រាជធានីភ្នំពេញ ៖ បវរកញ្ញាពិភពលោក ឆ្នាំ២០១៦ និងបេក្ខភាពបវរកញ្ញា ២០១៧ ចំនួន៦៥រូប មកពីប្រទេស៦៥ផ្សេងៗគ្នានារសៀលថ្ងៃទី៥ ខែវិច្ឆិកា ឆ្នាំ២០១៧នេះ បានចូលរួមក្នុងសកម្មភាពបេសកកម្មផ្សព្វផ្សាយពីការពារបរិស្ថាននៅក្នុងប្រទេសកម្ពុជា ជាពិសេសការយល់ដឹងនៃការប្រើប្រាស់ថង់ប្លាស្ទិក ។
លោក អ៊ាង សុផ្លាលែត អនុរដ្ឋលេខាធិការក្រសួងបរិស្ថានបាននៅចំពោះមុខកំពូលសម្រស់ទាំងអស់ថា ថង់ប្លាស្ទិកកំពុងតែបានប្រើប្រាស់នៅក្នុងប្រទេសកម្ពុជានាពេលបច្ចុប្បន្ននេះ ហើយលោកសូមកុំឲ្យពលរដ្ឋបោះចោលថង់ប្លាស្ទិក និងដុតវាដែលបង្កផលប៉ះពាល់ដល់បរិស្ថាន និងសុខាភាពមនុស្ស។
លោករដ្ឋលេខាធិការបានលើកឡើងក្នុងសន្និសីទសារព័ត៌មានបេសកកម្មជ័យលាភីបវរកញ្ញាពិភពលោក២០១៦ និងបេក្ខភាពបវរកញ្ញា ២០១៧ ក្នុងការគាំទ្រកិច្ចគាំពារបរិស្ថាន ជាពិសេសសម្រាប់ការចាប់ផ្តើមបេសកម្មរបស់ខ្លួន បរវកញ្ញាពិភពលោកឆ្នាំ២០១៦ និងក្រុមបេក្ខភាព Miss Global 2017 ទាំង៦៥រូបផ្សេងទៀតនឹងមានពីបេសកកម្មក្នុងកិច្ចគាំពារបរិស្ថាន ដោយការយកកូនឈើសរុប១ម៉ឺនដើមទៅដាំ និងជួយទ្រទ្រង់ដល់បរិស្ថាននៅស្រុកអូររាំងឪ ខេត្តត្បូងឃ្មុំ នាថ្ងៃទី ៦ វិច្ឆិកានេះ ។
លោកបានលើកឡើងថា៖ «យើងធ្វើការជំរុញឲ្យមានការការពារបរិស្ថានឲ្យកាន់តែល្អប្រសើរឡើង ហើយស្វែងយល់រួមគ្នាពីបរិស្ថាន ។ ករណីថង់ប្លាស្ទិក នៅពេលណាយើងប្រើប្រាស់រួចចោល វានឹងហូរចូលក្នុងទឹកទន្លេ ស្ទឹង ឬសមុទ្រ និងចូលក្នុងខ្លួនយើង។យើងគួរកុំចោលថង់ប្លាស្ទិក ហើយប្រើវាជាថ្មីម្តងទៀត។ នៅពេលដែលយើងបោះចោលថង់ប្លាស្ទិកវាហូរចូលទន្លេ ស្ទឹង បឹង និងសមុទ្រ ហើយនៅពេលដុតវាមិនឆេះអស់ វាអាចហុយតាមខ្យល់ចូលក្នុងខ្លួនយើងបង្កជាជំងឺ»។
សូមបញ្ជាក់ថា កម្ពុជានឹងធ្វើជាម្ចាស់ផ្ទះនៃការប្រកួតសម្រស់អន្តរជាតិ Miss Global International 2017 ដែលក្នុងនោះកញ្ញា យស ប៉ូលីណា (Paulina Yos) ជាតំណាងបេក្ខនារីកំពូលសម្រស់របស់កម្ពុជា ដើម្បីចូលរួមប្រកួតកម្មវិធីបវរកញ្ញាពិភពលោក Miss Global International 2017 ដែលនឹងប្រព្រឹត្តិឡើងនៅថ្ងៃទី១៨ ខែវិច្ឆិកា ឆ្នាំ២០១៧ ខាងមុខនេះ៕
VIDEO
ចែករំលែកព័តមាននេះ