រាជធានីភ្នំពេញ ៖ ជន២នាក់ ក្នុងនោះមានជនជាតិវៀតណាមម្នាក់ និងជនជាតិខ្មែរម្នាក់ បានត្រូវនគរបាលព្រហ្មទណ្ឌខណ្ឌដូនពេញ ដេញចាប់បានភ្លាមៗ ខណៈពួកគជិះម៉ូតូមួយគ្រឿងធ្វើសកម្មភាពឆក់កាបូបពីនារីវ័យក្មេងស្រស់ស្អាត៣នាក់ ជិះម៉ូតូរ៉ឺម៉ក ហើយពួកនាងស្រែកឆោឡោឡើងថា«ចោរៗ» ។ ករណីនេះ កើតឡើងកាលពីវេលាម៉ោង៤រសៀលថ្ងៃទី១១ ខែធ្នូ នៅកែងផ្លូវលេខ៥១និងផ្លូវលេខ២០៨ ក្នុងសង្កាត់បឹងរាំង ខណ្ឌដូនពេញ ។
ប្រភពព័ត៌មានពីនគរបាលបានឱ្យដឹងថា ជនដែលត្រូវបានឃាត់ខ្លួននេះ ម្នាក់ឈ្មោះ យ៉ យ៉ាំងថាវ ជាជនជាតិវៀតណាម អាយុ១៨ឆ្នាំ មុខរបរមិនពិតប្រាដក ស្នាក់នៅផ្ទះលេខ ៤៤ ផ្លូវលេខ៣៦៩ សង្កាត់ច្បារអំពៅទី១ ខណ្ឌច្បារអំពៅ និងម្នាក់ទៀតឈ្មោះ ម៉ាន់ ម៉េងហួរ ជនជាតិខ្មែរ អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលគ្មានលេខ ផ្លូវលំ ភូមិព្រែកប្រា សង្កាត់ព្រែកប្រា ខណ្ឌច្បារអំពៅ ។
មុនពេលកើតហេតុ នារីរងគ្រោះវ័យក្មេងទាំង៣នាក់ ជិះម៉ូតូរ៉ឺម៉កកង់បី១គ្រឿងពីផ្សារធំថ្មីទៅផ្សារបឹងកេងកង ក្នុងទិសដៅពីជើងទៅត្បូង ។ លុះទៅដល់ចំណុចខាងលើ ស្រាប់តែលេចមុខជន២នាក់ជិះម៉ូតូហុងដាសេ១២៥ ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខ បាត់ដំបង ១B-៧៥៣៧មកក្បែរ រួចធ្វើសកម្មភាពឆក់កាបូបដៃដែលនៅក្នុងនោះមានលុយចំនួន១៩០ដុល្លារទៅបាត់។ ភ្លាមនោះ ពួកនាងបានស្រែកឆោឡោថា«ចោរៗ» ធ្វើឱ្យភ្ញាក់ផ្អើលទៅដល់កម្លាំងព្រហ្មទណ្ឌខណ្ឌដូនពេញ ដែលកំពុងល្បាតដេញតាមធាក់ផ្តួលនិងចាប់បានតែម្តង តែកាបូបនោះបានជ្រុះបាត់ ៕
ចែករំលែកព័តមាននេះ