សហរដ្ឋអាមេរិក ៖ បណ្តាសារព័ត៌មានអាមេរិករាយការណ៍ថា មនុស្ស២នាក់ស្លាប់ ហើយ២នាក់ទៀតរងរបួសក្រោយយន្តហោះតូចមួយធ្លាក់លើផ្ទះមួយខ្នងនៅទីក្រុងសាន់ឌីយេហ្គោភាគនិរតីសហរដ្ឋអាមេរិកកាលពីថ្ងៃទី១០ ធ្នូ ។
ទូរទស្សន៍ CBS NEWS រាយការណ៍ថា យន្តហោះធុនស្រាល១គ្រឿងបានធ្លាក់ចំផ្ទះមួយនៅក្រុងសាន់ឌីយេហ្គោភាគខាងត្បូងរដ្ឋកាលីហ្វ័រនីញ៉ា ។ យោងតាមភ្នាក់ងារសង្គ្រោះបន្ទាន់ថា ការធ្លាក់នេះបណ្តាលឱ្យផ្ទះនេះឆេះ ហើយមនុស្សយ៉ាងតិច២នាក់ស្លាប់ និង២នាក់ទៀតរងរបួស ។
ក្រោយការហោះចេញបន្តិចពីព្រលានយន្តហោះ MONTGOMERY FIELD អ្នកបើកប្រកាសអាសន្នប្រាប់អ្នកត្រួតពិនិត្យអាកាសពីការខូចម៉ាស៊ីន ។ អ្នកបើកសាកល្បងហោះបកក្រោយមកកាន់ព្រលានយន្តហោះវិញ តែត្រូវចុះបន្ទាន់គឺគ្រោងចុះនៅទីធ្លាសាលាមួយ ក៏ប៉ុន្តែមកពីវាមានល្បឿនលឿន យន្តហោះទៅបុកផ្ទះមួយ ។
ភ្លើងបានឆាបឆេះ ហើយពួកអ្នកពន្លត់ភ្លើងអាចពន្លត់ឈ្នះក្រោយប្រើពេលកន្លះម៉ោង ។ យោងតាមទិន្នន័យដំបូងថា មានមនុស្ស៤នាក់ក្នុងយន្តហោះនេះ រួចនៅក្នុងផ្តះពុំមានមនុស្សឡើយ មានតែឆ្កែមួយក្បាលដែលត្រូវងាប់ ៕
ចែករំលែកព័តមាននេះ