ខេត្តកំពត-កែប ៖ មួយរយៈចុងក្រោយនេះ ភ្ញៀវទេសចរបរទេស ជាពិសេសភ្ញៀវទេសចរភ្នែកប្រាក់ បាននិងកំពុងសម្រុកមកកម្សាន្តនៅខេត្តមាត់សមុទ្រ កំពត និងកែប បន្ទាប់ពីកត់សម្គាល់ឃើញថា ភ្ញៀវបរទេស…
ខេត្តកំពត-កែប ៖ មួយរយៈចុងក្រោយនេះ ភ្ញៀវទេសចរបរទេស ជាពិសេសភ្ញៀវទេសចរភ្នែកប្រាក់ បាននិងកំពុងសម្រុកមកកម្សាន្តនៅខេត្តមាត់សមុទ្រ កំពត និងកែប បន្ទាប់ពីកត់សម្គាល់ឃើញថា ភ្ញៀវបរទេស និងវិនិយោគិនចិនកំពុងក្តោបក្តាប់ខេត្តព្រះសីហនុ។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់កោះសន្តិភាពតាមទូរស័ព្ទនាថ្ងៃទី១៦ វិច្ឆិកា ថា ដោយសារខេត្តកំពតសម្បូរកន្លែងទេសចរណ៍បែបធម្មជាតិ និងវប្បធម៌ច្រើន ទើបធ្វើឲ្យខេត្តមួយនេះទាក់ទាញភ្ញៀវជាតិ និងអន្តរជាតិ ជាពិសេស ភ្ញៀវទេសចរមកពីអឺរ៉ុប និងអាមេរិក ។
លោកប្រធានមន្ទីរទេសចរណ៍បញ្ជាក់ថា ៖«សម្រាប់ខេត្តកំពត កំពុងទាក់ទាញភ្ញៀវទេសចរអន្តរជាតិកាន់តែខ្លាំងឡើងៗពីមួយឆ្នាំទៅមួយឆ្នាំ ជាពិសេស ចំនួនភ្ញៀវទេសចរអន្តរជាតិមកពីប៉ែកអឺរ៉ុបចាប់អារម្មណ៍មកកម្សាន្តនៅខេត្តកំពត និងកែបជាហូរហែ បន្ទាប់ពីខេត្តទាំងពីរនេះមានការអភិវឌ្ឍខ្លាំងលើវិស័យទេសចរណ៍ » ។
លោក សយ ស៊ីណុល បន្តថា សម្រាប់រយៈពេល១០ខែ ឆ្នាំ២០១៧នេះ មានភ្ញៀវសរុបចំនួន១.៣១៦.២៦០នាក់ ក្នុងនោះទេសចរក្នុងស្រុក១.១៧៨.៧០៦នាក់ និងភ្ញៀវអន្តរជាតិ១៣៧.៥៥៤នាក់ ។ បើធៀបនឹងរយៈពេលដូចគ្នាឆ្នាំ២០១៦ គឺកើនឡើង០,៧៧% ។
លោកបន្ថែមថា មូលហេតុដែលភ្ញៀវងាកមកកម្សាន្តនៅខេត្តកំពត ដោយសារខេត្តនេះសម្បូរកន្លែងទេសចរណ៍ធម្មជាតិ និងវប្បធម៌ ដែលខេត្តផ្សេងកម្រនឹងមានណាស់ ជាពិសេស សន្តិសុខ និងសុវត្ថិភាព ដែលភ្ញៀវបានមកកម្សាន្តហើយមានទំនុកចិត្ត ។
