ប្រទេសកូរ៉េខាងជើង ៖ សហរដ្ឋអាមេរិកអះអាងជាថ្មីនាថ្ងៃទី៣០ វិច្ឆិកា ពីការគាបសង្កត់របស់ខ្លួនលើប្រទេសចិន ដើម្បីឱ្យចិនកាត់ផ្តាច់ការផ្គត់ផ្គង់ប្រេងកាតដល់កូរ៉េខាងជើង ក្រោយពីប្រទេសនេះបាញ់សាកមីស៊ីលរំលងទ្វីបថ្មី ក៏ប៉ុន្តែរុស្ស៊ីបានបរិហារពីការបង្កហេតុនានារបស់អាមេរិកសំដៅឱ្យលោកគីម ជុងអ៊ុន ខឹងច្រឡោត…
ប្រទេសកូរ៉េខាងជើង ៖ សហរដ្ឋអាមេរិកអះអាងជាថ្មីនាថ្ងៃទី៣០ វិច្ឆិកា ពីការគាបសង្កត់របស់ខ្លួនលើប្រទេសចិន ដើម្បីឱ្យចិនកាត់ផ្តាច់ការផ្គត់ផ្គង់ប្រេងកាតដល់កូរ៉េខាងជើង ក្រោយពីប្រទេសនេះបាញ់សាកមីស៊ីលរំលងទ្វីបថ្មី ក៏ប៉ុន្តែរុស្ស៊ីបានបរិហារពីការបង្កហេតុនានារបស់អាមេរិកសំដៅឱ្យលោកគីម ជុងអ៊ុន ខឹងច្រឡោត ។
ក្រោយការអំពាវនាវប្រហាក់ប្រហែលគ្នានេះដែររបស់លោកស្រី NIKKI HALEY នៅមុខក្រុមប្រឹក្សាសន្តិសុខ អ.ស.ប រដ្ឋមន្ត្រីការបរទេសអាមេរិកលោក REX TILLERSON ថ្លែងថា ខ្ញុំយល់ថា ចិនបានធ្វើអ្វីៗច្រើនរួចហើយ ក៏ប៉ុន្តែយើងក៏យល់ឃើញដែរថា ចិនអាចធ្វើអ្វីច្រើនទៀតជាមួយប្រេងកាត ។ យើងពិតជាស្នើដល់ចិនឱ្យកាត់ផ្តាច់ថែមទៀតការផ្តល់ប្រេង ។
លោកថា ផ្តាច់ការផ្គត់ផ្គង់ប្រេងជាអាវុធដ៏មានប្រសិទ្ធភាពបំផុត ដែលអាចទីបំផុតនាំកូរ៉េ
ខាងជើងមកកាន់តុចរចា ។
ដូចក្រោយការសាកល្បងមីស៊ីលបាលីស្ទិក ឬនុយក្លេអ៊ែរមួយលើកៗរបស់ក្រុងព្យុងយ៉ាងដែរ ក្រោយការបាញ់មីស៊ីលរំលងទ្វីបរបស់កូរ៉េខាងជើងកាលពីថ្ងៃទី២៩ វិច្ឆិកា ដែលតាមក្រុងព្យុងយ៉ាងថា មីស៊ីលនេះអាចវាយប្រហារគ្រប់កន្លែងនៃដែនដីអាេមរិក រដ្ឋការលោកដូណាល់ ត្រាំ បញ្ចេញប្រតិកម្មយ៉ាងខ្លាំង ។ ទោះបីយ៉ាងណា លោក REX TILLERSON នៅតែអះអាងថា ការជ្រើសរើសខាងការទូតនៅតែស្ថិតលើតុសម្រាប់ពេលនេះ ប៉ុន្តែលោកស្រី NIKKI HALEY គំរាមកម្ទេចកូរ៉េខាងជើងទាំងស្រុងក្នុងករណីមានសង្គ្រាម ។
ការអំពាវនាវរបស់អាមេរិកឱ្យមានទណ្ឌកម្មថ្មីៗ ដើម្បីឱ្យកូរ៉េខាងជើងកាន់តែឯកោថែមទៀតត្រូវបានក្រុងមូស្គូបដិសេធយ៉ាងម៉ឺងម៉ាត់ ហើយក្រុងប៉េកាំងធ្វើមិនដឹងមិនឮចំពោះការទាមទារឱ្យចិនផ្តាច់ទាំងស្រុងការផ្តល់ប្រេងដល់ក្រុងព្យុងយ៉ាងដែលអាចនាំគ្រោះថ្នាក់ខ្លាំងដល់ប្រទេសជិតខាងនោះ រួចនឹងញ៉ាំងឱ្យមានការរត់ភៀសខ្លួនយ៉ាងគំហុកចូលប្រទេសចិនរហូតដល់អាចមានអន្តរាគមន៍យោធាអាមេរិកនៅព្រំដែនចិនផង ៕
ចែករំលែកព័តមាននេះ