រាជធានីភ្នំពេញ ៖ ក្នុងផែនការតភ្ជាប់តំបន់អភិវឌ្ឍន៍នៃបណ្តាប្រទេសមហាអនុតំបន់ទន្លេមេគង្គ ធនាគារអភិវឌ្ឍន៍អាស៊ី (ADB) គ្រោងរៀបចំជួសជុល និងសាងសង់ព្រលានយន្តហោះក្នុងខេត្តស្ទឹងត្រែងឡើងវិញ ។ លោក ស៊ិន…
រាជធានីភ្នំពេញ ៖ ក្នុងផែនការតភ្ជាប់តំបន់អភិវឌ្ឍន៍នៃបណ្តាប្រទេសមហាអនុតំបន់ទន្លេមេគង្គ ធនាគារអភិវឌ្ឍន៍អាស៊ី (ADB) គ្រោងរៀបចំជួសជុល និងសាងសង់ព្រលានយន្តហោះក្នុងខេត្តស្ទឹងត្រែងឡើងវិញ ។
លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងឲ្យដឹងតាមទូរស័ព្ទនារសៀលថ្ងៃទី៦ វិច្ឆិកាថា ព្រលានយន្តហោះខេត្តស្ទឹងត្រែង ស្ថិតក្នុងផែនការមេនៃការដាក់បញ្ចូលក្នុងផែនការអភិវឌ្ឍន៍នៅតាមបណ្តាប្រទេសមហាអនុតំបន់ទន្លេមេគង្គ ដែលបច្ចុប្បន្នធនាគារអភិវឌ្ឍន៍អាស៊ី (ADB) កំពុងសិក្សាលម្អិតពីផែនការនេះ មុនសម្រេចដាក់បញ្ចូលទៅក្នុងផែនការនាពេលអនាគត ។
លោកបន្តថា ៖« ព្រលានយន្តហោះខេត្តស្ទឹងត្រែង មានសក្តានុពលជាងគេក្នុងចំណោមតំបន់ភូមិភាគឦសាន និងជាច្រករបៀងងាយតភ្ជាប់ទៅកាន់ប្រទេសឡាវ និងប្រទេសក្នុងតំបន់ដទៃ ក៏ដូចជាតភ្ជាប់ទៅកាន់បណ្តាខេត្តភូមិភាគឦសានចំនួន៣ទៀត » ។
លោកបន្តថា ព្រលាននេះមានលទ្ធភាព និងឆ្លើយតបតាមផែនការមេនៃផែនការអភិវឌ្ឍន៍ក្នុងមហាអនុតំបន់ទន្លេមេគង្គ ។ លោកថា ៖«ប្រសិនជាត្រឹមជួសជុល គឺចំណាយថវិកាចន្លោះពី៥ទៅ៦លានដុល្លារ អាចបើកដំណើរការបានហើយសម្រាប់ចុះចតយន្តហោះតូចៗ ប៉ុន្តែដើម្បីអាចឲ្យយន្តហោះប្រភេទ Airbus320 និងBoing737 ដែលអាចផ្ទុកអ្នកដំណើរចន្លោះពី១៦០ទៅ១៨០នាក់ ព្រលានយន្តហោះនេះត្រូវចំណាយថវិកាវិនិយោគចន្លោះពី២០ទៅ៣០លានដុល្លារអាមេរិក » ។
តាមការពិនិត្យទីតាំង និងលក្ខខណ្ឌភូមិសាស្ត្រ ព្រលានយន្តហោះខេត្តស្ទឹងត្រែងមានសក្តានុពលច្រើនផ្នែកដូចជា ទី១-ឆ្លើយតបនឹងផែនការរបស់មហាអនុតំបន់ទន្លេមេគង្គ។ ទី២-ងាយស្រួលក្នុងការតភ្ជាប់ និងសក្តានុពលសេដ្ឋកិច្ចក្នុងតំបន់ និងទី៣-ហេដ្ឋារចនាសម្ព័ន្ធមានភាពងាយស្រួល និងងាយតភ្ជាប់ទៅកាន់ខេត្តភូមិភាគឦសានចំនួន៣ ដែលនៅក្បែរនោះ ។ នេះបើតាមការឲ្យដឹងពីអ្នកនាំពាក្យរូបនេះ ។
ប្រធានសហព័ន្ធទេសចរណ៍កម្ពុជា លោក ធួន ស៊ីណាន បានថ្លែងថា ប្រសិនជាមានការសាងសង់ព្រលានយន្តហោះនៅខេត្តស្ទឹងត្រែងមែន ពិតជារឿងអបអរសាទរណាស់ ព្រោះវាងាយស្រួលតភ្ជាប់ទៅខេត្តដទៃ តភ្ជាប់ជាមួយប្រទេសឡាវ និងបណ្តាប្រទេសក្នុងតំបន់ដទៃទៀត ។ លោកបន្តថា ខេត្តស្ទឹងត្រែង ងាយតភ្ជាប់មកកាន់ខេត្តក្រចេះ និងរតនគិរី ហើយបើរាជរដ្ឋាភិបាលមានលទ្ធភាពបើកព្រលានថ្មីមួយនៅខេត្តមណ្ឌលគិរីកាន់តែប្រសើរ ។
លោកបន្តថា ៖« ប្រសិនជាមានព្រលាននៅខេត្តស្ទឹងត្រែងជារឿងអបអរសាទរ ហើយយើងរំពឹងថា ភ្ញៀវទេសចរនឹងកើនឡើងច្រើននៅតាមបណ្តាភូមិភាគឦសានបន្ថែមទៀត » ។
លោកបញ្ជាក់ថា ៖« ការពិត ខេត្តស្ទឹងត្រែងមានសក្តានុពលទេសចរណ៍ធម្មជាតិសម្បើមណាស់ ប៉ុន្តែបញ្ហាកង្វះហេដ្ឋារចនាសម្ព័ន្ធបានក្លាយជាឧបសគ្គរាំងស្ទះដល់ការអភិវឌ្ឍវិស័យទេសចរណ៍ក្នុងខេត្តនេះ » ៕
ចែករំលែកព័តមាននេះ