រាជធានីភ្នំពេញ ៖ មន្ត្រីក្រុមប្រឹក្សាឃុំ-សង្កាត់២រូបមកពីគណបក្សសង្គ្រោះជាតិ បានសរសេរលិខិតចុះចូលជាមួយគណបក្សប្រជាជនកម្ពុជា ក្រោយពីសម្តេចតេជោ ហ៊ុន សែន ប្រកាសជាចំហរឱ្យមេឃុំ-ចៅសង្កាត់ ក៏ដូចជាក្រុមប្រឹក្សាឃុំ ខណ្ឌ ក្រុងទាំងអស់របស់បក្សប្រឆាំងចូលមកបក្សកាន់អំណាចបើសិនជាមិនចង់បាត់បង់តំណែងពេលបក្សប្រឆាំងត្រូវរំលាយនោះ ។
លោក ចាន់ ចយ អាយុ៦៥ឆ្នាំ ជំទប់ទី១ ឃុំចំប៉ី ស្រុកបាទី ខេត្តតាកែវ មកពីគណបក្សសង្គ្រោះជាតិកាលពីថ្ងៃទី២៣ ខែតុលា ឆ្នាំ២០១៧ បានសុំចូលរួមជាមួយគណបក្សប្រជាជន ព្រោះលោកបានយល់ថា លោក កឹម សុខា ជាជនក្បត់ជាតិមែន។ នេះបើតាមលិខិតផ្ញើជូនលោក ប៊ិន ឈិន ប្រធានក្រុមគណៈកម្មពង្រឹងមូលដ្ឋានគណបក្សប្រជាជនកម្ពុជាប្រចាំខេត្តតាកែវ។
លោក ចាន់ ចយ បានបញ្ជាក់ថា «លោក កឹម សុខា ជាជនក្បត់ជាតិ មានគោលបំណងផ្តួលរំលំរាជរដ្ឋាភិបាលស្របច្បាប់ដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនិងគណបក្សប្រជាជនកម្ពុជា ផ្ទុយពីរដ្ឋធម្មនុញ្ញ និងឆន្ទៈរាស្ត្រទូទាំងប្រទេស»។ លោកថា គណបក្សសង្គ្រោះជាតិពុំមានភាពរឹងមាំផ្នែកនយោបាយផ្ទៃក្នុងការបំពេញតួនាទីបំរើប្រជាពលរដ្ឋដូចជា គណបក្សប្រជាជនកម្ពុជាឡើយ។
ចំណែក ស្មាន ហ៊ីម អាយុ៥២ឆ្នាំ សមាជិកក្រុមប្រឹក្សាសង្កាត់ច្រាំងចំរេះទី១ មកពីគណបក្សសង្គ្រោះជាតិបានសុំចូលរួមជាមួយគណបក្សប្រជាជកម្ពុជា ដោយបានបញ្ជាក់ថាលោកស្មានតែគណបក្សសង្គ្រោះជាតិតស៊ូដណ្តើមអំណាចតាមរយៈការបោះឆ្នោតតាមលទ្ធិប្រជាធិបតេយ្យពិតប្រាកដ។
លោកបានលើកឡើងថា៖ «ប៉ុន្តែក្រោយពីខ្ញុំបានឃើញវីដេអូឃ្លីប និងសកម្មភាពជាក់ស្តែងញុះញង់បំបែកបំបាក់ខ្មែរជាពីរ»។ លោកថា លោក កឹម សុខា និងគណបក្សសង្គ្រោះជាតិសុខចិត្តឱនក្បាលបំរើបរទេសគឺ ដើម្បីតែអំណាចមិនគិតមហន្តរាយជាតិមាតុភូមិនេះ ហើយជាអំពើក្បត់ជាតិ។ កាលពីម្សិលមិញលោក ប៉ុល ហំម អនុប្រធានគណបក្សសង្គ្រោះជាតិបានថ្លែងប្រាប់អ្នកសារព័ត៌មានថា លោកមិនទាន់ដឹងថាមានអ្នកទៅចុះចូលជាមួយអ្នកបក្សប្រជាជននោះទេ។ លោកថា ៖ «ពួកគាត់ជាតំណាងប្រជាពលរដ្ឋ គាត់ទៅណាទៅៗ។ ចង់អ្នកណាទៅណាទៅ តែពលរដ្ឋនៅតែដដែលហ្នឹង»។
ចែករំលែកព័តមាននេះ