រាជធានីភ្នំពេញ ៖ ការប្រើប្រាស់ថង់ប្លាស្ទិកនៅតែចោទជាបញ្ហានៅកម្ពុជា ដោយសារតែតម្រូវការក្នុងការវេចខ្ចប់សម្ភារនានា មានចំនួនច្រើនគួរឱ្យព្រួយបារម្ភ ។ អង្គការ Fondazione ACRA កាលពីចុងឆ្នាំ២០១៦កន្លងទៅ…
រាជធានីភ្នំពេញ ៖ ការប្រើប្រាស់ថង់ប្លាស្ទិកនៅតែចោទជាបញ្ហានៅកម្ពុជា ដោយសារតែតម្រូវការក្នុងការវេចខ្ចប់សម្ភារនានា មានចំនួនច្រើនគួរឱ្យព្រួយបារម្ភ ។
អង្គការ Fondazione ACRA កាលពីចុងឆ្នាំ២០១៦កន្លងទៅ បានសម្ពោធយុទ្ធនាការបរិស្ថាន ក្រោមចំណងជើងថា «បញ្ចូលទំនិញក្នុងថង់តែមួយ» ដើម្បីកាត់បន្ថយការប្រើប្រាស់ថង់ប្លាស្ទិកនៅតាមទីផ្សារមួយចំនួននៅកម្ពុជា ធ្លាប់បានចេញរបាយការណ៍មួយរកឃើញថា ជាមធ្យម ពលរដ្ឋកម្ពុជាម្នាក់ បានប្រើប្រាស់ថង់ប្លាស្ទិកអស់ចំនួន២០០ថង់ក្នុង១ខែ ឬប្រមាណជាង២.៧០០ថង់ក្នុង១ឆ្នាំ ។
រាជរដ្ឋាភិបាលកម្ពុជាបានចេញអនុក្រឹត្យមួយមាន៣២មាត្រា ស្តីពីការគ្រង់គ្រងថង់ប្លាស្ទិក ផ្តោតលើចំណុចសំខាន់ចំនួន៣ គឺ ៖
១-ការកំណត់ប្រភេទ ទំហំ កម្រាស់លើថង់ប្លាស្ទិកស្តើងមានដៃយួរ ត្រូវបានហាមឃាត់លើការនាំចូល ការផលិតក្នុងស្រុក ការចែកចាយ និងការប្រើប្រាស់ ។
២-ការលើកទឹកចិត្តដល់ការកែច្នៃថង់ប្លាស្ទិកនិងការផលិតថង់ ឬសម្ភារវេចខ្ចប់ផលិតពីវត្ថុធាតុងាយពុកផុយ (Biodegradable) ឬជីវប្លាស្ទិក (Bioplastic) ដែលត្រូវដាក់អាករពិសេសជាបន្ទុករបស់រដ្ឋ ។
៣-ការគិតកម្រៃបន្ថែមដល់អតិថិជន ដែលចង់ប្រើប្រាស់ថង់ប្លាស្ទិក ។
នេះបើយោងតាមសេចក្តីប្រកាសរបស់ក្រសួងបរិស្ថាន ចេញផ្សាយនាពេលថ្មីៗនេះ ។
លោក ហេង ណារ៉េត មន្ត្រីអ្នកនាំពាក្យក្រសួងបរិស្ថាន ឱ្យដឹងថា ក្រសួងគ្រោងនឹងធ្វើសិក្ខាសាលាមួយផ្សព្វផ្សាយអនុក្រឹត្យ ស្តីពីការគ្រប់គ្រងថង់ប្លាស្ទិកនៅពាក់កណ្តាលខែធ្នូ ដើម្បីឱ្យម្ចាស់ផ្សារទំនើប និងមជ្ឈមណ្ឌលពាណិជ្ជកម្ម បានដឹងពីអនុក្រឹត្យរបស់ប្រមុខរដ្ឋាភិបាល ទាក់ទងការគ្រប់គ្រងថង់ប្លាស្ទិក មុននឹងដាក់ឱ្យអនុវត្តជាផ្លូវការ ។
លោកបន្តថា សម្រាប់សិក្ខាសាលាដែលគ្រោងធ្វើនាពេលខ្លីខាងមុខនេះ ក្រសួងកំពុងប្រមូលព័ត៌មានថា តើផ្សារទំនើប និងមជ្ឈមណ្ឌលពាណិជ្ជកម្មនៅរាជធានីភ្នំពេញ មានចំនួនប៉ុន្មាន ហើយក្រសួងក៏គ្រោងអញ្ជើញម្ចាស់ផ្សារទំនើបនៅតាមខេត្តធំៗមកចូលរួមផងដែរដើម្បីឱ្យការផ្សព្វផ្សាយបានទូលំទូលាយ ។
