រាជធានីភ្នំពេញ ៖ ប្រភពព័ត៌មានបានឲ្យដឹងថា តុលាការកំពូលគ្រោងនឹងយកសំណុំរឿងបណ្តឹងសារទុក្ខរបស់ទណ្ឌិត ហេង ពៅ អតីតស្នងការនគរបាលរាជធានីភ្នំពេញ ជាមេខ្លោងសង្គមងងិត មកបើកសវនាការជំនុំជម្រះ (សរុប) ក្នុងពេលឆាប់ៗខាងមុខនេះ ។ ប្រភព័ត៌មានឲ្យដឹងទៀតថា ទណ្ឌិត ហេង ពៅ ដែលកំពុងជាប់ឃុំនៅក្នុងពន្ធនាគារ មានសំណុំរឿងពាក់ពន្ធបទឧក្រិដ្ឋជាច្រើនរឿង ដែលតុលាការថ្នាក់ក្រោម (សាលាដំបូង និងសាលាឧទ្ធរណ៍) ត្រូវបានលើកយកមកបើកសវនាការជំនុំជម្រះទោសរួចហើយនោះ ដែលទោសសរុបទាំងអស់នោះមិនក្រោមពី១០៤ឆ្នាំទេ ។
ជាក់ស្តែងសំណុំរឿងទណ្ឌិត ហេង ពៅ ពាក់ពន្ធករណី ៖
១.បាញ់សម្លាប់លោក សុក សេដ្ឋាមុនី ចៅក្រមសាលាដំបូងរាជធានីភ្នំពេញ នៅចំណុចភ្លើងស្តុបផ្លូវត្រសក់ផ្អែម កែងនិងមហាវិថីព្រះមុន្នីរ៉េត សង្កាត់បឹងកេងកង១ ខណ្ឌចំការមន ខណៈជនរងគ្រោះកំពុងជិះក្នុងរថយន្តធ្វើដំណើរទៅកន្លែងធ្វើការ ។
២.សំណុំរឿងបាញ់ប្រហារលើលោក ឈឹម ដារ៉ាវុធ ប្រធានសាខាអគ្គិសនីចក្រអង្រែក្រោម នៅក្បែររបងសាលាវិទ្យាល័យចតុមុខ ស្ថិតក្នុងសង្កាត់ជ័យជំនះ ខណ្ឌដូនពេញ ខណៈជនរងគ្រោះកំពុងរង់ចាំទទួលកូនចេញពីសាលា បណ្តាលឲ្យពិការភាពយ៉ាងធ្ងន់ធ្ងរ ដែលដើរមិនបានរហូតដល់សព្វថ្ងៃនេះ ។
៣.សំណុំរឿងបាញ់ប្រហារលើលោកឧកញ៉ា ថុង អ៊ុយប៉ាង ស្ថាបនិក និងទីប្រឹក្សាសារព័ត៌មានកោះសន្តិភាព នៅក្នុងវត្តទឹកថ្លា ខណ្ឌសែនសុខ ខណៈលោកឧកញ៉ា និងក្រុមគ្រួសាររៀបចំពិធីសូត្រមន្តឡើងចេតិយ៍ បណ្តាលឲ្យរងរបួសធ្ងន់ធ្ងរ និងអង្គរក្សម្នាក់គឺលោក យឹម ឈឿន ក៏រងរបួសធ្ងន់ធ្ងរដែរ ។
៤.សំណុំរឿងបាញ់ប្រហារប៉ុនប៉ងចូលធ្វើឃាតលើលោក អ៊ុក សាវុធ អគ្គព្រះរាជអាជ្ញាសាលាឧទ្ធរណ៍ កាលលោកនៅជាព្រះរាជអាជ្ញាសាលាដំបូងរាជធានីភ្នំពេញ ។
៥.សំណុំរឿងប៉ុនប៉ងតាមធ្វើឃាតលើលោកនាយឧត្តមសេនីយ៍ សៅ សុខា អគ្គបញ្ជាការរងកងយោពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស តែមិនបានសម្រេច ។
