សហរដ្ឋអាមេរិក-ប្រទេសរុស្ស៊ី ៖ នៅខាងក្រៅវេទិកាអាស៊ីប៉ាស៊ីហ្វិក APEC ក្នុងប្រទេសវៀតណាម ប្រធានាធិបតីរុស្ស៊ី លោកវ្ល៉ាឌីមៀរ ពូទីន និងសមភាគីអាមេរិក លោកដូណាល់…
សហរដ្ឋអាមេរិក-ប្រទេសរុស្ស៊ី ៖ នៅខាងក្រៅវេទិកាអាស៊ីប៉ាស៊ីហ្វិក APEC ក្នុងប្រទេសវៀតណាម ប្រធានាធិបតីរុស្ស៊ី លោកវ្ល៉ាឌីមៀរ ពូទីន និងសមភាគីអាមេរិក លោកដូណាល់ ត្រាំ បានជួបនិយាយគ្នាដោយមិត្តភាព ។
ប្រធានាធិបតីអាមេរិកកាលពីថ្ងៃទី១១ វិច្ឆិកា លើយន្តហោះ AIR FORCE ONE អះអាងថា លោកបានជួបគ្នារយៈពេលខ្លីយ៉ាងល្អជាមួយសមភាគីរុស្ស៊ី ដោយនាពេលនោះមេដឹកនាំទាំង២បានជួបនិយាយគ្នារយៈពេលយ៉ាងខ្លីបំផុត២ ឬ៣លើកនាឱកាសកិច្ចប្រជុំកំពូល APEC ។ ចំពោះសំណួរលើការចោទប្រកាន់ពីការជ្រៀតជ្រែករបស់រុស្ស៊ីលើយុទ្ធនាការឃោសនាបោះឆ្នោតប្រធានាធិបតីអាមេរិកកាលពីឆ្នាំ២០១៦ លោកត្រាំ គូសបញ្ជាក់ថា លោកបាននិយាយគ្នារឿងនេះជាមួយលោកពូទីន ។ លោកពូទីន ប្រាប់ខ្ញុំថា ដាច់ខាតពុំបានលូកដៃចូលក្នុងការបោះឆ្នោតរបស់យើងទេ ។ ពេលជួបខ្ញុំម្តងៗ លោកពូទីន និយាយប្រាប់ខ្ញុំថា ខ្ញុំពុំបានធ្វើរឿងបែបនេះទេ ហើយខ្ញុំពិតជាជឿចំពោះអ្វីដែលលោកពូទីន និយាយប្រាប់ខ្ញុំ ។ លោកត្រាំ បន្តថា ខ្ញុំគិតថា មានការអុជអាលខ្លាំងលើរឿងនេះ ដែលជារឿងពុំល្អទេ សម្រាប់ប្រទេសយើង ព្រោះខ្ញុំសូមនិយាយម្តងទៀតថា យើងចង់ឱ្យមានទំនាក់ទំនងល្អជាមួយរុស្ស៊ី ដែលនឹងអាចជួយយើងច្រើនក្នុងបញ្ហាកូរ៉េខាងជើង ដែលសម្រាប់ពេលនេះ ជាបញ្ហាធំបំផុតរបស់យើង ។
លោកពូទីន ចាត់ទុកការចោទប្រកាន់ទាំងឡាយពីរឿងលូកដៃចូលក្នុងការបោះឆ្នោតប្រធានាធិបតីអាមេរិកថា ពុំទំនង ។ ទោះបីយ៉ាងណា លោកនៅនិយាយល្អពីលោកត្រាំ ដោយលោកថា ឥរិយាបថរបស់ប្រធានាធិបតីអាមេរិកពិតជាត្រឹមត្រូវបំផុត និងគួរឱ្យស្វាគមន៍ ។ លោកយល់ថា ទំនាក់ទំនងរវាងរុស្ស៊ី និងសហរដ្ឋអាមេរិកនៅពុំទាន់ចាកចេញពីវិបត្តិនៅឡើយ ។ យើងត្រៀមបិទទំព័រ ហើយដើរទៅមុខ ។ យើងចង់បានទំនាក់ទំនងល្អប្រសើរនានាជាមួយសហរដ្ឋអាមេរិក ។ នៅវៀតណាម លោកពូទីន និងលោកត្រាំ បានអនុម័តសេចក្តីថ្លែងការណ៍រួមមួយស្តីពីស៊ីរី ដែលក្នុងសេចក្តីថ្លែងការណ៍នេះមេដឹកនាំទាំង២ យល់ថា ពុំមានដំណោះស្រាយយោធាណាមួយចំពោះជម្លោះឡើយ រួចអំពាវនាវដល់គ្រប់ភាគីដែលច្បាំងគ្នាឱ្យចូលរួមយ៉ាងសកម្មក្នុងដំណើរការសន្តិភាពក្រុងហ្សឺណែវ ។ នេះជាការប្រកាសរបស់វិមានក្រឹមឡាំងកាលពីថ្ងៃទី១១ វិច្ឆិកា ។ ប្រធានាធិបតីទាំង២ បានអនុម័តសេចក្តីថ្លែងការណ៍រួមនេះនៅខាងក្រៅកិច្ចប្រជុំកំពូលរបស់ APEC នៅក្រុងដាណាង ប្រទេសវៀតណាម ។ លោកត្រាំ ថា កិច្ចព្រមព្រៀងនេះនឹងជួយសង្គ្រោះអាយុជីវិតមនុស្សយ៉ាងច្រើនបំផុត ។ យើងបានយល់ព្រមដោយឆាប់រហ័សបំផុត ៕
ចែករំលែកព័តមាននេះ