សហរដ្ឋអាមេរិក-ជប៉ុន-កូរ៉េខាងត្បូង ៖ កងទ័ពជើងទឹកជប៉ុនប្រកាសកាលពីថ្ងៃទី១០ ធ្នូ ពេលកំពុងមានភាពតានតឹងជាមួយកូរ៉េខាងជើងថា សហរដ្ឋអាមេរិក ជប៉ុន និងកូរ៉េខាងត្បូង បានរៀបចំធ្វើសមយុទ្ធ២ថ្ងៃគឺថ្ងៃទី១១ និង១២ ធ្នូ ដែលសមយុទ្ធនេះផ្តោតលើការតាមចាប់រកបណ្តាមីស៊ីល ។
ក្នុងសេចក្តីប្រកាសមួយ កងកម្លាំងស្វ័យការពារជប៉ុនបញ្ជាក់ថា នេះជាសមយុទ្ធលើកទី៦នៃការចែករំលែកព័ត៌មានគ្នាពីការតាមរកមីស៊ីលបាលីស្ទិករវាងប្រទេសទាំង៣ ។
សេចក្តីប្រកាស នេះពុំបានបញ្ជាក់ថា តើប្រព័ន្ធមីស៊ីលប្រឆាំងមីស៊ីលបាលីស្ទិកអាមេរិក THAAD នឹងត្រូវប្រើដែរ ឬយ៉ាងណាឡើយ ។ ការដាក់ពង្រាយប្រព័ន្ធមីស៊ីលនេះនៅកូរ៉េខាងត្បូងនាំឱ្យចិនពុំសប្បាយចិត្ត ព្រោះប្រព័ន្ធរ៉ាដារបស់ THAAD មានសមត្ថភាពយ៉ាងខ្ពស់ ។
ប្រទេសជប៉ុនធ្លាប់ត្រូវបានបណ្តាមីស៊ីលបាញ់ពីកូរ៉េខាងជើងហោះកាត់រួចហើយក្នុងក្របខណ្ឌនៃការសាកល្បងមីស៊ីលបាលីស្ទិក និងនុយក្លេអ៊ែររបស់របបកុំមុយនីស្តក្រុងព្យុងយ៉ាង ទោះបីជាខ្លួនរងការគាបសង្កត់ និងរងទណ្ឌកម្មនានារបស់សហគមន៍អន្តរជាតិក្តី ។
ថ្ងៃទី២៩ វិច្ឆិកា កូរ៉េខាងជើងបានបាញ់សាកមីស៊ីលបាលីស្ទិករំលងទ្វីប HWASONG-15 ដែលចាត់ទុកជាមីស៊ីលរំលងទ្វីបឈានមុខថ្មីបំផុត ហើយមានសមត្ថភាពបាញ់ដល់សហរដ្ឋអាមេរិក និងគ្រប់ចំណុចនៃដេនដីមហាអំណាចនេះ ។
ក្រោយការសាកល្បងថ្មីនេះ កូរ៉េខាងត្បូង និងសហរដ្ឋអាមេរិកបានធ្វើនាថ្ងៃទី៤ ធ្នូ នូវសមយុទ្ធយោធាទ័ពអាកាសទ្រង់ទ្រាយធំមួយក្នុងក្របខណ្ឌនៃសមយុទ្ធប្រចាំឆ្នាំឈ្មោះ VIGILANT ACE ។
ក្រសួងការបរទេសកូរ៉េខាងជើងវាយតម្លៃកាលពីថ្ងៃទី៦ ធ្នូ ថា សមយុទ្ធរួមនោះជាការគំរាមកំហែងនៃសង្គ្រាមបង្ការមួយរបស់ក្រុងវ៉ាស៊ីនតោនដែលជាទស្សនវិស័យនៃជម្លោះមួយនៅឧបទ្វីបកូរ៉េ ។
នាថ្ងៃទី១០ ធ្នូ កូរ៉េខាងត្បូងប្រកាសពីការដាក់ទណ្ឌកម្មថែមទៀត ប្រឆាំងស្ថាប័ន២០ ព្រមទាំងជនជាតិកូរ៉េខាងជើង១០នាក់ ។ តាមរយៈទណ្ឌកម្មនេះ ពលរដ្ឋកូរ៉េខាងត្បូងត្រូវហាមឃាត់មិនឱ្យមានទំនាក់ទំនងហិរញ្ញវត្ថុណាមួយជាមួយបណ្តាអ្នកដែលរងទណ្ឌកម្ម ។
ក្នុងសេចក្តីប្រកាសមួយ ក្រសួងហិរញ្ញវត្ថុកូរ៉េខាងត្បូងថ្លែងថា ទណ្ឌកម្មជាឯកតោភាគីទាំងនេះនឹងរារាំងដល់ការបញ្ជូនហិរញ្ញវត្ថុខុសច្បាប់ទៅកូរ៉េខាងជើង ហើយនឹងរួមចំណែកដល់ការពង្រឹងទណ្ឌកម្មរបស់សហគមន៍អន្តរជាតិប្រឆាំងកូរ៉េខាងជើង ។
តាមពិតទៅ ការសម្រេចនេះមានលក្ខណៈនិមិត្តរូបបំផុត ព្រោះអីពាណិជ្ជកម្ម និងការផ្លាស់ប្តូរហិរញ្ញវត្ថុរវាងកូរ៉េទាំង២ ត្រូវហាមឃាត់ចាប់តាំងពីខែឧសភា ឆ្នាំ២០១០ មកម្ល៉េះ ក្រោយការបាញ់ពន្លិចនាវាចម្បាំងកូរ៉េខាងត្បូងមួយគ្រឿង ។ កូរ៉េខាងជើងបានបដិសេធថា ខ្លួនពុំមែនជាអ្នកធ្វើឡើយ ៕
ចែករំលែកព័តមាននេះ