សហរដ្ឋអាមេរិក-ប្រទេសកូរ៉េខាងជើង ៖ ប្រធានាធិបតីអាមេរិកលោកដូណាល់ ត្រាំ ប្រកាសកាលពីថ្ងៃទី២០ វិច្ឆិកា ថា សហរដ្ឋអាមេរិកសម្រេចបញ្ចូលជាថ្មីប្រទេសកូរ៉េខាងជើងទៅក្នុងបញ្ជីខ្មៅរបស់ខ្លួននៃបណ្តារដ្ឋដែលជួយទ្រទ្រង់ដល់ភេរវកម្ម ដើម្បីបង្កើនការគាបសង្កត់ប្រឆាំងកម្មវិធីនុយក្លេអ៊ែររបស់ប្រទេសនេះ ។
នេះជាដំណាក់កាលថ្មីមួយនៃការកើនឡើងភាពតានតឹងរវាងប្រទេសទាំង២ ។ លោកត្រាំ បន្តថា បន្ថែមលើការគំរាមកំហែងពិភពលោកដោយអាវុធនុយក្លេអ៊ែរ កូរ៉េខាងជើងបានជួយទ្រទ្រង់ផ្ទួនៗដល់បណ្តាអំពើភេរវកម្មអន្តរជាតិ ក្នុងនោះរួមមានការធ្វើឃាតមនុស្សនៅដែនដីបរទេសជាដើម ។ លោកក៏រំលឹកដែរពីករណីនិស្សិតអាមេរិកយុវជន OTTO WARMBIER ដែលក្រុងព្យុងយ៉ាងឃុំឃាំង ហើយស្លាប់កាលពីខែមិថុនា ក្រោយការធ្វើមាតុភូមិនិវត្តន៍ក្នុងសភាពសន្លប់មិនដឹងខ្លួន ។
ហេតុផលសំខាន់មួយក្នុងចំណោមហេតុផលសំខាន់ៗនៃការសម្រេចបែបនេះគឺការសម្លាប់លោកគីម ជុងណាម បងប្រុសម្តាយទីទៃរបស់មេដឹកនាំកូរ៉េខាងជើងលោកគីម ជុងអ៊ុន ដោយសារធាតុគីមីពុលយ៉ាងសាហាវបំផុតមួយកាលពីខែកុម្ភៈនៅម៉ាឡេស៊ី សង្ស័យជាអំពើនៃរបបកូរ៉េខាងជើង ។
ដូច្នេះរបបលោកគីម ជុងអ៊ុន ត្រូវចូលក្នុងបញ្ជីខ្មៅនេះជាមួយអ៊ីរ៉ង់ និងស៊ីរី ជាគូសត្រូវ
សំខាន់២ទៀតរបស់ក្រុងវ៉ាស៊ីនតោន ខណៈប្រទេសស៊ូដង់កាន់តែទទួលបានការសម្រាលរបស់អាមេរិក ។
ក្រុងព្យុងយ៉ាងធ្លាប់ស្ថិតក្នុងបញ្ជីខ្មៅនេះរួចម្តងហើយពីឆ្នាំ១៩៨៨ ទៅ២០០៨មកពីការសង្ស័យថា ចូលរួមក្នុងការវាយប្រហារដោយគ្រាប់បែកប្រឆាំងយន្តហោះកូរ៉េខាងត្បូងមួយគ្រឿង បណ្តាលឱ្យមនុស្សស្លាប់១១៥នាក់ កាលពីឆ្នាំ១៩៨៧ ។ រដ្ឋការលោកចច ដាប់ប៊លយូប៊ូស បានដកកូរ៉េខាងជើងចេញពីបញ្ជីខ្មៅនេះវិញ ដើម្បីសម្រួលដល់ការចរចានុយក្លេអ៊ែរ ដែលទីបំផុតត្រូវជាប់គាំង ៕
ចែករំលែកព័តមាននេះ