មនុស្សជាង200នាក់ចាប់ខ្លួនពីបទពុករលួយ
ប្រទេសអារ៉ាប៊ី សាអ៊ូឌីត ៖ អាជ្ញាធរអារ៉ាប៊ី សាអ៊ូឌីត គូសបញ្ជាក់កាលពីថ្ងៃទី៩ វិច្ឆិកា ថា មនុស្សជាង២០០នាក់ត្រូវចាប់ខ្លួននៅអារ៉ាប៊ី សាអ៊ូឌីត…
ប្រទេសអារ៉ាប៊ី សាអ៊ូឌីត ៖ អាជ្ញាធរអារ៉ាប៊ី សាអ៊ូឌីត គូសបញ្ជាក់កាលពីថ្ងៃទី៩ វិច្ឆិកា ថា មនុស្សជាង២០០នាក់ត្រូវចាប់ខ្លួននៅអារ៉ាប៊ី សាអ៊ូឌីត…
ប្រទេសអារ៉ាប៊ី សាអ៊ូឌីត ៖ អាជ្ញាធរអារ៉ាប៊ី សាអ៊ូឌីត គូសបញ្ជាក់កាលពីថ្ងៃទី៩ វិច្ឆិកា ថា មនុស្សជាង២០០នាក់ត្រូវចាប់ខ្លួននៅអារ៉ាប៊ី សាអ៊ូឌីត ក្នុងក្របខណ្ឌនៃយុទ្ធនាការប្រឆាំងអំពើពុករលួយធំមួយពុំធ្លាប់មានពីមុនមកនៅប្រទេសនេះ ពិសេសសំដៅលើបណ្តាព្រះអង្គម្ចាស់ រដ្ឋមន្ត្រី អតីតរដ្ឋមន្ត្រី និងពាណិជ្ជករ ។
ការប្រកាសនេះធ្វើឡើងពេលមានការកែទម្រង់នានាក្នុងប្រទេសអភិរក្សនិយមជ្រុលនេះក្រោមការក្តាប់អំណាចរបស់រជ្ជទាយាទ MOHAMED BEN SALMANE ។ ការប្រកាសនេះក៏កើតមានដែរក្នុងបរិយាកាសកាន់តែតានតឹងមួយជាមួយអុីរ៉ង់ និងបន្ទាប់ពីការសុំលាលែងរបស់នាយករដ្ឋមន្ត្រីលីបង់ លោកសាអាដ ហារីរី ជាមនុស្សជំនិតរបស់ក្រុងរីយ៉ាដមួយឆ្នាំ ក្រោយការបង្កើតរដ្ឋាភិបាលមួយជាមួយពួកហេសប៊ុលឡាហ៍ ស្និទ្ធអ៊ីរ៉ង់ ។
ក្នុងសេចក្តីប្រកាសមួយអគ្គរាជអាជ្ញាអារ៉ាប៊ី សាអ៊ូឌីត គូសបញ្ជាក់ថា សរុបមនុស្ស២០៨នាក់ ត្រូវកោះហៅមកសួរចម្លើយរហូតមកទល់ពេលនេះ ។ ក្នុងចំណោមមនុស្សទាំង២០៨នាក់នេះ ៧នាក់ត្រូវដោះលែងវិញ ដោយពុំមានបទចោទប្រកាន់ ។ ទំហំនៃអំពើពុករលួយពិតជាធំធេង ។ ទឹកប្រាក់ទាក់ទិននឹងអំពើពុករលួយមានដល់១០០ពាន់លានដុល្លារ រយៈពេលប៉ុន្មានឆ្នាំចុងក្រោយនេះ ហើយការស៊ើបអង្កេតមួយធ្វើឡើង៣ឆ្នាំមកហើយ ។
បណ្តាព្រះអង្គម្ចាស់ ក្នុងនោះមានព្រះអង្គម្ចាស់ជាមហាសេដ្ឋី AL WALID BEN TALAL បណ្តារដ្ឋមន្ត្រី ព្រមទាំងបណ្តាពាណិជ្ជករត្រូវចាប់ខ្លួនកាលពីយប់ថ្ងៃទី៤ វិច្ឆិកា ក្នុងប្រតិបត្តិការគួរឱ្យភ្ញាក់ផ្អើលក្រោយការបង្កើតគណៈកម្មការប្រឆាំងអំពើពុករលួយថ្មីមួយដឹកនាំដោយព្រះអង្គម្ចាស់រជ្ជទាយាទដែលប្រមូលអំណាចកាន់តែខ្លាំងឡើង ។
