ទីក្រុងដាណាង ៖ អ្នកដឹកនាំប្រទេសអាស៊ីប៉ាស៊ីហ្វិកបានព្រមព្រៀងគ្នាកាលពីថ្ងៃសៅរ៍ថា នឹងដោះស្រាយបញ្ហាការធ្វើពាណិជ្ជកម្មអយុត្តិធម៌ និងការឧបត្ថម្ភធនលើសលប់ ស្របនឹងគំនិតរបស់លោកប្រធានាធិបតីអាមេរិក ដូណាល់ ត្រាំ ។ កិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក…
ទីក្រុងដាណាង ៖ អ្នកដឹកនាំប្រទេសអាស៊ីប៉ាស៊ីហ្វិកបានព្រមព្រៀងគ្នាកាលពីថ្ងៃសៅរ៍ថា នឹងដោះស្រាយបញ្ហាការធ្វើពាណិជ្ជកម្មអយុត្តិធម៌ និងការឧបត្ថម្ភធនលើសលប់ ស្របនឹងគំនិតរបស់លោកប្រធានាធិបតីអាមេរិក ដូណាល់ ត្រាំ ។ កិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ក្នុងប្រទេសវៀតណាម បានបង្ហាញពីភាពខុសគ្នារវាងគោលនយោបាយអាមេរិកទី១របស់លោកត្រាំ និងការគាំទ្រកិច្ចព្រមព្រៀងពហុភាគី ដែលប្រទេសចិនកំពុងជំរុញឲ្យកើតមាន ។
សេចក្តីប្រកាសដែលប្រទេស APEC ចំនួន២១បានចេញក្នុងឆ្នាំនេះ គឺខុសពីឆ្នាំមុនយ៉ាងខ្លាំង ឆ្នាំនេះ ពួកគេនិយាយថា ៖ «ពួកយើងនឹងសហការគ្នាដើម្បីឲ្យការធ្វើពាណិជ្ជកម្មមានលក្ខណៈជារួម គាំទ្រឱកាសចូលក្នុងទីផ្សារល្អប្រសើរជាងមុន និងដោះស្រាយបញ្ហាពាណិជ្ជកម្មអយុត្តិធម៌ ។ ពួកយើងស្នើឲ្យដករាល់ការឧបត្ថម្ភធនដែលប៉ះពាល់ដល់ទីផ្សារ និងជំនួយផ្សេងៗទៀតពីរដ្ឋាភិបាល និងភ្នាក់ងារពាក់ព័ន្ធ » ។ សេចក្តីប្រកាសនេះស្របនឹងគំនិតរបស់លោកត្រាំ ។ ពួកគេក៏បានលើកឡើងពីសារសំខាន់នៃកិច្ចព្រមព្រៀងទ្វេភាគី ដែលស្របនឹងកិច្ចព្រមព្រៀងពហុភាគី និងស្នើឲ្យអង្គការពាណិជ្ជកម្មពិភពលោក (WTO) ប្រសើរជាងមុនផងដែរ ។
លោកត្រាំ និយាយថា សហរដ្ឋអាមេរិកបានចាញ់ ព្រោះប្រទេសដទៃមិនដើរតាមតួនាទីគោរពច្បាប់ ប្រើប្រាស់ការឧបត្ថម្ភធន និងវិធានការផ្សេងៗ ដែលប៉ះពាល់ដល់ការធ្វើពាណិជ្ជកម្ម រហូតធ្វើឲ្យប្រទេសក្នុងអាស៊ីមើលឃើញមានអតិរេកពាណិជ្ជកម្មយ៉ាងធំ ជាពិសេស ចិន ។ កាលពីដើមសប្តាហ៍មុន រដ្ឋមន្ត្រីពាណិជ្ជកម្មនិងការបរទេសបានចរចាទៅលើភាសា ដែលនឹងប្រើប្រាស់ក្នុងសេចក្តីប្រកាសរបស់ APEC។ មន្ត្រីទាំងនោះនិយាយថា ប្រទេសចំនួន២០ ទៀតបានប្រឆាំងនឹងលោកត្រាំ ដែលជំរុញឲ្យផ្លាស់ប្តូរ ៕
ចែករំលែកព័តមាននេះ