ខេត្តកំពង់ស្ពឺ ៖ បុរសម្នាក់បានលង់ទឹកត្រពាំងក្រោយផ្ទះស្លាប់ ក្រោយពេលគាត់ត្រឡប់ពីផឹកស្រាក្នុងភូមិ រួចចុះរាវខ្យងក្នុងត្រពាំងនោះ ។ ហេតុការណ៍ប្រទះឃើញសពបុរសលង់ទឹកស្លាប់ បានកើតឡើងកាលពីម៉ោង២និង២០នាទីរសៀលថ្ងៃទី០៥ ខែធ្នូ ឆ្នាំ២០១៧ ស្ថិតក្នុងភូមិផ្សារកន្ទួត ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
ជនរងគ្រោះឈ្មោះមុត ទិត្យ អាយុ៤៥ឆ្នាំ រស់នៅភូមិ-ឃុំកើតហេតុខាងលើ ។
ព័ត៌មានពីគ្រួសារសពបានឲ្យដឹងថា មុនពេលកើតហេតុជនរងគ្រោះបានដើរទៅផឹកស្រានៅផ្ទះមិត្តភក្តិក្នុងភូមិ ។ លុះផឹកស្រវឹងបានដើរត្រឡប់មកផ្ទះវិញ រួចដើរចុះក្នុងត្រពាំងខាងក្រោយផ្ទះចម្ងាយប្រមាណ២០០ម៉ែត្រ ដើម្បីរាវខ្យងយកទៅក្លែមបន្តទៀត ។
ប្រភពបន្តទៀតថា ក្រោយពីបាត់យូរមិត្តភក្តិបានមកតាមរក រួចក៏ប្រទះឃើញសពជនរងគ្រោះ លង់ស្លាប់ក្នុងទឹកត្រពាំងបាត់ទៅហើយ ។
ក្រោយប្រទះឃើញសពមិត្តភក្តិក្រុមគ្រួសារបានចុះស្រង់សពចេញពីទឹក រួចទាក់ទងសមត្ថកិច្ចឲ្យចុះមកពិនិត្យសពឃើញថា មិនពាក់ព័ន្ធបទល្មើស ទើបប្រគល់សពឲ្យក្រុមគ្រួសារ រៀបចំធ្វើបុណ្យតាមប្រពៃណី ៕
ចែករំលែកព័តមាននេះ