អាជ្ញាធរក៏ផ្អឹបទុកដែរ បណ្តាគណនីធនាគាររបស់ពួកជនសង្ស័យ ហើយប្រាប់ថា រាល់ភាគហ៊ុនដែលទាក់ទិននឹងរឿងពុករលួយនឹងត្រូវរឹបអូសប្រគល់ឱ្យរដ្ឋ ។
អគ្គរាជអាជ្ញាគូសបញ្ជាក់កាលពីថ្ងៃទី៦ វិច្ឆិកា ថា បណ្តាឥស្សរជនដែលត្រូវចាប់ខ្លួន
ហើយយកទៅឃុំឃាំងនៅកន្លែងមួយដែលអាជ្ញាធរមិនបញ្ជាក់ប្រាប់នឹងត្រូវកាត់ទោសនៅមុខតុលាការមួយ ។
អង្គការសិទ្ធិមនុស្ស HUMAN RIGHT WATCH (HRW) គូសបញ្ជាក់កាលពីថ្ងៃទី៨ វិច្ឆិកា ថា រលកនៃការចាប់ខ្លួននេះអាចជាផ្នែកមួយនៃការតស៊ូផ្ទៃក្នុង ដើម្បីក្តាប់អំណាចដែរ ។ អង្គការនេះមានការបារម្ភដែលមនុស្សទាំងនេះត្រូវឃុំខ្លួនទាំងអាជ្ញាធរពុំបានលើកពីហេតុផលនៃការឃុំឃាំងពួកគេផង ។
ការចាប់ខ្លួនមនុស្សសំខាន់ៗបែបនេះក៏កើតមានដែរពេលព្រះអង្គម្ចាស់ MOHAMMED BEN SALMANE ពង្រឹងអំណាចរបស់ទ្រង់ ហើយប៉ុនប៉ងធ្វើការកែទម្រង់សេដ្ឋកិច្ច និងសង្គមកិច្ចពុំធ្លាប់មានពីមុនមក ។
ដោយត្រួតត្រាក្រសួងសំខាន់ៗដូចជាក្រសួងការពារប្រទេសរហូតដល់ក្រសួងសេដ្ឋកិច្ច រជ្ជទាយាទអង្គនេះហាក់ចង់រាំងខ្ទប់ការប្រជែងផ្ទៃក្នុងនានា មុនពេលព្រះបិតាទ្រង់ព្រះមហាក្សត្រ SALMANE ព្រះជន្ម៨១ព្រះវស្សា ផ្ទេរអំណាចផ្លូវការដល់ទ្រង់ ។
សញ្ញាបង្ហាញច្បាស់មួយទៀតនោះគឺបុរសខ្លាំងនេះរបស់ប្រទេសជាអ្នកទទួលប្រធានាធិបតីបារាំង លោក EMMANUEL MACRON នៅក្រុងរីយ៉ាដនាយប់ថ្ងៃទី៩ វិច្ឆិកា ។
ព្រះអង្គម្ចាស់រជ្ជទាយាទនេះជាអ្នកផ្តួចផ្តើមគំនិតឱ្យមានផែនការកែទម្រង់ធំមួយហៅផែនការ «ទស្សនវិស័យ២០៣០» សំដៅជាពិសេសធ្វើឱ្យសេដ្ឋកិច្ចអារ៉ាប៊ី សាអ៊ូឌីត មានលក្ខណៈប្លែកៗលែងចំណុះខ្លាំងតែលើប្រេងកាត ។ ចាប់តាំងពីតម្លៃប្រេងឆៅធ្លាក់ចុះខ្លាំងកាលពីពាក់កណ្តាលឆ្នាំ២០១៤ មកក្រុងរីយ៉ាដ ត្រូវបង្ខំចិត្តកាត់បន្ថយយ៉ាងខ្លាំងការចំណាយសាធារណៈ ។
កាលពីដំណាច់ខែកញ្ញា ប្រទេសនេះជាប្រទេសចុងក្រោយគេហាមឃាត់នារីមិនឱ្យបើកបរ ប្រកាសថានារីៗអាចកាន់ចង្កូតរថយន្តបាន ហើយគិតចាប់ពីខែមិថុនា ឆ្នាំ២០១៨ទៅ ៕
ចែករំលែកព័តមាននេះ