លោកស្រីនាយករដ្ឋមន្ត្រីបង់ក្លាដែស នឹងមកបំពេញទស្សនកិច្ច៣ថ្ងៃនៅកម្ពុជា
- ភ្នំពេញ
រាជធានីភ្នំពេញ ៖ តាមការអញ្ជើញរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកជំទាវ សេក្ខ ហាស៊ីណា (Sheikh…
រាជធានីភ្នំពេញ ៖ តាមការអញ្ជើញរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកជំទាវ សេក្ខ ហាស៊ីណា (Sheikh Hasina) នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដែស នឹងដឹកនាំគណៈប្រតិភូអញ្ជើញមកបំពេញទស្សនកិច្ចផ្លូវការ នៅព្រះរាជាណាចក្រកម្ពុជា ពីថ្ងៃទី ០៣ ដល់ថ្ងៃទី ០៥ ខែធ្នូ ឆ្នាំ២០១៧ ។
ក្នុងអំឡុងពេលទស្សនកិច្ច លោកជំទាវ សេក្ខ ហាស៊ីណា នឹងចូលក្រាបបង្គំគាល់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង ។ លោកជំទាវ ក៏នឹងចូលជួបសម្តែងការគួរសមដាច់ដោយឡែកពីគ្នាជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា ហើយនឹងមានជំនួបទ្វេភាគីជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផងដែរ។ បន្ទាប់មក នាយករដ្ឋមន្ដ្រីទាំងពីរ នឹងអញ្ជើញធ្វើជាអធិបតីក្នុងពិធីចុះហត្ថលេខាលើឯកសារសហប្រតិបត្តិការមួយចំនួន និងបន្តដោយការប្រកាសព័ត៌មានរួមគ្នា។
លោកជំទាវ សេក្ខ ហាស៊ីណា ក្នុងអំឡុងពេលស្នាក់នៅប្រទេសកម្ពុជានឹងអញ្ជើញដាក់កម្រងផ្កានៅវិមានឯករាជ្យ គោរពវិញ្ញាណក្ខន្ធវីរបុរស-វីរនារីកម្ពុជា ដែលបានពលីក្នុងសង្គ្រាម គោរពព្រះវិញ្ញាណក្ខន្ធអតីតព្រះមហាក្សត្រកម្ពុជា ព្រះករុណាព្រះបាទសម្ដេចព្រះនរោត្ដម សីហនុ ព្រះបរមរតនកោដ្ឋ ទស្សនាសារមន្ទីរប្រល័យពូជសាសន៍ទួលស្លែង និងចូលរួមជាអធិបតីក្នុងកិច្ចសន្ទនាធុរកិច្ច រៀបចំដោយសភាពាណិជ្ជកម្មកម្ពុជា ។
គួរកត់សម្គាល់ផងដែរថា លោកជំទាវ សេក្ខ ហាស៊ីណា នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដែស ធ្លាប់បានបំពេញទស្សនកិច្ចផ្លូវការលើកទីមួយ នៅកម្ពុជា ស្របពេលនៃការចូលរួមរបស់លោកជំទាវ ក្នុងសន្និសីទសមាគមសភាអាស៊ីសម្រាប់សន្តិភាព នៅទីក្រុងភ្នំពេញ កាលពីខែមករា ឆ្នាំ២០០១។ ដំណើរទស្សនកិច្ចផ្លូវការរបស់លោកជំទាវ សេក្ខ ហាស៊ីណា នៅព្រះរាជាណាចក្រកម្ពុជា ឆ្លុះបញ្ចាំងពីការពង្រឹងចំណងមិត្តភាព ដែលប្រទេសទាំងពីរបានថែរក្សាជាច្រើនឆ្នាំកន្លងមក និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការទ្វេភាគីដែលមានស្រាប់រវាងកម្ពុជា និងបង់ក្លាដែស។
ចែករំលែកព័តមាននេះ