ខេត្តកណ្ដាល ៖ បុរសចិត្តហានម្នាក់ត្រូវបាននគរបាលស្រុកកណ្ដាលស្ទឹងចាប់ខ្លួនបន្ទាប់ពីមានទំនាស់ពាក្យសំដី ជាមួយក្រុមគ្រួសារខាងប្រពន្ធ និងខឹងប្រពន្ធមិនដេកជាមួយហើយលួចដុតផ្ទះម្ដាយក្មេកឆេះអស់ម៉ដ្ឋកាលពីវេលាម៉ោង៣នឹង៣០នាទីទៀបភ្លឺឈានចូល ថ្ងៃទី២៣ ខែតុលា ឆ្នាំ២០១៧ នៅភូមិកោះខ្នុរថ្មី ឃុំព្រែករកា ស្រុកកណ្តាលស្ទឹង ខេត្តកណ្តាល ។
មន្ត្រីនគរបាលស្រុកកណ្ដាលស្ទឹងបានឱ្យដឹងថា ជនសង្ស័យដែលបានចាប់ខ្លួនឈ្មោះ សុវណ្ណ វណ្ណះ ភេទប្រុសអាយុ២៧ឆ្នាំ រស់នៅភូមិ-ឃុំកើតហេតុខាងលើ មុខរបរកសិករ ។ ចំណែកជនររងគ្រោះ ជាម្ដាយក្មេក និងជាម្ចាស់ផ្ទះឈ្មោះ ប្រាក់ សួន អាយុ៦៣ឆ្នាំ រស់នៅភូមិ-ឃុំកើតហេតុខាងលើ មានមុខកសិករ ។ សម្ភារខូចខាតរួមមាន ផ្ទះមួយខ្នង ម៉ូតូគប់ជ្រុងមួយគ្រឿង ពណ៏ទឹកសមុទ្រ ទូរស័ព្ទ៣គ្រឿង ទូរទស្សន៍២គ្រឿង និងសម្ភារប្រើប្រាស់ក្នុងផ្ទះ ។
នគរបាលបានឱ្យដឹងទៀតថា ជនសង្ស័យជាមនុស្សផឹកស្រា ញៀនថ្នាំ និងធ្លាប់មានទំនាស់ពាក្យសំដីជាមួយប្រពន្ធជាញឹកញាប់ មុនពេលកើតហេតុយប់ថ្ងៃទី២២ ខែតុលា ឆ្នាំ២០១៧ ជនសង្ស័យមានទំនាស់ពាក្យសំដី ជាមួយប្រពន្ធព្រោះប្រពន្ធមិនទៅដេកជាមួយ ។ ជនសង្ស័យបានរករឿងប្រពន្ធ ឪពុកម្តាយក្មេក និងបងប្អូនខាងប្រពន្ធ ដែលជាអ្នករស់នៅក្នុងផ្ទះជាមួយ និងគំរាមដុតផ្ទះទៀតផង ។ ពេលនោះប្រពន្ធ ឪពុកម្តាយក្មេក និងបងប្អូន ខាងប្រពន្ធមិនបានសំរាកនៅលើផ្ទះទេ ដោយនាំគ្នាមកសំរាកនៅលើគ្រែក្រោមផ្ទះព្រោះខ្លាចជនសង្ស័យដុតផ្ទះ ។ បន្ទាប់មកជនរងគ្រោះ និងក្រុមគ្រួសារក៏នាំគ្នាសំរាកលង់លក់ទៅ ។ ចំណែកជនសង្ស័យដេកនៅលើផ្ទះលុះដល់វេលាម៉ោង៣នឹង៣០នាទីទៀបភ្លឺដែលជាម៉ោងកើតហេតុជនសង្ស័យក៏បានយកខោអាវគដុតនៅលើពូកដុតឆេះផ្ទះ ក្រុមគ្រួសារខាងប្រពន្ធខំពន្លត់មិនរលត់បណ្តាលឲ្យឆេះខូចខាតអស់ទាំងស្រុង ។ ក្រោយកើតហេតុនគរបាលក៏ចុះដល់កន្លែងកើតហេតុរួចធ្វើការឃាត់ខ្លួនជនសង្ស័យទៅកាន់អធិការដ្ឋានដើម្បីកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