ខេត្តកំពត ៖ នៅព្រឹកថ្ងៃទី១៧ ខែវិច្ឆិកា ឆ្នាំ២០១៧នេះ ប្រតិភូអគ្គលេខាធិការរងក្រុមប្រឹក្សានៃអង្គចៅក្រម៣រូប បានអញ្ជើញជាអធិបតីជួបប្រជុំពិភាក្សា និងសំណេះសំណាលសួរសុខទុក្ខដល់តំណាងអយ្យការអមសាលាដំបូងខេត្តកំពត។ ប្រតិភូក្រុមប្រឹក្សានៃអង្គចៅក្រមដែលអញ្ជើញជាអធិបតីក្នុងអង្គប្រ ជុំទាំង៣រូប នៅតុលាខេត្តកំពតនាព្រឹកនេះមាន ឯកឧត្ដម អ៊ុំ សារិទ្ធ សមាជិកឧត្តមក្រុមប្រឹក្សានៃអង្គចៅក្រមជា (ប្រធានប្រតិភូ) ឯកឧត្ដម ប្លង់ ឆ្លាម សមាជិកឧត្តមក្រុមប្រឹក្សានៃអង្គចៅក្រម, ឯកឧត្ដម អ៊ុង សុភារិន្ទ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សានៃអង្គចៅក្រម និងវត្តមានជាកិត្តិយស ឯកឧត្ដម ឯក ឆេងហ៊ួត ព្រះរាជអាជ្ញាអមសាលាដំបូងខេត្ត លោក ឡុង កេសភិរម្យ ប្រធានសាលាដំបូងខេត្ត លោក គឹម រ៉ាវី អនុប្រធានតុលាការខេត្ត លោកស្រីចៅក្រម និងព្រះរាជអាជ្ញារងនៃសាលាដំបូងខេត្ត លោកម៉ាន់ បូរ៉េត លេខាធិការដ្ឋានសាលាដំបូងខេត្ត រួមនិងលោក លោកស្រី ជាក្រឡាបញ្ជី និងមន្ត្រីបម្រើការងារក្នុងសាលាដំបូងខេត្តជាច្រើនរូបទៀតបានចូលរួមក្នុងកម្មវិធីជួបសំណេះសំណាលសួរសុខទុក្ខពីសំណាក់ប្រតិភូសមាជិកអគ្គលេខាធិការក្រុមប្រឹក្សានៃអង្គចៅក្រមនាពេលព្រឹកនេះផងដែរ។
បន្ទាប់ពីលោក ម៉ាន់ បូរ៉េត លេខាធិការដ្ឋានសាលាដំបូងខេត្តធ្វើរបាយការណ៍ជូនប្រតិភូជាគណអធិបតីអំពីកិច្ចការសំខាន់ៗនៃការអនុវត្តន៍នីតិវិធីនៅក្នុងប្រព័ន្ធតុលាការខេត្តកំពតនាពេលកន្លងមក ក៏ដូចជាបច្ចុប្បន្ននេះដែររួចមក លោក គឹម រ៉ាវី អនុប្រធានតុលាការបានលើកឡើងនូវបញ្ហាមួយចំនួនជុំវិញការអនុវត្តន៍កិច្ចការច្បាប់តាមនីតិវិធីនាពេលកន្លងមក ក៏ដូចជាបច្ចុប្បន្ននេះដែរ ជម្រាបជូនប្រតិភូថ្នាក់ដឹកនាំ ដែលជាសមាជិកក្រុមប្រឹក្សានៃអង្គចៅក្រមដើម្បីបានស្វែងយល់ពីការអនុវត្តតាមនីតិវិធីច្បាប់នាពេលកន្លងមកនៅក្នុងស្ថាបន័តុលាការ បម្រើជូនប្រជាពល រដ្ឋនៅទូទាំងខេត្តកំពត។ ក្នុងនោះលោកបានគូសបញ្ជាក់អំពីការងាយស្រួលនិងកិច្ចការដែលប្រឈមក្នុងការអនុវត្តនីតិវិធីច្បាប់ផងដែរ។ ឯកឧត្ដម ឯក ឆេងហ៊ួត ព្រះរាជអាជ្ញាអមសាលាដំបូងខេត្ត បានថ្លែងការកោតសរសើរ និងថ្លែងអំណរគុណដ៏ជ្រាលជ្រៅបំផុត ចំពោះប្រតិភូថ្នាក់ដឹកនាំកំពូលស្ថាបន័តុលាការ ដែលថ្ងៃនេះមានវត្តមានដ៏ឧត្តង្គឧត្តមបានចុះមកពង្រឹងកិច្ចការផ្ទៃក្នុងតុលាក្នុងការអនុវត្តនីតិវិធីច្បាប់ និងស្តាប់សំណូមពរពីការលំបាក និងការងាយស្រួលក្នុងការអនុវត្តច្បាប់របស់ប្រព័ន្ធតុលាការថ្នាក់ក្រោម ជាពិសេសខេត្តដែល ឯកឧត្ដម ប្រតិភូអញ្ជើញជាអធិបតីស្វែងយល់នាថ្ងៃនេះគឺខេត្តកំពតយើងខ្ញុំតែម្តង។
ជាមួយគ្នានេះដែរជុំវិញបញ្ហាប្រឈម និងការអនុវត្តច្បាប់នាពេលកន្លងមក ដែលប្រធានតុលាការ និងលេខាធិការដ្ឋានសាលាដំបូងខេត្តបានលើកឡើង និងធ្វើសំណូមពរ សូមឯកឧ ត្ដមប្រតិភូតំណាងឲ្យស្ថាបន័តុលាការកំពូល មេត្តាសុំជួយចាប់អារម្មណ៍លើបញ្ហាសំណូមពររបស់តុលាការថ្នាក់ក្រោមផង ដូចជាបញ្ហារឿងទំនាស់ដីធ្លី ជាករណីមួយមានភាពស្មុគស្មាញច្រើន ហើយករណីនេះភាគច្រើនគឺពាក់ព័ន្ធនឹងអាជ្ញាធរនៅមូលដ្ឋានមួយចំនួន ហើយការទំនាក់ទំនងជាមួយនគរបាលយុត្តិធម៌ក៏មានការប្រឈមខ្លះៗដែរ ដោយមានហេតុការកើតឡើង ការកសាងសំណុំរឿង នៅមានភាពយឺតយ៉ាវជាដើម។ លទ្ធផលនៃការសំណេះសំណាលដល់ស្ថាបន័តុលាការថ្នាក់ក្រោមនៅខេត្តកំពតនាពេលនេះគឺមានការបកស្រាយនូវរាល់សំណូមពរនានាដែលតុលាការ ខេត្តបានអនុវត្តនីតិវិធីហើយមានការប្រឈមខ្លះៗ នាពេលកន្លងមក ដោយឯកឧត្ដម ប្រតិភូក្រុមប្រឹក្សានៃ អង្គចៅក្រមបានធ្វើការបកស្រាយយ៉ាងច្បាស់នូវរាល់សំណូមពរខាងលើ និងបានបញ្ជាក់យ៉ាងច្បាស់នូវរាល់ខ្លឹមសារ និងអត្ថន័យដ៏មានសារៈសំខាន់ និងជ្រាលជ្រៅបំផុត។ ហើយរាល់ការបកស្រាយតាមសំណូមពរខាងលើ បានធ្វើឲ្យមន្ត្រីផ្នែកអនុវត្តច្បាប់ទាំងអស់នៅក្នុងប្រព័ន្ធតុលាការខេត្តកំពតកាន់តែមានការយល់ដឹងខ្ពស់នូវផ្នែកអនុវត្តតាមនីតិវិធីច្បាប់បន្តទៅទៀតផងដែរ៕
ចែករំលែកព័តមាននេះ