រាជធានីភ្នំពេញ ៖ កម្ពុជាស្ថិតក្រោមគំនិតផ្ដួចផ្ដើមខ្សែក្រវាត់ និងផ្លូវ របស់ប្រទេសចិន ដែលបានផ្ដល់នូវផលប្រយោជន៍ជាច្រើនដល់ប្រទេសនេះលើវិស័យពាណិជ្ជកម្ម ការវិនិយោគ និងការផ្ដល់ជំនួយពីប្រទេសចិន ។
សមាជិកសភា និងជាអនុប្រធានគណៈកម្មការកិច្ចការបរទេស លោក សួស យ៉ារ៉ា បានលើកឡើងក្នុងសន្និសីទស្ដីពី «ការលើកកម្ពស់កិច្ចសហប្រតិបត្តិការរវាងកម្ពុជា និងតំបន់ក្រោមគំនិតផ្ដួចផ្ដើមខ្សែក្រវាត់ និងផ្លូវ» នាព្រឹកថ្ងៃទី៣០ តុលា ថា ក្រោមគំនិតផ្ដួចផ្ដើមនៃគម្រោងនេះ បានផ្ដល់សារប្រយោជន៍ជាច្រើនដល់កម្ពុជា ដោយជំរុញឲ្យមានសន្ទុះពាណិជ្ជកម្មរវាងប្រទេសទាំងពីរ ដែលទំហំពាណិជ្ជកម្មចិន និងកម្ពុជាកាលពីឆ្នាំ២០១៦មានទំហំដល់៤.៨០០លានដុល្លារអាមេរិក ។ លើសពីនេះ គិតត្រឹមឆ្នាំ២០១៦ ការវិនិយោគរបស់ចិនមកកម្ពុជា មានចំនួន៥.១០០លានដុល្លារអាមេរិក ដោយភាគច្រើនវិនិយោគលើវិស័យសំណង់ វាយនភ័ណ្ឌ និងអគ្គិសនី ។
លោកបន្តថា ៖« លើសពីនេះ កម្ពុជាក៏ទទួលបានជំនួយអភិវឌ្ឍន៍ផ្លូវការ ទាំងជំនួយឥតសំណង និងកម្ចីពីប្រទេសចិន ដើម្បីស្ថាបនានិងអភិវឌ្ឍន៍ហេដ្ឋារចនាសម្ព័ន្ធ កសិកម្ម សុខាភិបាល និងវិស័យអប់រំផងដែរ » ។
សាកលវិទ្យាធិការនៃសាកលវិទ្យាល័យ ភូមិន្ទភ្នំពេញ លោក ជេត ជាលី បានថ្លែងថា កម្ពុជាក៏បានសហការជាមួយប្រទេសចិន ដើម្បីជួយសម្រេចគោលដៅផងដែរ ដោយក្នុងនោះ សាកលវិទ្យាល័យភូមិន្ទភ្នំពេញបានបង្កើតមជ្ឈមណ្ឌលស្រាវជ្រាវមួយឈ្មោះ មជ្ឈមណ្ឌលកម្ពុជាសម្រាប់ការសិក្សាស្រាវជ្រាវផ្លូវសូត្រសមុទ្រសតវត្សរ៍ទី២១ ដើម្បីសិក្សាស្រាវជ្រាវទៅលើគោលនយោបាយ វិស័យសេដ្ឋកិច្ច នយោបាយ សង្គម វប្បធម៌ បរិស្ថាន និងវិស័យមួយចំនួនទៀត ។
គំនិតផ្ដួចផ្ដើមខ្សែក្រវាត់ និងផ្លូវ របស់ប្រទេសចិននេះ បានធ្វើឡើងតាំងពីយូរលង់ណាស់មកហើយ ហើយគម្រោងនេះបានលើកឡើងមកសាជាថ្មីដោយប្រធានាធិបតី Xi Jinping កាលពីឆ្នាំ២០១៣ ជាការផ្តួចផ្តើមគំនិត ខ្សែក្រវាត់សេដ្ឋកិច្ចនៃផ្លូវសូត្រថ្មី ដើម្បីតភ្ជាប់ទ្វីបអាស៊ី អឺរ៉ុប និងទ្វីបអាហ្វ្រិក ។
យោងតាមរបាយការណ៍របស់ធនាគារ ជាតិកម្ពុជា បានបញ្ជាក់ថា ប្រទេសចិនជាដៃគូនាំទំនិញចូលកម្ពុជាលំដាប់លេខ១ ចាប់ពីឆ្នាំ១៩៩៨មក ហើយប្រទេសចិន ក៏ជាទីផ្សារនាំអង្ករចេញធំបំផុតរបស់កម្ពុជាផងដែរ ។ កាលពីឆ្នាំ២០១៦ ចិនបាននាំចូលមកកម្ពុជា ក្នុងទំហំទឹកប្រាក់៤.៥៥០លានដុល្លារអាមេរិក ប្រមាណជា៣៦,៩%នៃការនាំចូលសរុប ។ ចំណែកឯទំហំទឹកប្រាក់ដែលកម្ពុជានាំចេញទៅចិនវិញមានចំនួនត្រឹមតែ៦០៩លានដុល្លារអាមេរិកប៉ុណ្ណោះ ស្មើនឹង៦%នៃការនាំចេញសរុប ៕
ចែករំលែកព័តមាននេះ