រាជធានីភ្នំពេញ ៖ មន្ត្រីជាន់ខ្ពស់សាលារាជធានីភ្នំពេញបានបញ្ជាក់ថា សំរាមនៅរាជធានីភ្នំពេញបានកើនឡើងជាបន្ដបន្ទាប់ ខណៈដែលគិតត្រឹមរយៈពេល៤ខែដើមឆ្នាំនេះ មានរហូតដល់ជិត៤០ម៉ឺនតោន ហើយបើតាមការព្យាករ នឹងកើនឡើងដល់៨០ម៉ឺនតោននៅដំណាច់ឆ្នាំ២០១៧នេះ ។ លោក…
រាជធានីភ្នំពេញ ៖ មន្ត្រីជាន់ខ្ពស់សាលារាជធានីភ្នំពេញបានបញ្ជាក់ថា សំរាមនៅរាជធានីភ្នំពេញបានកើនឡើងជាបន្ដបន្ទាប់ ខណៈដែលគិតត្រឹមរយៈពេល៤ខែដើមឆ្នាំនេះ មានរហូតដល់ជិត៤០ម៉ឺនតោន ហើយបើតាមការព្យាករ នឹងកើនឡើងដល់៨០ម៉ឺនតោននៅដំណាច់ឆ្នាំ២០១៧នេះ ។
លោក នួន ផារ័ត្ន អភិបាលរងរាជធានីភ្នំពេញ បានមានប្រសាសន៍នៅក្នុងសន្និសីទមួយកាលពីថ្ងៃទី២៨ តុលា ថា បច្ចុប្បន្ន រាជធានី កំពុងប្រឈមនឹងបញ្ហាសំរាម ដែលក្នុងមួយខែៗបានកើនឡើងជាលំដាប់ ខណៈពេលត្រឹមតែ៤ខែដើមឆ្នាំនេះ សំរាមមានរហូតដល់ទៅជិត៤០ម៉ឺនតោន ហើយអាចព្យាករបានថា នៅក្នុងឆ្នាំ២០១៧នេះ នឹងកើនរហូតដល់៨០ម៉ឺនតោន ។
លោកថា ៖« បញ្ហាស្មុគស្មាញនេះ មិនមែនជាការទទួលខុសត្រូវរបស់ស្ថាប័នណាមួយ ឬបុគ្គលណាម្នាក់ទេ គឺជាកិច្ចការរួម ដែលទាមទារឲ្យមានការចូលរួមពីគ្រប់ភាគីពាក់ព័ន្ធ ជាពិសេសត្រូវផ្តើមចេញប្រជាពលរដ្ឋម្នាក់ទៅ ដោយគិតថា ស្អាតជានិច្ច រាប់តាំងពីជុំវិញខ្លួនយើង ផ្ទះយើង កន្លែងធ្វើការយើង និងសង្គមយើង ដើម្បីគ្មានសំរាមនៅក្នុងទីក្រុងរបស់យើង និងចូលរួមទប់ស្កាត់ការបោះចោលសំរាម » ។
ដើម្បីឱ្យសោភ័ណភាពរាជធានីភ្នំពេញមានភាពស្រស់ស្អាតគួរជាទីគយគន់ពីសំណាក់ទេសចរជាតិ និងអន្តរជាតិ និងជាការបង្ហាញពីភាពថ្លៃថ្នូររបស់ពលរដ្ឋក្នុងប្រទេសផងនោះ ស្ថាប័នរដ្ឋ ឯកជន សមាគម និងអង្គការក្រៅរដ្ឋាភិបាលជាច្រើនបានរួមគ្នាធ្វើយុទ្ធនាការសម្អាតរាជធានីភ្នំពេញរយៈពេល១ខែ ចាប់ពីថ្ងៃទី១ ដល់ថ្ងៃទី៣០ ខែវិច្ឆិកា ២០១៧ ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានឱ្យដឹងថា ដើម្បីឲ្យយុទ្ធនាការ ភ្នំពេញស្អាតនេះទៅរួច ត្រូវផ្តើមចេញពីយើងទាំងអស់គ្នា ការចូលរួមទាំងអស់គ្នា និងប្តូរឥរិយាបថរបស់ប្រជាពលរដ្ឋឲ្យយល់ដឹងពីការទុកដាក់សំរាម ដើម្បីភាពស្អាតទាំងអស់គ្នា កុំគិតថា អ្នកណាជាអ្នកទទួលខុសត្រូវលើបញ្ហាសំរាម គឺគិតថា សំរាមជាបញ្ហារបស់យើងទាំងអស់គ្នា ផ្តើមអប់រំតាំងពីកុមារភាពឡើងទៅ ។
លោកថ្លែងថា ៖« ជាមួយនឹងយន្តការរបស់រាជរដ្ឋាភិបាលដែលមានស្រាប់ ខ្ញុំរំពឹងថា យុទ្ធនាការសម្អាតទីក្រុង នឹងក្លាយជាដំណោះស្រាយមួយផ្នែកទៀតចំពោះបញ្ហាសំរាមនៅកម្ពុជា ពិសេសការអប់រំប្រជាជន យុវជន និងកុមារឱ្យចូលរួមគិតពីបញ្ហាសំរាម និងចូលរួមជាផ្នែកមួយនៃដំណោះស្រាយ ជាជាងការរិះគន់ ប៉ុន្តែមិនចូលរួមជាសកម្មភាព រួមមានការផ្សព្វផ្សាយជាដើម » ។
លោកស្រី ជា សុផល្លា សហស្ថាបនិកគម្រោងមួយនេះក៏បានឲ្យដឹងថា យុទ្ធនាការស្អាតនេះ គឺជាវេទិកាមួយផ្តល់ឱកាសឱ្យយើងទាំងអស់គ្នាបានរួបរួមជាកម្លាំងមួយដ៏ធំជាមួយគ្រប់ស្ថាប័នពាក់ព័ន្ធ ដើម្បីចែករំលែកនូវចំណេះដឹង បទពិសោធន៍ យុទ្ធសាស្ត្រ ក្នុងការការពារ បរិស្ថាន សោភ័ណភាព និងសុខុមាលភាពរបស់យើងប្រកបដោយនិរន្តរភាព ។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា ក៏បានលើកឡើងកន្លងមកថា សំរាម គឺជាសត្រូវនៃភ្នែកទេសចរ ហើយគ្មានទេសចរណាចង់មកកន្លែងដែលសម្បូរទៅដោយសំរាមទេ ។ បញ្ហានេះមិនមែនចាំតែរាជរដ្ឋាភិបាលជាអ្នកដោះស្រាយទេ គឺត្រូវចូលរួមទាំងអស់គ្នា តាំងពីប្រជាពលរដ្ឋខ្លួនគាត់ ស្ថាប័នរដ្ឋ និងឯកជនទាំងអស់ផងដែរ។
គួរបញ្ជាក់ថា កម្មវិធីភ្នំពេញស្អាត ឬយុទ្ធនាការសម្អាតទីក្រុង ត្រូវបានបង្កើតឡើងដោយស្ថាប័នជាច្រើន រួមមាន ក្រុមហ៊ុនសប្បាយ សហភាពសហព័ន្ធយុវជនកម្ពុជា សភាយុវពាណិជ្ជករអន្តរជាតិកម្ពុជា ក្រុមហ៊ុន Emerald Plus ធនាគារស៊ីអាយអឹមប៊ី និងក្រុមហ៊ុន Bosch ប្រចាំកម្ពុជា ៕
ចែករំលែកព័តមាននេះ