ស្ត្រីទី១ វ័យចំណាស់របស់ខ្មែរក្រហម លោកស្រី អៀង ធីរិទ្ធ ត្រូវបានអង្គជំនុំជម្រះសាលាដំបូងបានចេញសេចក្តីសម្រេចលើការវាយតម្លៃឡើងវិញអំពីសម្បទាខាងបញ្ញាស្មារតី ដោយលើកលែងការឃុំខ្លួននៅក្នុងពន្ធនាគារ កាលពីព្រឹកថ្ងៃទី១៣ កញ្ញា ២០១២ ហើយអនុញ្ញាតឱ្យលោកស្រីជរារូបនេះទៅរស់នៅក្នុងលំនៅឋានផ្ទាល់ខ្លួន ដោយសារតែគាត់មានជំងឺវង្វេងវង្វាន់ធ្ងន់ធ្ងរមិនអាចចូលរួមក្នុងសវនាការតទៅទៀតបាន ។
ផ្អែកតាមរបាយការណ៍ និងសក្ខីកម្មរបស់អ្នកជំនាញផ្នែកវេជ្ជសាស្ត្រដែលត្រូវបានតែងតាំងដោយតុលាការ នៅថ្ងៃនេះអង្គជំនុំជម្រះសាលាដំបូងបានសម្រេចជាថ្មីដោយតម្កល់ទុកនូវសេចក្តីសម្រេចរបស់ខ្លួនពីលើកមុនដែលថា ជនជាប់ចោទអៀង ធីរិទ្ធ មានជំងឺកាន់តែធ្ងន់ធ្ងរឡើងៗ (ជាប្រភេទជំងឺអាលហ្សៃម៉ា Alzheimer ដែលជាជំងឺវង្វេងវង្វាន់ និងភ្លេចការចងចាំ) ហើយគាត់នៅតែមិនមានសម្បទាខាងបញ្ញាស្មារតីគ្រប់គ្រាន់ក្នុងការចូលរួមសវនាការបាន។
ក្រុមអ្នកជំនាញបានបញ្ជាក់ថា រហូតកដល់ពេលនេះការព្យាបាលតាមគ្រប់មធ្យោបាយត្រូវបានប្រើប្រាស់អស់លទ្ធភាពហើយ ហើយការចុះខ្សោយនៃដំណើរការខួរក្បាលរបស់ជនជាប់ចោទនៅតែមិនអាចវិលត្រឡប់មកសភាពធម្មតាវិញបានទេ ។ ដោយសារតែមិនអាចប៉ាន់ស្មានបានថា ជនជាប់ចោទរូបនេះ នឹងអាចត្រូវយកមកជំនុំជម្រះបាននៅពេលណានោះ អង្គជំនុំជម្រះសាលាដំបូងក៏បានសម្រេចតម្កល់ការបំបែកកិច្ចនីតិវិធីនូវបទចោទប្រកាន់ប្រឆាំងនឹងជនជាប់ចោទអៀង ធីរិទ្ធ នៅក្នុងសំណុំរឿង០០២ និងផ្អាកកិច្ចដំណើរការនីតិវិធីប្រឆាំងនឹងជនជាប់ចោទរូបនេះ ដោយមិនកំណត់រយៈពេល។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