មន្ត្រីអ្នកនាំពាក្យក្រសួងបរិស្ថានរូបនេះបញ្ជាក់ថា ៖« គោលបំណងសំខាន់ដែលឱ្យម្ចាស់ផ្សារទំនើប និងមជ្ឈមណ្ឌលពាណិជ្ជកម្ម ចូលរួមសិក្ខាសាលា មានដូចជា ៖ ១-ដើម្បីជម្រាបជូនអំពីកាតព្វកិច្ចរបស់ផ្សារទំនើប នៅពេលផ្តល់ថង់ប្លាស្ទិកវេចខ្ចប់សម្ភារ គឺត្រូវបង់កម្រៃបន្ថែម។ ២-ចង់បានព័ត៌មានខ្លះៗ តើយើងគួរកំណត់យកតម្លៃប៉ុនណា ទៅលើការយកតម្លៃបន្ថែមនៅពេលផ្តល់ជូនថង់ប្លាស្ទិក ។ យើងចង់បានឱ្យមានការឯកភាពគ្នា ដើម្បីងាយស្រួលយកទៅអនុវត្ត និង៣-ចង់ឱ្យគាត់ជ្រាប និងត្រៀមលក្ខណៈបោះពុម្ពស្លាកសញ្ញាដាក់នៅលើថង់របស់គាត់ ឱ្យស្របនឹងអនុក្រឹត្យកំណត់ថា ថង់ប្លាស្ទិកមិនឱ្យស្តើងជាង០,០៣មីលីម៉ែត្រ និងទទឹងថង់ មិនឱ្យតូចជាង២៥សង់ទីម៉ែត្រ ។ អីចឹង ប្រសិនជាថង់នៅកន្លែងគាត់ខុសពីខ្នាតនេះ គឺត្រូវតែត្រៀមរៀបចំថង់ថ្មីឱ្យស្របទៅតាមអនុក្រឹត្យកំណត់ » ។
បើតាមលោក ហេង ណារ៉េត អះអាងថា នៅពេលក្រសួងដាក់ឱ្យអនុវត្តនូវអនុក្រឹត្យ ស្តីពីការគ្រប់គ្រងថង់បា្លស្ទិកជាផ្លូវការនាពេលខាងមុខ បើសិនជាម្ចាស់ផ្សារទំនើបណាមិនអនុវត្តតាមស្មារតីអនុក្រឹត្យនេះ ពួកគេនឹងត្រូវទទួលទណ្ឌកម្មដូចជា ៖
១-នឹងដកហូតប្រភេទថង់ ដែលមិនបានឆ្លើយតបដូចអ្វីបានកំណត់ ។
២-ធ្វើការព្រមានជាលាយលក្ខណ៍អក្សរ ដើម្បីឱ្យគាត់កែសម្រួលឡើងវិញឱ្យស្របតាមស្មារតី ដែលអនុក្រឹត្យបានចែង ។
៣-យើងពិន័យជាអន្តរកាល ។
៤-អាចដកហូតសិទ្ធិនៃការធ្វើអាជីវកម្ម ។
ទាក់ទងនឹងកាកសំណល់ថង់ប្លាស្ទិក មន្ត្រីអ្នកនាំពាក្យរូបនេះអះអាងថា មិនទាន់មានអ្នកណាអាចព្យាករថា រយៈពេលប៉ុន្មានឆ្នាំ ទើបវារលាយទេ ។ សូម្បីតែនៅប្រទេសផ្សេងៗ ក៏មិនទាន់អាចកំណត់បាន និងពុំមានឯកសារគតិយុត្ត ឬឯកសារបច្ចេកទេសណាកំណត់ថា ប្រភេទថង់ប្លាស្ទិកទាំងនោះអាចនឹងពុកផុយប៉ុន្មានឆ្នាំ គឺនៅមិនទាន់ដឹងទេ ដោយគ្រាន់ដាក់ការសន្និដ្ឋានថា វាអាចឈានដល់រាប់រយឆ្នាំ ទើបពុកផុយ ។
សូមបញ្ជាក់ថា កន្លងមក ក្នុងគោលបំណងកាត់បន្ថយការប្រើប្រាស់ថង់ប្លាស្ទិក ក្រសួងបរិស្ថានតែងតែលើកទឹកចិត្តដល់ក្រុមហ៊ុនជាច្រើន ឲ្យកាត់បន្ថយការប្រើប្រាស់លើផលិតផលរបស់ខ្លួន ។ ដូច្នេះ ក្រសួងជំរុញនឹងបំផុសគំនិតនិងលើកទឹកចិត្តដល់ក្រុមហ៊ុនណា ដែលធ្វើការកែច្នៃថង់ប្លាស្ទិក ទៅជាតុ ទូ កៅអី គ្រែ ដែលមានគុណភាពផងដែរ។
សម្រាប់អ្នកស្រី សេង លាងអ៊ី លក់ភេសជ្ជៈនៅតាមបណ្តោយផ្លូវលេខ២៧១ ក្នុងខណ្ឌមានជ័យ និយាយថា អតិថិជនរបស់អ្នកស្រីតែងតែទាមទារថង់ប្លាស្ទិកច្រកទឹកសុទ្ធ ឬក៏ពេលគេទិញកាហ្វេ ក៏សុំឱ្យគាត់ច្រកតែទឹកកកក្នុងថង់មួយផ្សេងទៀត ។ អ្នកស្រីថា ៖ «ការពិត ខ្ញុំក៏មិនចង់ប្រើប្រាស់ថង់ប្លាស្ទិកច្រើនដែរ តែអតិថិជនទិញទឹកសុទ្ធ១ដប ក៏សុំឱ្យច្រកថង់ដែរ ហើយភ្ញៀវខ្លះគាត់ត្រូវការទិញកាហ្វេ យើងក៏ត្រូវច្រកតែទឹកកកឱ្យគាត់ផងដែរ » ។
យ៉ាងណាមិញ អ្នកស្រីមិនអាចប៉ាន់ស្មានបានទេថា ក្នុង១ថ្ងៃ អ្នកស្រីប្រើប្រាស់ថង់ប្លាស្ទិកអស់ប៉ុន្មានឱ្យប្រាកដទេ គ្រាន់តែថាមានចំនួនច្រើន ៕
ចែករំលែកព័តមាននេះ