ខេត្តមណ្ឌលគិរី ៖ គំនរឈើប្រណីតរាប់សិបកំណាត់លាក់ទុកនៅលើទីតាំង៤កន្លែងត្រូវបានសមត្ថកិច្ចជំនាញរដ្ឋបាលព្រៃឈើរកឃើញកាលពីព្រឹកថ្ងៃទី១៣ កញ្ញា ២០១២ នៅក្បែរបណ្តោយផ្លូវជាតិលេខ៧៦A ស្ថិតក្នុងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ជាផ្លូវឆ្ពោះទៅច្រកទ្វារទ្វេភាគីដាក់ដាំ ។
ខេត្តមណ្ឌលគិរី ៖ គំនរឈើប្រណីតរាប់សិបកំណាត់លាក់ទុកនៅលើទីតាំង៤កន្លែងត្រូវបានសមត្ថកិច្ចជំនាញរដ្ឋបាលព្រៃឈើរកឃើញកាលពីព្រឹកថ្ងៃទី១៣ កញ្ញា ២០១២ នៅក្បែរបណ្តោយផ្លូវជាតិលេខ៧៦A ស្ថិតក្នុងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ជាផ្លូវឆ្ពោះទៅច្រកទ្វារទ្វេភាគីដាក់ដាំ ។
ឈើប្រណីតទាំងនេះមានប្រភេទនាងនួន ធ្នង់ សុទ្ធតែមានមុខកាត់ធំៗចាប់ពី២០សង់ទីម៉ែត្រគុណ២០សង់ទីម៉ែត្រ ប្រវែង២ម៉ែត្រ និង៦០សង់ទីម៉ែត្រគុណ២០សង់ទីម៉ែត្រ ប្រវែង២,២ម៉ែត្រ មានចំនួនជាង៤០កំណាត់ ប៉ុន្តែមិនទាន់វាស់ដឹងថា ប៉ុន្មានម៉ែត្រគូបនោះទេ ព្រោះមន្ត្រីជំនាញកំពុងធ្វើការដឹកជញ្ជូនយកទៅរក្សាទុកនៅខណ្ឌរដ្ឋបាលព្រៃឈើខេត្ត ដើម្បីធ្វើការវាស់វែងនឹងស្វែងរកម្ចាស់ឈើចាត់ការតាមផ្លូវច្បាប់ ។
ប្រតិបត្តិការចុះបង្ក្រាបទីតាំងលួចលាក់ឈើខាងលើគេសង្កេតឃើញមានតែមន្ត្រីជំនាញរដ្ឋបាលព្រៃឈើតែប៉ុណ្ណោះ ពុំមានការសហការពីកម្លាំងសមត្ថកិច្ចដូចជានគរបាល ឬកងរាជអាវុធហត្ថឡើយ។ បើតាមការបង្ហើបប្រាប់ពីមន្ត្រីរដ្ឋបាលព្រៃឈើម្នាក់សុំមិនបញ្ចេញឈ្មោះបានឱ្យដឹងថា ហេតុដែលមិនមានការសហការជាមួយសមត្ថកិច្ចផ្សេង គឺឈើទាំងនោះគឺជារបស់អ្នកមានអំណាចម្នាក់មានតួនាទីជាមន្ត្រីកងរាជអាវុធហត្ថលើផ្ទៃប្រទេស ដូច្នោះហើយទើបបានជាពួកគេមិនហ៊ានមកក្បែរ ព្រោះតែខ្លាចបុណ្យបារមីម្ចាស់ឈើ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