ទីក្រុងបាងកក ៖ បណ្តាញការពារឧបទ្ទវហេតុបានឲ្យដឹងថា អត្រាអ្នកបាត់បង់ជីវិតដោយសារគ្រោះថ្នាក់ចរាចរណ៍ដ៏ខ្ពស់ក្នុងប្រទេសថៃ កំពុងតែប៉ះពាល់ដល់សេដ្ឋកិច្ចជាតិ ដោយមានមនុស្សប្រមាណ៦១នាក់ជាមធ្យមបានស្លាប់ជារៀងរាល់ថ្ងៃ ។ នាយកបណ្តាញ លោក Phrommin…
ទីក្រុងបាងកក ៖ បណ្តាញការពារឧបទ្ទវហេតុបានឲ្យដឹងថា អត្រាអ្នកបាត់បង់ជីវិតដោយសារគ្រោះថ្នាក់ចរាចរណ៍ដ៏ខ្ពស់ក្នុងប្រទេសថៃ កំពុងតែប៉ះពាល់ដល់សេដ្ឋកិច្ចជាតិ ដោយមានមនុស្សប្រមាណ៦១នាក់ជាមធ្យមបានស្លាប់ជារៀងរាល់ថ្ងៃ ។
នាយកបណ្តាញ លោក Phrommin Kanthiya បាននិយាយកាលពីថ្ងៃពុធថា ទិន្នន័យខាងលើបានទាញចេញពីមនុស្សចំនួន២២.៣៥៦នាក់ ដែលបានស្លាប់ដោយសារគ្រោះថ្នាក់ចរាចរណ៍កាលពីឆ្នាំ២០១៦ កន្លងមក ។
លើសពីនេះ មានមនុស្សជាង៥ពាន់នាក់បានក្លាយជាជនពិការ ព្រោះតែគ្រោះថ្នាក់ចរាចរណ៍នាពេលថ្មីៗនេះ ។ នាយកបណ្តាញបន្តថា វាអាចនឹងធ្វើឲ្យសេដ្ឋកិច្ចថៃបាត់បង់ថវិការាប់លានដុល្លារក្នុង១ឆ្នាំ ។ វាកើតមានឡើង ខណៈរដ្ឋាភិបាលពិបាកជំរុញឲ្យសេដ្ឋកិច្ចលូតលាស់ផងដែរ ។
ក្នុងកិច្ចប្រជុំមួយក្នុងខេត្ត Nan ជាមួយក្រុមដទៃទៀតដែលធ្វើយុទ្ធនាការកាត់បន្ថយអត្រាអ្នកស្លាប់ដោយគ្រោះថ្នាក់ចរាចរណ៍ លោក Phrommin បានលើកឡើងថា រដ្ឋាភិបាល និងវិស័យឯកជនមិនអាចកាត់បន្ថយអត្រានេះបានដោយគ្មានជំនួយទេ ហើយសហគមន៍ក្នុងស្រុកក៏ត្រូវតែធ្វើយុទ្ធនាការដែរ ។ សហគមន៍មានសារសំខាន់ណាស់ ព្រោះពួកគេនៅជិតបញ្ហា មិនថាវាជាបញ្ហាអ្វីទេ ។
ជំនួយការអភិបាលខេត្ត Phiphat Prachankhet បាននិយាយថា ខណៈរដ្ឋាភិបាលអាចអភិវឌ្ឍន៍ផ្លូវឲ្យប្រសើរឡើងដើម្បីកាត់បន្ថយគ្រោះថ្នាក់ចរាចរណ៍ ពលរដ្ឋក្នុងតំបន់ ក៏ត្រូវតែយល់ដឹងពីសុវត្ថិភាពក្នុងការធ្វើដំណើរផងដែរ ។ វាជាចំណុចដ៏សំខាន់ ដើម្បីចៀសវាងកើតមានគ្រោះថ្នាក់ក្នុងពេលបើកបរ ៕
ចែករំលែកព័តមាននេះ