៦.សំណុំរឿងពាក់ពន្ធចាប់ស្រី្តម្នាក់ជាគ្រូបង្រៀននៅខេត្តកំពង់ស្ពឺ យកមកធ្វើទារុណកម្មរហូតដល់ស្លាប់ និងលួចដឹកសាកសពយកទៅទម្លាក់ចោលនៅក្បែរឈាបនដ្ឋានវត្តកោះទាំងយប់ ។
៧.សំណុំរឿងបង្ខាំង និងជម្រិតទារប្រាក់ពីថៅកែភោជនីដ្ឋានម្នាក់ ដែលមានទីតាំងស្ថិតអតីតគុកតេ៣ សង្កាត់ជ័យជំនះ ខណ្ឌដូនពេញ ។
៨.សំណុំរឿងរក្សាទុកប្រាក់ដុល្លារអាមេរិកក្លែងក្លាយខុសច្បាប់ នៅក្នុងភូមិគ្រឹះលេខ៩ ឃុំតាខ្មៅ ខេត្តកណ្តាល កន្លះលានដុល្លារ ដែលត្រូវបានសមត្ថកិច្ចដកហូត ។
នៅមានសំណុំរឿងជាច្រើនទៀត ដែលតុលាការថ្នាក់ក្រោម បានសម្រេចផ្តន្ទាទោសទណ្ឌិត ហេង ពៅ ឲ្យជាប់ពន្ធនាគាររយៈពេល១០៤ឆ្នាំ ដោយបច្ចុប្បន្នទណ្ឌិត ហេង ពៅ មានអាយុ៦០ឆ្នាំ ហើយនោះ ។
ប្រភពបន្តថា ពាក់ពន្ធសំណុំរឿងឧក្រិដ្ឋដូចបានរៀបរាប់ខាងលើ ដែលសាលាដំបូង និងសាលាឧទ្ធរណ៍ បានសម្រេចផ្តន្ទាទោសនេះ ទណ្ឌិត ហេង ពៅ កើតទុកមិនសុខ បានជាទណ្ឌិត ហេង ពៅ ពឹងពាក់មេធាវីការពារក្តីប្តឹងសារទុកទៅតុលាការកំពូល ដើម្បីឲ្យតុលាការជាន់ខ្ពស់បំផុតនេះកាត់ក្តីរឿងទាំងអស់នោះឡើងវិញ ។ នៅព្រឹកថ្ងៃទី២៤ ខែតុលា ឆ្នាំ២០១៧ ភ្នាក់ការកោះសន្តិភាពបានទទួលទូរស័ព្ទពីលោកមេធាវី ពុធ ធាវី ដែលជាមេធាវីមាត់មិនសំចៃលើផ្លូវច្បាប់ក្នុងពេលសវនាការ និងជាមេធាវីការពារក្តីជូនលោក ឧកញ៉ា ថុង អ៊ុយប៉ាង ចាងហ្វាងសារព័ត៌មានកោះសន្តិភាព បានប្រាប់ឲ្យដឹងថា មុននេះ១ថ្ងៃ លោកបានទទួលដីកាកោះឲ្យចូលរួមសវនាការនៅថ្ងៃទី២៨ ខែវិច្ឆិកា ឆ្នាំ២០១៧ ខាងមុខនេះ ។ លោកមេធាវី ពុធ ធាវី បន្តថា តាមមន្ត្រីតុលាការកំពូលប្រាប់ថា ថ្ងៃទី២៨ ខែវិច្ឆិកា នោះ តុលាការកំពូល និងលើយកសំណុំរឿងទណ្ឌិត ហេង ពៅ ទាំងប៉ុន្មានមកបើសវនាការជំនុំជម្រះ (សរុប) តែមួយថ្ងៃឲ្យចប់តែម្តង ពោលគឺមិនចំណាយពេលច្រើកដងទៀតទេ សំណុំរឿងឧក្រិដ្ឋជន ហេង ពៅ និងគូកន នៅមានច្រើនទៀត បើសរុបអាចមានទោសដល់ជាង២០០ឆ្នាំឯណោះ ដែលពេលនេះគាត់មានអាយុជាង៦០ឆ្នាំហើយ ៕
ចែករំលែកព័តមាននេះ