ខេត្តព្រះសីហនុ ៖ បង្គោលភ្លើងមួយកន្លែងស្ថិតនៅចំណុចមុខបុរីBS អូ៥ ក្នុងភូមិ០៦ សង្កាត់លេខ៤ ក្រុងព្រះសីហនុ ត្រូវបានឆ្លងចរន្តអគ្គិសនី ឆាបឆេះសន្ធរសន្ធៅបង្កឲ្យមានការភ័យខ្លាចដល់ប្រជាពលរដ្ឋរស់នៅជុំវិញ និងអ្នកធ្វើដំណើរឆ្លងកាត់ បើទោះបីជាអគ្គិភ័យនេះ ត្រូវគ្រប់គ្រងបានទាំងស្រុង នៅប៉ុន្មាននាទីក្រោយមក ក្រោមការអន្តរាគមន៍ពីមន្ត្រីជំនាញពន្លត់អគ្គិភ័យ នៃស្នងការដ្ឋាននគរបាលខេត្តយ៉ាងណាក្តី ។
ព័ត៌មានបឋមបានឲ្យដឹងថា វាពុំបានបណ្តាលឲ្យគ្រោះថ្នាក់ដល់ទ្រព្យសម្បត្តិ ឬ អាយុជីវិតមនុស្សណាម្នាក់នោះទេប៉ុន្តែវាបានបង្កឲ្យមានការព្រួយបារម្មណ៍ពីសំណាក់ប្រជា ពលរដ្ឋដែលកំពុងរស់នៅក្បែរៗបង្គោលអគ្គិសនី ព្រោះបច្ចុប្បន្ននេះ បង្គោលភ្លើងនីមួយៗនៅក្នុងក្រុងព្រះសីហនុគេសង្កេតឃើញមានខ្សែរភ្លើងធ្លាក់រប៉ាត់រប៉ាយ ស្ទើរដល់ដី ។ ជាក់ស្តែងនាវេលាថ្ងៃត្រង់ថ្ងៃទី១០ ខែធ្នូ ឆ្នាំ២០១៧ បើយោងតាមប្រភពអ្នកឃើញហេតុការណ៍ បានបញ្ជាក់ថា ការឆ្លងចរន្តអគ្គិសនីនេះអាចមកពីរថយន្តធំបើកទាក់ខ្សែរភ្លើង ដែលបានធ្លាក់មកក្រោម ប៉ុន្តែរថយន្តធន់ធំនោះត្រូវបានគេចខ្លួនក្រោយមានអគ្គិភ័យ ។
ដោយឡែកយោងតាមប្រភពសមត្ថកិច្ចមូលដ្ឋានបានបង្ហើបឲ្យដឹងថា អគ្គិភ័យនេះ ត្រូវរលត់ទៅវិញនៅត្រឹមតែ២០នាទីក្រោយកើតហេតុតែប៉ុណ្ណោះក្រោមការជួយអន្តរាគមន៍ពីស្ថានប័នពាក់ព័ន្ធក្នុងមូលដ្ឋាន និងមន្ត្រីជំនាញនៃស្នងការដ្ឋាននគរបាលខេត្ត ។ ករណីនេះ វាពុំបានបណ្តាលឲ្យមានការខូចខាតទ្រព្យសម្បត្តិអ្នកដ៏ទៃ ឬរងរបួសមនុស្សណាម្នាក់នោះទេ ៕
ចែករំលែកព័តមាននេះ