ខេត្តកំពត ៖ ក្រុមក្មេងទំនើងពីរក្រុមបានបើកឆាកប្រយុទ្ឋគ្នាយ៉ាងសាហាវនៅលើស្ពានព្រែកកំពង់បាយ ហៅស្ពានថ្មថ្មី បណ្តាលឲ្យភាគីម្ខាងដែលមានគ្នាបីនាក់ដែលកំពុងឈរចាំមិត្តនៅលើស្ពានបានលោតទឹកពីលើស្ពានទាំងបីនាក់ដើម្បីគេចខ្លួនឲ្យផុតពីមុខដាវសាម៉ូរ៉ៃពីភាគីដែលដេញកាប់ ប៉ុន្តែការលោតទឹកនេះបានហែលរួចលើច្រាំងបានពីរនាក់ រីឯម្នាក់ទៀតបានបាត់ខ្លួនរហូតមកដល់ព្រឹកថ្ងៃទី២២ ខែតុលា ឆ្នាំ២០១៧ ។ ហេតុការនេះកើតឡើងកាលពីវេលាម៉ោង២នឹង៣០នាទីរំលងអធ្រាត្រឈានចូលថ្ងៃទី២២ ខែតុលា ឆ្នាំ២០១៧ នៅចំណុចលើស្ពានថ្មព្រែកកពង់បាយ ស្ថិតនៅក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ។
បើតាមភាគីខាងជនរងគ្រោះឈ្មោះ អូន តេង ភេទប្រុស អាយុ១៧ឆ្នាំ មានទីលំនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប បានប្រាប់សមត្ថកិច្ចថា នៅមុនពេលកើតហេតុពួកខ្លួនមានគ្នា៦នាក់ជិះម៉ូតូពីរគ្រឿងចេញមកពីលេងវត្តអង្គគ្រឹស្នា ក្នុងឃុំត្រពាំងព្រីង ស្រុកទឹកឈូ នៅវេលាម៉ោង១រំលងអធ្រាត្រឈានចូលថ្ងៃទី២២ ខែតុលា ឆ្នាំ២០១៧ មកដល់ក្រុងកំពតត្រង់ចំណុចហាត់ប្រាណក្បែរកីឡាទឹកខាងត្បូងសាលាខេត្តបាននាំគ្នាហាត់ ប្រាណរហូតដល់ម៉ោង២នឹង៣០នាទី ទើបឈប់ហាត់ក៏ជិះម៉ូតូមករកកន្លែងចាក់សាំងពេលជិះម៉ូតូទាំងពីរគ្រឿងមានគ្នា៦នាក់មកដល់លើស្ពានមិត្តភក្តិបីក៏ឲ្យឈប់ម៉ូតូពួកគេបីនាក់ចុះចាំនៅទីនោះហើយឲ្យម៉ូតូដែលទៅចាក់សាំងទាំងពីរចាក់រួចចាំដឹកពួកគេទៅផ្ទះវិញ ។ ពេលខ្លួន និងមិត្តភក្តិដែលទៅចាក់សាំងម៉ូតូទាំងនៅមុខក្លឹបដ្គ្រាហ្គ្រិនរួចត្រឡប់មកយកមិត្តភក្តិវិញស្រាប់តែបាត់ពួកគេទាំងបីនាក់ ហើយឃើញម៉ូតូជនបង្កនៅបើកម៉ូតូត្រឡប់ចុះត្រឡប់ឡើងពេលនោះខ្លួនក៏ពុំបានចាប់អារម្មណ៍ថា ពួកនេះមានបំណងអ្វីដែរ ។ លុះបាត់មិត្តភក្តិមិនឃើញក៏ស្រែកហៅផង ដើររកផងក៏ឃើញមិត្តភក្តិម្នាក់ហែលទឹក នៅឱបសរសរស្ពានម្នាក់ទៀតហែលទៅឡើងនៅខ្ចុះហាងតាឪ ក៏ហៅឡើងមក រីឯម្នាក់ទៀតបានបាត់ខ្លួនរកមិនឃើញតាំងពីពេលនោះមក ។ ពេលមានហេតុការនេះកើតឡើងរួចខ្លួនក៏បានឃើញសមត្ថកិច្ចនៅយាមក្បែរស្ពានជួយអន្តរាគមរាយការមកកំលាំងអធិការក្រុង ហើយកំលាំងអធិការក្រុងកំពតក៏បាននាំខ្លួនក្រុមរបស់ខ្លួនដែលនៅសល់គ្នាចំនួន៥នាក់បាត់ម្នាក់ទៅកាន់អធិការក្រុងបន្ទាប់ពីមានហេតុការនោះមក ។
សមត្ថកិច្ចនគរបាលក្រុងឲ្យដឹងថា ក្រុមភាគីដែលត្រូវភាគីបង្កដេញកាប់ប្រហារដោយដាវម៉ូរ៉ៃទាំង៦នាក់ រីឯភាគីខាងជនបង្កមានគ្នាចំនួន៨នាក់សមត្ថកិច្ចកំពុងស្រាវជ្រាវដោយសមត្ថកិច្ចក្តាប់បានមុខសញ្ញាខ្លះៗហើយ ។ រីឯភាគីរងគ្រោះដែលបាត់ខ្លួនសមត្ថកិច្ចកំពុងសហការជាមួយក្រុមគ្រួសារដើម្បីស្រាវជ្រាវរកសាកសពរហូតដល់ម៉ោ១០នឹង១៥នាទីព្រឹកនេះនៅមិនទាន់រកឃើញនៅឡើយ ៕
ចែករំលែកព័តមាននេះ