកម្ដៅចាប់ពី១.៣០០អង្សារទើបអាចបំបែកនូវម៉ូលេគុលបាន ព្រមទាំងមាន៣ប្រភេទទៅតាមសណ្ឋានខុសៗគ្នាផងដែរ។ ដោយឡែកនៅក្នុងឃុំជាំក្រវៀន ស្រុកមេមត់ មិនទាន់មានការស្រាវជ្រាវផលប៉ះពាល់ដូចនៅខាងខេត្តស្វាយរៀងនៅឡើយទេ។
លោក ចេង ប៊ុនណារ៉ា អភិបាលស្រុកមេមត់ ប្រាប់ឲ្យដឹងដែរថា នៅព្រឹកថ្ងៃទី១៤ ធ្នូ ២០១៧ កម្លាំងរបស់សហប្រជាតិបានចុះទៅកាន់ភូមិស្រែលើសែនជ័យ ឃុំជាំក្រវៀន ស្រុកមេមត់ ដើម្បីពិនិត្យមើលត្រង់រណ្តៅម្សៅគីមីចំនួន២កន្លែងដើម្បីពិនិត្យពីផលប៉ះពាល់ ។លោកថាកាលពីសម័យសង្គ្រាមក្នុងអតីតកាលត្រូវបានគេបាចពីលើយន្តហោះដោយកម្លាំងទ័ពអាមេរិក លុះពេលដែលធ្លាក់លើស្លឹកឈើបណ្តាលឲ្យងាប់ក្រៀមស្វិតហើយអាចមើលឃើញសត្រូវ។ កាលពីរណ្តៅមិនទាន់លុប ពេលដែលត្រូវកម្ដៅថ្ងៃនឹងសាយភាយចំហាយចេញទៅធ្វើឲ្យពលរដ្ឋរស់ក្បែរនោះ រកាំភ្នែក និងពិបាកដកដង្ហើមផងដែរ។ ហើយក្រោយពីលុបរណ្តៅនោះ ក៏មិនមានហេតុការណ៍អ្វីកើតឡើងដែរ៕
ចែករំលែកព័តមាននេះ