ខេត្តកំពត ៖ ឆ្នាំនេះ ស្រូវដាក់គ្រាប់ល្អណាស់ ពិតជាទទួលបានទិន្នផលខ្ពស់ ព្រោះរដូវវស្សាមានរយៈពេលយូរ និងមានភ្លៀងធ្លាក់ពាសពេញក្របខ័ណ្ឌទូទាំងប្រទេស ។ ទោះបីយ៉ាងណា ខណៈរដូវច្រូតកាត់ចូលមកដល់ ស្រូវទុំលឿងពេញស្រែ បែរជាកសិករកំពុងកើតទុក្ខទៅវិញ ព្រោះខ្វះខាតកម្លាំងធ្វើការងារ ស្របពេលភ្លៀងនៅតែបន្ដធ្លាក់ធ្វើឲ្យស្រូវរបស់ពួកគាត់ដួលរាបដល់ដី ។
អ្នកស្រី សុខ ត្រេន កសិកររស់នៅភូមិតាដិប សង្កាត់អណ្ដូងខ្មែរ ក្រុងកំពត បានប្រាប់ថា ដោយសារតែអ្នកនៅក្នុងភូមិភាគច្រើនសុទ្ធតែទៅធ្វើការនៅរោងចក្រ និងចំណាកស្រុកទៅប្រទេសគេចង់ស្ងាត់ភូមិទៅហើយ នៅពេលដល់រដូវច្រូតកាត់ម្ដងៗ គឺពិបាករកអ្នកមកច្រូតណាស់ ព្រោះមានតែមនុស្សចាស់ៗដែលគាត់មិនសូវមានកម្លាំង ហើយជាប់មើលថែចៅៗទៀត ។ អ្នកស្រីថា ៖« សព្វថ្ងៃនេះ មនុស្សចាស់មានកូនខ្ចីអស់ហើយ នៅតាមផ្ទះនីមួយៗភាគច្រើនមានកូនតូចឲ្យរហង់ » ។
អ្នកស្រីបន្ដទៀតថា ៖« រាល់ថ្ងៃនេះ មិនងាយរកអ្នកច្រូតបានទេ អ្នកមានកម្លាំងល្មមៗគេទៅធ្វើការរោងចក្រអស់ហើយ ហើយអ្នកដែលនៅ សុទ្ធតែចាស់ៗ និងមានចៅនៅជាប់ខ្លួនទៀត បើសិនជាស្រែនោះគ្រឿងយន្ដអាចចូលបាន ចេះតែជួលគេទៅ តែបើស្រែមានទឹកវិញ គឺមានតែច្រូតដៃ ។ ទោះបីយ៉ាងណា ក៏ត្រូវតែស្វះស្វែងរកដែរ គឺជួលគេច្រូតក្នុង១ថ្ងៃ២ម៉ឺនរៀល ឬក៏ច្រូតប្រវាស់ដៃគ្នា » ។
កញ្ញា ចាន់ បុប្ផា រស់នៅក្នុងភូមិឃុំខាងលើបានឲ្យដឹងដែរថា សព្វថ្ងៃនេះ ពិបាករកមនុស្សមកច្រូតណាស់ ហើយបើរកបាន ក៏គេយកថ្លៃដែរ ។ កញ្ញាថា ៖« ឥឡូវ ដោយសារម្នាក់ៗទៅធ្វើការរោងចក្រអស់ អ្នកនៅស្រែកំពុងខ្វះខាតកម្លាំងច្រូត ហើយបើមានអ្នកទំនេរ ក៏គេយកថ្លៃដែរ ។ ដូច្នេះ ទើបខ្ញុំហៅម៉ាស៊ីនមកច្រូត ព្រោះវាលឿន ងាយស្រួល និងតម្លៃសមរម្យ » ។
កញ្ញាបានបន្តថា ៖« សម្រាប់ម៉ាស៊ីន គឺចាប់ពីកន្លះហិកតាឡើងទៅ ទើបគេច្រូតឲ្យ ហើយក្នុង១ហិកតា តម្លៃ៤០ម៉ឺនរៀល តែបើសិនជាយើងជួលគេច្រូតដៃវិញ ក្នុង១ថ្ងៃ២ម៉ឺនឡើងទៅ និងចំណាយពេលយូរថ្ងៃ ហើយពិបាកបញ្ជូនទុកដាក់ទៀត ។ ជាក់ស្ដែង ដូចជាមេឃភ្លៀងអីចឹង បើយើងជញ្ជូនមិនទាន់ទេ អាចខូចកណ្ដាប់ស្រូវយើងទៀត » ។ បច្ចុប្បន្ន ការប្រើប្រាស់កម្លាំងពលកម្មមនុស្សក្នុងវិស័យកសិកម្ម ហាក់ធ្លាក់ចុះយ៉ាងខ្លាំង ខណៈការប្រើប្រាស់គ្រឿងយន្តបានកើនឡើងក្នុងវិស័យមួយនេះ ។
រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ លោក វេង សាខុន ក៏បានលើកឡើងដែរថា បច្ចុប្បន្ន កម្លាំងពលកម្មក្នុងវិស័យកសិកម្មបានធ្លាក់មកនៅត្រឹមតែ៤២% ខណៈឆ្នាំ១៩៩៣កម្ពុជាមានកម្លាំងពលកម្មលើវិស័យនេះជាង៨០%ឯណោះ ។ លោករដ្ឋមន្ត្រីកសិកម្មបញ្ជាក់ថា កម្លាំងពលកម្មក្នុងវិស័យកសិកម្មនឹងធ្លាក់បន្តទៀត ដែលតាមការព្យាករនឹងធ្លាក់នៅ២៩%នៅឆ្នាំ២០២០ ដោយជំនួសមកវិញនូវការប្រើប្រាស់កម្លាំងគ្រឿងយន្ត ។
យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការបង្កបង្កើនស្រូវវស្សាបានបញ្ចប់ដោយសម្រេចបាន១០៦,៤៥%នៃផែនការ២.៤៩៦.៧៩០ហិកតា ក្នុងនោះការប្រើប្រាស់គ្រឿងយន្តសម្រាប់ផលិតកម្មកសិកម្ម ស្មើនឹង៩៣,៧៣% ធៀបនឹងការប្រើប្រាស់គោក្របី មានតែ៦,២៧%ប៉ុណ្ណោះ ៕
ចែករំលែកព័តមាននេះ