ខេត្តកណ្តាល ៖ បក្សពួកឃាតកដៃឆៅប្រើដាវកាប់សម្លាប់យុវជនម្នាក់ដែលមកពីចូលរួមកម្មវិធីជប់លៀងមិត្តភក្តិវិញកាលពីយប់ថ្ងៃទី១៥ ខែតុលា ឆ្នាំ២០១៧ ត្រូវបានកម្លាំងកងរាជអាវុធហត្ថខេត្តកណ្តាលធ្វើការស្រាវជ្រាវឃាត់ខ្លួន៣នាក់បន្តបន្ទាប់កាលពីថ្ងៃទី២១ និង ទី២៣ ខែតុលា ឆ្នាំ២០១៧…
ខេត្តកណ្តាល ៖ បក្សពួកឃាតកដៃឆៅប្រើដាវកាប់សម្លាប់យុវជនម្នាក់ដែលមកពីចូលរួមកម្មវិធីជប់លៀងមិត្តភក្តិវិញកាលពីយប់ថ្ងៃទី១៥ ខែតុលា ឆ្នាំ២០១៧ ត្រូវបានកម្លាំងកងរាជអាវុធហត្ថខេត្តកណ្តាលធ្វើការស្រាវជ្រាវឃាត់ខ្លួន៣នាក់បន្តបន្ទាប់កាលពីថ្ងៃទី២១ និង ទី២៣ ខែតុលា ឆ្នាំ២០១៧ ។
លោក ទូច អ៊ីណាន មេបញ្ជាការរងទទួលផែនយុត្តិធម៌កងរាជអាវុធហត្ថខេត្តកណ្ដាលបាមឱ្យដឹងថា ជនសង្ស័យ៣នាក់ដែលបានចាប់ខ្លួនក្នុងចំណោមបក្សពួក៦នាក់ និងបក្សពួកចំនួន៣នាក់ទៀតកំពុងគេចខ្លួន មានទីលំនៅភូមិទួលដូង ឃុំគគីរ ស្រុកគៀនស្វាយ ខេត្តកណ្តាល ។ ជនសង្ស័យ៣នាក់ដែលឃាត់ខ្លួនខាងលើបានជិះម៉ូតូមួយគ្រឿងឌុបគ្នាមានដាវ១ដើមធ្វើសកម្មភាពកាប់ទៅលើជនរងគ្រោះម្នាក់ ឈ្មោះ រស្មី សាម៉ាឌី ភេទប្រុស អាយុ១៨ឆ្នាំ មានលំនៅភូមិដូនស ឃុំគគីរ ស្រុកកៀនស្វាយ ខេត្តកណ្តាល ស្លាប់ភ្លាមៗ និងអ្នករួមដំណើរជាមួយជនរងគ្រោះឈ្មោះ គៀត ភារម្យ ភេទប្រុស អាយុ១៨ឆ្នាំ មានទីលំនៅភូមិទួលដូង ឃុំគគីរ ស្រុកកៀនស្វាយ ខេត្តកណ្តាល (អ្នកឌុប) និងឈ្មោះ ធី ប៊ុនធីម ភេទប្រុស អាយុ១៧ឆ្នាំ មានទីលំនៅភូមិព្រែកតាមេម ឃុំព្រែកស្តី ស្រុកកោះធំ ខេត្តកណ្តាល (ជិះកណ្តាល) ។ លោកមេបញ្ជាការរងបានឱ្យដឹងបន្ថែមថា នៅវេលាម៉ោង៥និង៣០នាទីរសៀលថ្ងៃទី១៥ ខែតុលា ឆ្នាំ២០១៧ បក្សពួកជនសង្ស័យឈ្មោះ ប៉ែត ឈ្មោះ លីន និងឈ្មោះ ធា (ជិះម៉ូតូពីរគ្រឿង) មកប្រាប់ឈ្មោះ ពេញ ស៊ីណេង ឈ្មោះ ស៊ឹម រិទ្ធី និងឈ្មោះ ហួ កុសល់ ថា ផ្ទះផឹកស៊ីគប់ខ្ញុំ (ផ្ទះ គាត ភារម្យ ស្ថិតក្នុងភូមិទួលដូង ឃុំគគីរ ស្រុកកៀនស្វាយ ខេត្តកណ្តាល) និយាយគ្នាចប់អ្នកទាំង៦នាក់ ជិះម៉ូតូទៅមកៗកាត់មុខផ្ទះនោះរង់ចាំធ្វើសកម្មភាពរករឿងក្រុមជនរងគ្រោះ ។
លុះដល់ម៉ោង៩និង៣០នាទីយប់ក្រុមជនរងគ្រោះឈ្មោះ គៀត ភារម្យ និងឈ្មោះ ធី ប៊ុនធីម បានជូនជនរងគ្រោះឈ្មោះ រស្មី សាម៉ាឌី មកផ្ទះវិញដោយជិះម៉ូតូមួយគ្រឿងម៉ាកវ៉េវ ពណ៌ស គឺឈ្មោះ គៀត ភារម្យ ជាអ្នកឌុបចំណែកឈ្មោះ ធី ប៊ុនធីម អង្គុយកណ្តាល ចំណែក ឈ្មោះ រស្មី សាម៉ាឌី អង្គុយខាងក្រោយ ។ មកដល់ចំណុចកើតហេតុលើផ្លូវលំភូមិដូនស ឃុំគគី ស្រុកកៀនស្វាយ ក៏ស្រាប់តែក្រុមជនសង្ស័យមានម៉ូតូមួយគ្រឿងជិះឌុបគ្នា២នាក់មានឈ្មោះ ស៊ឹម រិទ្ធី ហៅ ជ្រូក ជាអ្នកឌុប និងឈ្មោះ ពេញ ស៊ីណេង ហៅ ឡេង អង្គុយពីក្រោយកាន់ដាវ១ដើមផងជិះក្នុងទិសដៅស្របគ្នាហើយបានកាប់មកលើឈ្មោះ រស្មី សាម៉ាឌី ចំខាងក្រោមគុម្ពត្រចៀកខាងឆ្វេងបណ្តាលឲ្យដាច់រយះប្រវែង៥.៥០សង់ទីម៉ែត្រស្លាប់ភ្លាមៗនៅកន្លែងកើតហេតុ ចំណែកឯជនសង្ស័យពេលធ្វើសកម្មភាពរួចបិតភ្លើងម៉ូតូជិះរត់គេចខ្លួនដោយយកវត្ថុតាងទៅជាមួយ ។ បន្ទាប់មកកំលាំងកងរាជអាវុធហត្ថស្រុក និងខេត្តបានធ្វើការស្រាវជ្រាវរហូតកំណត់មុខសញ្ញា ក្រុមជនសង្ស័យឈានដល់ចាប់ខ្លួនបានបីនាក់ខាងលើ ជនដៃដល់ និងអ្នកសមគំនិត្យក្នុងអំពើឃាតកម្មនេះ ។ ជនសង្ស័យទាំងបីនាក់ដែលឃាត់ខ្លួនបាននេះបានកសាងសំណុំរឿងដើម្បីបញ្ជូនទៅកាន់តុលាការចាត់ការបន្តតាមច្បាប់ ៕
ចែករំលែកព័តមាននេះ