រាជធានីភ្នំពេញ ៖ សម្តេចនាយករដ្ឋមន្ត្រី ហ៊ុន សែន នៅព្រឹកថ្ងៃពុធនេះបានប្រកាសទទួលបយកពលរដ្ឋខ្មែរទាំងអស់ ដែលសហរដ្ឋអាមេរិកអាចបណ្តេញចេញ ព្រោះសម្តេចបានទទួលព័ត៌មានថា ប្រទេសមហាអំណាចមួយនេះ មានគម្រោងបណ្តេញពលរដ្ឋខ្មែរដែលភៀសខ្លួនទៅរស់នៅអាមេរិកក្រោយឆ្នាំ១៩៩៤…
រាជធានីភ្នំពេញ ៖ សម្តេចនាយករដ្ឋមន្ត្រី ហ៊ុន សែន នៅព្រឹកថ្ងៃពុធនេះបានប្រកាសទទួលបយកពលរដ្ឋខ្មែរទាំងអស់ ដែលសហរដ្ឋអាមេរិកអាចបណ្តេញចេញ ព្រោះសម្តេចបានទទួលព័ត៌មានថា ប្រទេសមហាអំណាចមួយនេះ មានគម្រោងបណ្តេញពលរដ្ឋខ្មែរដែលភៀសខ្លួនទៅរស់នៅអាមេរិកក្រោយឆ្នាំ១៩៩៤ រួមទាំងអ្នកដែលប្រព្រឹត្តខុសច្បាប់អាមេរិកផងដែរ។
សម្តេចតេជោបានលើកឡើងបែបនេះក្នុងពិធីជួបសំណេះសំណាលជាមួយកម្មករ កម្មការិនីជាង១ម៉ឺននាក់នៅរោងចក្រតំបន់អូរដឹម ខណ្ឌពោធិ៍សែនជ័យ រាជធានីភ្នំពេញ។
សម្តេចបានបញ្ជាក់ថា៖ «យើងត្រូវតែគិតគូរពីពលរដ្ឋខ្មែរដែលអាចរងគ្រោះ យើងត្រូវតែត្រៀមខ្លួនទទួលយកពួកគេ។ បើយើងបណ្តែតបណ្តោយបងប្អូនខ្មែរយើងអាចនឹងបញ្ជូនទៅប្រទេសនេះ ទៅប្រទេសនោះ»។
ដើម្បីធានាថា ពលរដ្ឋខ្មែរទាំងនោះ មិនត្រូវបានបញ្ជូនទៅកាន់កោះដាច់ស្រយាលណាមួយដែលពិបាករស់នៅ សម្តេចបានឱ្យក្រសួងមមហាផ្ទៃចរចាជាមួយសហរដ្ឋអាមេរិក បញ្ជូនមកកម្ពុជា។ ជាមួយគ្នានេះ សម្តេចបានលើកឡើងថា លទ្ធភាពកម្ពុជាអាចត្រឹម ទទួលពួកគេនៅព្រលានយន្តហោះភ្នំពេញតែប៉ុណ្ណោះ ហេតុនេះបើសហរដ្ឋអាមេរិកចង់បញ្ជូនពួកគេមក សហរដ្ឋអាមេរិកត្រូវធានាបញ្ជូនមកដល់កម្ពុជា និងផ្តល់ប្រាក់ឱ្យពួកសម្រាប់ផ្គត់ផ្គង់ការរស់នៅមួយរយៈពេលមកដល់កម្ពុជា។
សូមជម្រាបថា ក្រោមកិច្ចព្រមព្រៀងរវាងរដ្ឋាភិបាលកម្ពុជា និងសហរដ្ឋអាមេរិកស្ដីពីការធ្វើមាតុភូមិនិវត្តន៍ពលរដ្ឋខ្មែរពីសហរដ្ឋអាមេរិកមកកម្ពុជាវិញ ដែលបានអនុវត្តអស់រយៈពេលជិត១៥ឆ្នាំមកនេះ មានពលរដ្ឋដើមកំណើតខ្មែរប្រមាណ៦០០នាក់ ដែលជាប់ពិរុទ្ធនៅសហរដ្ឋអាមេរិក ត្រូវរដ្ឋាភិបាលសហរដ្ឋអាមេរិកចាប់បញ្ជូនមកកម្ពុជាវិញ៕
ចែករំលែកព័តមាននេះ