រាជធានីភ្នំពេញ ៖ ដោយមានគោលបំណងចង់ថែរក្សា និងលើកកម្ពស់វិស័យសិល្បៈបុរាណនោះ អង្គការសិល្បៈខ្មែរអមតៈបាននិងកំពុងបណ្តុះបណ្តាលកូនខ្មែរជំនាញក្រោយជាច្រើននាក់ និងជាច្រើនទម្រង់សិល្បៈ ។លោកសុង សែង អ្នកគ្រប់គ្រងកម្មវិធីរបស់អង្គការសិល្បៈខ្មែរអមតៈ ឱ្យដឹងថា អង្គការនេះបានបង្កើតឡើងនៅក្នុងឆ្នំា១៩៩៨ ដោយអាណិកជនខ្មែរលោក អាន ចនផន ។
ពេលនោះអង្គការមានឈ្មោះថា «គម្រោងព្រឹទ្ធាចារ្យខ្មែរ»។ ការបង្កើតគម្រោងនេះឡើង គឺដោយសារលោកអាន ចនផន មើលឃើញពីការបាត់បង់សិល្បៈបុរាណខ្មែរដែលត្រូវបំផ្លាញដោយរបបខ្មែរក្រហម និងដោយមានការគាំទ្រពីមនុស្សមួយក្រុមតូចនៅសហរដ្ឋអាមេរិកនោះ លោកបង្កើតកម្មវិធីសម្តែងសិល្បៈនៅក្នុងឆ្នាំ ១៩៩៨ ដោយគ្រូសិល្បៈខ្មែរ ។ ចាប់ពីពេលនោះមក ក៏បានក្លាយទៅជាអង្គការសិល្បៈខ្មែរអមតៈ។
លោកសុង សែង បន្តថា ជាដំបូងកម្មវិធីនេះបានជួយគាំទ្រដល់គ្រូសិល្បៈចំនួន៤រូបដែលលោកអាន ចនផន បានស្វែងរកឃើញ ហើយទិញឧបករណ៍ ជួលកន្លែងបង្រៀន និងរកប្រាក់កម្រៃបន្តិចបន្តួច ។ នាឆ្នាំនោះអង្គការបានបង្កើតជា៣ថ្នាក់រៀន ដោយថ្នាក់មួយនៅក្នុងខេត្តបន្ទាយមានជ័យ បង្រៀនទម្រង់ភ្លេងល្ខោនបាសាក់ ចំណែកថ្នាក់មួយទៀតនៅក្នុងខេត្តបាត់ដំបង បង្រៀនទម្រង់ភ្លេងការសម័យកណ្តាល និងនៅភ្នំពេញបង្រៀនទម្រង់ភេ្លងមហោរី ។ ទាំងបីថ្នាក់នេះ បណ្តុះបណ្តាលដោយព្រឹទ្ធាចារ្យចំនួន៥រូប មានព្រឹទ្ធាចារ្យ នង ចក់ យៀន ម៉ាក់ អ្នកគ្រូចេក ម៉ាច លោកយឹម សាំង និងព្រឹទ្ធាចារ្យឯក សំ ។ លុះក្រោយមកទៀត អង្គការបានទៅបង្កើតតាមបណ្តាខេត្តផ្សេងៗទៀត ពោលគឺទម្រង់ណាដែលចង់បាត់បង់ គឺអង្គការទៅបង្កើតភ្លាម ក្នុងនោះបានបណ្តុះបណ្តាលទម្រង់ផ្សេងៗទៀតដូចជា ភ្លេងពិណពាទ្យ របាំបុរាណរបស់ជនជាតិឈ្មោះថា មិុម កន្ត្រំមីង ល្ខោនស្រមោលស្បែកធំ និងភ្លេងការបុរាណ ។
អ្នកគ្រប់គ្រងកម្មវិធីរបស់អង្គការូបនេះ ឱ្យដឹងថា រហូតមកដល់ពេលនេះអង្គការបានបង្កើតរហូតដល់១៦ថ្នាក់ មានសិស្សជាង៣០០នាក់ ស្ថិតនៅកន្លែងផ្សេងៗគ្នា ។ នៅភ្នំពេញមាន៦ថ្នាក់ សិស្ស១៣៩នាក់,នៅខេត្តតាកែវ១ថ្នាក់ មានសិស្ស១៤នាក់,ខេត្តសៀមរាប៤ថ្នាក់ មានសិស្ស៥៦នាក់,ខេត្តរតនគិរី១ថ្នាក់ មានសិស្ស២៥នាក់,ខេត្តកំពង់ស្ពឺ១ថ្នាក់ មានសិស្ស១៤នាក់ ,ខេត្តកណ្តាល១ថ្នាក់ មានសិស្ស១១នាក់,ខេត្តបាត់ដំបង១ថ្នាក់ មានសិស្ស១៤នាក់ និងខេត្តបន្ទាយមានជ័យ១ថ្នាក់ មានសិស្ស៩នាក់ ។
