រាជធានីភ្នំពេញ ៖ ការប្រមូលផលស្រូវវស្សាឆ្នាំនេះសម្រេចបានជិត៥០%ហើយ ខណៈតម្លៃ និងទិន្នផលស្រូវប្រសើរជាងឆ្នាំមុន ។ នេះបើតាមការបញ្ជាក់ពីរដ្ឋមន្ត្រីក្រសួងកសិកម្ម ។ រដ្ឋមន្ត្រីក្រសួងកសិកម្ម រុក្ខាប្រមាញ់…
រាជធានីភ្នំពេញ ៖ ការប្រមូលផលស្រូវវស្សាឆ្នាំនេះសម្រេចបានជិត៥០%ហើយ ខណៈតម្លៃ និងទិន្នផលស្រូវប្រសើរជាងឆ្នាំមុន ។ នេះបើតាមការបញ្ជាក់ពីរដ្ឋមន្ត្រីក្រសួងកសិកម្ម ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានថ្លែងតាមទូរស័ព្ទនាព្រឹកថ្ងៃទី៣០ វិច្ឆិកា កន្លងមកថា ទិន្នផលស្រូវឆ្នាំនេះនឹងកើនដល់ជាង១០លានតោន ខណៈឆ្នាំមុន ការប្រមូលផលស្រូវបានជាង៩,៩លានតោន ព្រោះការដាំដុះដំណាំស្រូវឆ្នាំនេះ សម្រេចលើសផែនការចំនួន៦,៤៥ហិកតា ។
លោករដ្ឋមន្ត្រីបន្តថា ផ្ទៃដីដាំដុះស្រូវឆ្នាំនេះមានទំហំ២.៦៥៧.៧៦៨ហិកតា និងប្រមូលផលបានចំនួន១.០២២.៤៧៨ហិកតា រហូតមកទល់ពេលនេះ ។
លោកបន្តថា ៖« ទិន្នផលស្រូវប្រមូលបានរហូតមកទល់ពេលនេះ បានចំនួន៣.៣៦១.១៦៤តោន ហើយទិន្នផលជាមធ្យមប្រមូលបានចំនួន៣.២៦៣គីឡូក្រាមក្នុង១ហិកតា ។ ផលស្រូវប្រមូលបានឆ្នាំនេះ ភាគច្រើនជាប្រភេទស្រូវក្រអូប ជាការផលិតសម្រាប់តម្រង់ទិសការនាំចេញ » ។
ស្រូវក្រអូបឆ្នាំនេះ មានតម្លៃចន្លោះពី១ពាន់ទៅ១.៣០០រៀល និងស្រូវធម្មតាមានតម្លៃចន្លោះពី៨០០ទៅ៩០០រៀលក្នុង១គីឡូក្រាម ។
លោកឧកញ៉ា ភួ ពុយ ប្រធានសម្ព័ន្ធសមាគមរោងម៉ាស៊ីនកិនស្រូវកម្ពុជា បានថ្លែងថា ការប្រមូលផលស្រូវរដូវវស្សាបានដំណើរការល្អប្រសើរ ដោយបច្ចុប្បន្ន ស្រូវមានតម្លៃចន្លោះពី១.១០០ទៅ១.៣០០រៀលក្នុង១គីឡូក្រាម ហើយកសិករមិនលំបាកក្នុងការដឹកជញ្ជូនស្រូវទេ ព្រោះយើងបានបង្កើតផ្សារនៅតាមសហគមន៍ ដើម្បីប្រមូលទិញស្រូវពីកសិករ ដែលផ្តល់ផលចំណេញច្រើនដល់ពួកគាត់ ទាំងតម្លៃដើមនៃការផលិត និងបាត់បង់ទិន្នផលស្រូវនៅពេលប្រមូលផល ។
លោកបន្តថា ៖« ធនាគារស្រូវបានចំណាយប្រាក់ជារៀងរាល់ថ្ងៃរាប់ម៉ឺនដុល្លារ ដើម្បីប្រមូលទិញស្រូវពីកសិករនៅតាមបណ្តាខេត្តភូមិភាគពាយ័ព្យនៃកម្ពុជា » ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ស្ថានភាពទីផ្សារកសិកម្មកម្ពុជា នៅតែមិនទាន់មានភាពច្បាស់លាស់នៅឡើយ ហើយផលិតកម្មរបស់យើងទទួលបានទិន្នផលទាប ពិសេសវិស័យកសិកម្មចូលរួមចំណែកក្នុងផលិតផលជាតិសរុបមានចំនួនទាបផងដែរ ។
ការរើបឡើងនៃតម្លៃកសិផលឆ្នាំនេះ ជាសញ្ញាល្អសម្រាប់ប្រជាកសិករ ប៉ុន្តែរាជរដ្ឋាភិបាលត្រូវធ្វើការឲ្យបានកាន់តែប្រសើរជាងនេះ ដើម្បីធ្វើឲ្យតម្លៃកសិផលប្រជាពលរដ្ឋកាន់តែប្រសើរ ។
លោកបន្តថា ៖« ការថមថយកម្លាំងពលកម្មក្នុងវិស័យនេះ មិនជាបញ្ហាអ្វីនោះទេ ព្រោះការប្រើប្រាស់គ្រឿងយន្តក្នុងវិស័យកសិកម្មកើនឡើង ប៉ុន្តែកសិកររបស់យើងភាគច្រើនធ្វើកសិកម្មខ្នាតតូច ។ ហេតុនេះ ដំណោះស្រាយ គឺសហគមន៍គួរចងក្រងគ្នាដើម្បីទិញគ្រឿងចក្រប្រើប្រាស់រួម » ៕
ចែករំលែកព័តមាននេះ