រាជធានីភ្នំពេញ ៖ បន្ទាប់ពីសម្តេចនាយករដ្ឋមន្ត្រី ហ៊ុន សែន ប្រកាសឱ្យតំណាងរាស្ត្រ និងសមាជិកក្រុមប្រឹក្សាឃុំ-សង្កាត់របស់គណបក្សសង្គ្រោះជាតិចុះចូលជាមួយគណបក្សប្រជាជនកម្ពុជា ស្របពេលដែលតុលាការកំពុងដំណើរការក្តីរំលាយគណបក្សនេះតាមបណ្តឹងក្រសួងមហាផ្ទៃ តំណាងរាស្ត្រមួយរបស់គណបក្សប្រឆាំង គឺលោក…
រាជធានីភ្នំពេញ ៖ បន្ទាប់ពីសម្តេចនាយករដ្ឋមន្ត្រី ហ៊ុន សែន ប្រកាសឱ្យតំណាងរាស្ត្រ និងសមាជិកក្រុមប្រឹក្សាឃុំ-សង្កាត់របស់គណបក្សសង្គ្រោះជាតិចុះចូលជាមួយគណបក្សប្រជាជនកម្ពុជា ស្របពេលដែលតុលាការកំពុងដំណើរការក្តីរំលាយគណបក្សនេះតាមបណ្តឹងក្រសួងមហាផ្ទៃ តំណាងរាស្ត្រមួយរបស់គណបក្សប្រឆាំង គឺលោក ងឹម ញេង បានប្រកាសចុះចូលជាមួយគណបក្សប្រជាជន។ នេះយោងតាមលិខិត សុំចុះចូលមួយច្បាប់ចុះថ្ងៃទី១ វិច្ឆិកា ឆ្នាំ២០១៧ មានបិទរូបថតរបស់លោក និងត្រូវបានបង្ហោះលើបណ្តាញសង្គមហ្វេសប៊ុក ដោយអ្នកគាំទ្រគណបក្សប្រជាជនកម្ពុជា។
តែយ៉ាងណាមិញ លោក ងឹម ញេង តំណាងរាស្ត្រខេត្តពោធិ៍សាត់ បានបដិសេធចំពោះលិខិតនេះ។ លោក ងឹម ញេង បានសរសេរនៅលើទំព័រហ្វេសប៊ុកផ្លូវការរបស់លោកថា លិខិតសុំចុះចូលដែលបានបង្ហោះ និងចែកចាយនៅលើបណ្តាញសង្គមហ្វេសប៊ុកនេះ ជាលិខិតក្លែងក្លាយ។
លោកបានសរសេរបញ្ជាក់ថា «ខ្ញុំ ងឹម ញេង ជាអ្នកតំណាងរាស្ត្រ សូមប្រកាសបដិសេធចំពោះលិខិតក្លែងក្លាយខាងក្រោមនេះ។ នេះគឺជាអំពើទុច្ចរិតលាបពណ៌របស់ក្រុមមនុស្សល្មោភអំណាច ខ្ញុំសូមអាជ្ញាធរមានសមត្ថកិច្ចស្រាវជ្រាវ និងចាប់ជនល្មើសមកផ្តន្ទាទោសតាមច្បាប់ជាធរមាន។ ខ្ញុំសូមប្រកាសជាឱឡារិកថា ខ្ញុំមិនក្បត់ឆន្ទៈម្ចាស់ឆ្នោតជាដាច់ខាត»។
កាលពីពេលថ្មីៗនេះ តំណាងរាស្ត្រប្រឆាំងមួយរូប គឺលោក ឡុង ប៊ុន្នី បានប្រកាសសុំចុះចូលជាមួយគណបក្សប្រជាជនកម្ពុជា ។ ក្រោយការប្រកាសសុំចុះចូលនេះ លោក ត្រូវបានសម្តេចនាយករដ្ឋមន្ត្រី ហ៊ុន សែន តែងតាំងជាទីប្រឹក្សា៕
ចែករំលែកព័តមាននេះ