អង្គការមិនមានមជ្ឈមណ្ឌលកណ្ដាលណាមួយដើម្បីបង្ហាត់បង្រៀនសិស្សទាំងអស់បានទេ គឺបង្ហាត់សិស្សទៅតាមតំបន់ដែលលោកគ្រូព្រឹទ្ធាចារ្យរស់នៅតែម្តង ។ ក្រោយពេលសិស្សបានទទូលចំណេះដឹងពីព្រឹទ្ធាចារ្យទាំងអស់នោះហើយ អង្គការបង្កើតកម្មវិធីសម្តែង ដោយទាក់ទងទៅខាងក្រៅ ប្រសិនបើមានអ្នកណាដែលចង់ជួលសម្តែងនោះ គឺយើងរៀបចំឱ្យពួកគាត់ ។ ដោយមើលឃើញថា ព្រឹទ្ធាចារ្យដែលនៅសេសសល់នោះមានវ័យកាន់តែចាស់ជរា ទើបអង្គការបង្កើតជាស្ទូឌីយោថតបទចាស់ៗទាំងឡាយទុកជាឯកសារការពារពេលដែលពួកគាត់ស្លាប់ទៅនៅតែរក្សាស្នាដៃពួកគាត់មិនឱ្យបាត់បង់ ។
ក្រោយមកអង្គការបានផ្លាស់ប្តូរកម្មវិធីមួយចំនួនដោយក្នុងនោះកម្មវិធីបង្រៀនប្តូរឈ្មោះ មកជាការអប់រំសិល្បៈតាមសហគមន៍វិញ ព្រោះសិស្សដែលទទួលបានការបណ្តុះបណ្តាលមិនត្រឹមតែចេះសម្តែងទេ តែពួកគេក៏អាចបង្ហាត់បង្រៀនដល់សិស្សជំនាន់ក្រោយៗទៀតបានដែរ ។ ដោយឡែកអង្គការមានគម្រោងបន្ថែមលើទម្រង់សិល្បៈចំនួន១១ ដែលកំពុងតែបង្រៀនសិស្ស ដោយបញ្ចូលទម្រង់សិល្បៈថ្មីចំនួន៤ទម្រង់ទៀត ក្នុងនោះ៣ជាទម្រង់ល្ខោន និង១ជាទម្រង់តន្ត្រី ។
លោកសុង សែង បញ្ជាក់ថា អង្គការសិល្បៈខ្មែរអមតៈ នឹងរៀបចំកម្មវិធីសម្តែងលក់សំបុត្រមួយមានឈ្មោះ«ផ្លែផ្កា»ចាប់ពីថ្ងៃទី២៥ តុលា ខាងមុខនេះ នៅសារមន្ទីរជាតិពីថ្ងៃចន្ទ រហូតដល់ថ្ងៃសៅរ៍ ។ កម្មវិធីសម្តែងនេះ មានយីកេរឿងម៉ាក់ថឺង របាំរបស់ក្រុមកុមារ ល្ខោនបាសាក់ របាំប្រពៃណី និងបុរាណ និងល្ខោនតន្ត្រី ឬល្ខោននិយាយទាក់ទងនឹងដំណើរជីវិតរបស់មនុស្ស ។ ដោយឡែកនៅពាក់កណ្តាលខែវិច្ឆិកា គ្រោងនឹងរៀបចំមហោស្រពដ៏ធំមួយឈ្មោះថា «សិល្បៈយុវជនខ្មែរ»រយៈពេល៨ថ្ងៃ ដោយមានការចូលរួមពីបណ្តាអង្គការផ្សេងៗទៀតជាច្រើននៅទូទាំងប្រទេស ។
អង្គការសិល្បៈខ្មែរអមតៈ បណ្តុះបណ្តាលតែទៅលើសិល្បៈទស្សនីយភាពប៉ុណ្ណោះ ដោយក្នុងនោះនៅភ្នំពេញមានទម្រង់សិល្បៈរបាំប្រពៃណីបុរាណ ចាបីុដងវែង ពិណពាទ្យ យីកេ និងចម្រៀងមហោរី ចំណែកនៅខេត្តកណ្តាលមានពិណពាទ្យ ខេត្តតាកែវមានភ្លេងការបុរាណ កំពង់ស្ពឺបង្ហាត់ទម្រង់ស្មូត្រ រតនគិរីបង្ហាត់មិុមជាឧបករណ៍ជនជាគ្រឹង និងខេត្តសៀមរាបបង្ហាត់កន្ត្រំមីង ជាភ្លេងកំដរបុណ្យសព និងទម្រង់ល្ខោនស្រមោលស្បែកធំ ៕
ចែករំលែកព័តមាននេះ