ទន្ទឹមនឹងចំនួនភ្ញៀវទេសចរនៅក្នុងខេត្តកំពតកើនឡើង ក្នុងនោះខេត្តកែប ក៏មិនចាញ់គ្នាប៉ុន្មានដែរ ប៉ុន្តែនៅចុងឆ្នាំ២០១៧ ខេត្តមួយនេះហាក់ធ្លាក់ចុះភ្ញៀវទេសចរបន្តិច ដោយសារមួយរយៈចុងក្រោយនេះ ភ្ញៀវអន្តរជាតិបានទៅកម្សាន្តនៅរាជធានីភ្នំពេញ និងតាមបណ្ដាខេត្តនានា ជាពិសេស ក្នុងអំឡុងពេលបុណ្យអុំទូក ។
លោក ប៉ុក ទាំង អនុប្រធានមន្ទីរទេសចរណ៍ខេត្តកែប មានប្រសាសន៍ថា ១០ខែចុងក្រោយនេះ ចំនួនភ្ញៀវទេសចរមកកម្សាន្តនៅខេត្តកែបបានកើនឡើង ប៉ុន្តែភ្ញៀវអន្តរជាតិវិញថយចុះបន្តិច ដោយសារការរៀបចំពិធីបុណ្យអុំទូកនៅរាជធានីភ្នំពេញ ទើបទាក់ទាញភ្ញៀវទេសចរបរទេសទៅកម្សាន្តច្រើនជាងខេត្តកែប ។
លោកបញ្ជាក់ថា ក្នុងរយៈពេល១០ខែ ឆ្នាំ២០១៧នេះ ភ្ញៀវមកទស្សនាខេត្តកែបសរុបចំនួន៩៣៤.៨១០នាក់ ក្នុងនោះភ្ញៀវអន្តរជាតិ៣៩.២៦២នាក់ ស្មើ១៣% បើធៀបនឹងឆ្នាំ២០១៦ គឺថយចុះ ។ ដោយឡែក សម្រាប់បុណ្យសមុទ្រដែលនឹងខិតជិតមកដល់នេះ ខេត្តកែបរំពឹងថា នឹងមានភ្ញៀវមកទស្សនារាប់លាននាក់ក្នុងមហាព្រឹត្តិការណ៍មួយនេះ ។
លោក សោម ពិសិដ្ឋ អភិបាលរងនៃគណៈអភិបាលខេត្តកែប ធ្លាប់បានមានប្រសាសន៍ថា កម្មវិធីបុណ្យសមុទ្រនៅខេត្តកែប ដែលនឹងប្រព្រឹត្តទៅចាប់ពីថ្ងៃទី២២-២៤ ធ្នូ ឆ្នាំ២០១៧ ហើយរំពឹងថា នឹងមានមនុស្សមកកម្សាន្ដចូលខ្ទង់លាននាក់ ព្រោះមានកម្មវិធីជាច្រើនដូចជា ការសម្តែងសិល្បៈ របាំ កីឡាលើខ្សាច់ លើទឹក និងមានល្បែងជាច្រើនប្រភេទទៀត ជាពិសេស ខេត្តនេះមានសុវត្ថិភាព សន្តិសុខសង្គម ការអភិវឌ្ឍវិស័យទេសចរណ៍ បរិស្ថាន និងហេដ្ឋារចនាសម្ព័ន្ធ ក៏ដូចជាសក្តានុពលច្រើនទាំងក្នុងទឹក និងលើគោក ។
គួររំឭកថា តួលេខទូទាំងប្រទេស ក្នុងរយៈពេល៩ខែឆ្នាំ២០១៧នេះ កម្ពុជាទទួលបានទេសចរអន្តរជាតិចំនួន៤.៥២២.៣៨៣នាក់ កើនឡើង១២% ធៀបនឹងរយៈពេលដូចគ្នាឆ្នាំ២០១៦ ក្នុងនោះតំបន់ឆ្នេរទទួលបាន ៥៥៤.៦១៣នាក់ កើនឡើង១៥,៧%។ ជាចក្ខុវិស័យឆ្នាំ២០២០ កម្ពុជារំពឹងទទួលបានទេសចរអន្តរជាតិប្រមាណ៧លាននាក់ ដោយនាំចំណូលចូលជាតិប្រមាណ៥ពាន់លានដុល្លារ និងបង្កើតការងារផ្ទាល់ជិត១លាននាក់៕
ចែករំលែកព័តមាននេះ