ប្រទេសកូរ៉េខាងជើង ៖ មេដឹកនាំកូរ៉េខាងជើង លោកគីម ជុងអ៊ុន ថ្លែងនាថ្ងៃទី២៩ វិច្ឆិកា ថា ប្រទេសរបស់លោកក្លាយជារដ្ឋនុយក្លេអ៊ែរពេញសិទ្ធិ ក្រោយការសាកល្បងប្រកបដោយជោគជ័យមីស៊ីលប្រភេទថ្មីមួយដែលអាចវាយប្រហារទីណាក៏បានលើទ្វីបអាមេរិក ។
ការបាញ់សាកមីស៊ីលរំលងទ្វីបថ្មីរបស់កូរ៉េខាងជើងនេះជាការផ្គើនថ្មីដល់ប្រធានាធិបតីអាមេរិក លោកដូណាល់ ត្រាំ ដែលធ្លាប់អះអាងថា ការអភិវឌ្ឍន៍សមត្ថភាពបែបនេះនឹងទៅពុំរួចឡើយ ។
ពិធីការិនីទូរទស្សន៍កូរ៉េខាងជើង លោកស្រី RI CHUN HEE បានប្រកាសជាផ្លូវការពីជោគជ័យនៃការបាញ់សាកមីស៊ីលនេះ ។ លោកស្រីនិយាយថា លោកគីម ជុងអ៊ុន ប្រកាសដោយមោទនភាពថា ទីបំផុតយើងសម្រេចបាន ហើយមហាបុព្វហេតុជាប្រវត្តិសាស្ត្ររបស់យើងគឺបង្ហើយដល់ការបង្កើតកងកម្លាំងនុយក្លេអ៊ែររបស់រដ្ឋ ផលិតមីស៊ីលបាលីស្ទិកដ៏ខ្លាំងក្លាមួយ ។ មហាជ័យជម្នះនៃការសាកល្បងមីស៊ីលបាលីស្ទិករំលងទ្វីប ICBM ធុន HWASONG-15 ជាជ័យជម្នះមួយដែលពុំអាចកាត់ថ្លៃបាន ដែលមហាវីរៈប្រជាជនកូរ៉េខាងជើងដណ្តើមបាន ។
សារព័ត៌មានផ្លូវការកូរ៉េខាងជើងនិយាយពីអាវុធដែលទំនើបបំផុតមកទល់ពេលនេះ ។ ទីភ្នាក់ងារព័ត៌មានរដ្ឋ KCNA និយាយថា ប្រព័ន្ធអាវុធ ICBM HWASONG-15 គឺជាមីស៊ីលរំលងទ្វីបមួយបំពាក់ដោយក្បាលគ្រាប់យ៉ាងធំមួយអាចវាយប្រហារទ្វីបអាមេរិកទាំង
មូល ។
យោងតាមក្រុងព្យុងយ៉ាងថា មីស៊ីលថ្មីនេះរត់ដល់កម្ពស់៤.៤៧៥គីឡូម៉ែត្រ មុនពេលធ្លាក់ក្នុងចម្ងាយ៩៥០គីឡូម៉ែត្រ ពីទីតាំងបាញ់ចេញ ។
អ្នកឯកទេសលោកខាងលិចម្នាក់យល់ថា នេះជាចម្ងាយរត់បញ្ឈរតែចម្ងាយរត់ពិតប្រាកដរបស់វាអាចដល់ចម្ងាយ១៣.០០០គីឡូម៉ែត្រ ជាចម្ងាយឆ្ងាយបំផុតអាចបាញ់ដល់ទីក្រុងសំខាន់ៗរបស់សហរដ្ឋអាមេរិក ។
វាជាការសាកល្បងមីស៊ីលរំលងទ្វីប ICBM លើកទី៣របស់កូរ៉េខាងជើង ដែលអ្នកជំនាញការខាងត្រួតពិនិត្យគ្រឿងសព្វាវុធ លោក DAVID WRIGHT យល់ថា មីស៊ីលបែបនេះអាចបាញ់ដល់រដ្ឋធានីវ៉ាស៊ីនតោន និងគ្រប់ផ្នែកនៃដែនដីសហរដ្ឋអាមេរិក ។
ចំណែកលោក JEFFREY LEWIS អ្នកឯកទេសនៃវិទ្យាសាស្ត្រសិក្សាយុទ្ធសាស្ត្រមួយ
និយាយថា គេមិនចូលចិត្តបែបនេះឡើយ ក៏ប៉ុន្តែគេត្រូវរៀនរស់នៅជាមួយសមត្ថភាពរបស់កូរ៉េខាងជើង ដែលអាចវាយប្រហារសហរដ្ឋអាមេរិកជាមួយអាវុធនុយក្លេអ៊ែរ ៕
ចែករំលែកព័តមាននេះ