ខេត្តស្ទឹងត្រែង ៖ គ្រួសារកសិករមួយរស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ចំណុចគីឡូម៉ែត្រលេខ៨ បាននាំគ្នាអង្គុយនៅលើកៅស៊ូតង់កញ្ចាស់មួយទាំងទឹកមុខក្រៀមក្រំ លាយឡំនឹងភាពព្រលឹងចុងសក់ដែលស្មានមិនដល់ នោះគឺលំនៅឋានរបស់ពួកគាត់ត្រូវខ្យល់ព្យុះបោកបក់រលំបន្ទាប់ពីភ្លៀង១មេបានបង្អុរចុះ ។
ខេត្តស្ទឹងត្រែង ៖ គ្រួសារកសិករមួយរស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ចំណុចគីឡូម៉ែត្រលេខ៨ បាននាំគ្នាអង្គុយនៅលើកៅស៊ូតង់កញ្ចាស់មួយទាំងទឹកមុខក្រៀមក្រំ លាយឡំនឹងភាពព្រលឹងចុងសក់ដែលស្មានមិនដល់ នោះគឺលំនៅឋានរបស់ពួកគាត់ត្រូវខ្យល់ព្យុះបោកបក់រលំបន្ទាប់ពីភ្លៀង១មេបានបង្អុរចុះ ។
ទាក់ទិននឹងហេតុការណ៍នេះ ម្ចាស់លំនៅឋាននិយាយថា កាលពីវេលាម៉ោង១០ និង៣០នាទីយប់ថ្ងៃទី១០ កញ្ញា ខណៈពួកគាត់កំពុងលង់លក់ក្នុងដំណេក ស្រាប់តែមានភ្លៀងមួយមេបានបង្អុរចុះ និងមានផ្គររន្ទះ សន្ធឹកខ្យល់មកពីទិសខាងកើតបោកបក់ចំផ្ទះរបស់គាត់ ធ្វើឱ្យទាំងមនុស្ស និងផ្ទះប៉ើងខ្ទាតចម្ងាយប្រមាណជា១០ម៉ែត្រ ផ្ងារជើងឡើងលើចាក់មនុស្សចុះក្រោមនិងបណ្តាលឱ្យស្ត្រីម្នាក់រងរបួសស្មាខាងឆ្វេង និងសន្លប់អស់រយៈពេលជិត១ម៉ោង ។
បុរសឈ្មោះសេង យ៉ុន អាយុ៣៨ឆ្នាំ ជាកសិករ និងជាស្វាមីរបស់ស្ត្រីរងរបួសឱ្យដឹងថា ពេលកើតហេតុនោះរូបគាត់មិនបាននៅផ្ទះទេ ព្រោះជាប់រវល់ទៅកំដរសពនៅផ្ទះអ្នកជិតខាង គឺនៅតែប្រពន្ធនិងកូន៣នាក់ ម្តាយក្មេក និងប្អូនស្រីម្នាក់នៅចាំផ្ទះ។ នៅវេលាម៉ោងជាង១០ យប់នោះ ខណៈពេលកំពុងអង្គុយកំដរសព គាត់បានឮសំឡេងខ្យល់បោកបក់យ៉ាងខ្លាំង លុះមួយសន្ទុះក្រោយមកក៏ឮសំឡេងដូចជាមានអ្វីធ្លាក់ពីលើមេឃ ហើយពេលនោះគាត់គិតថាប្រហែលជាបាក់ដើមឈើ តែផ្ទុយទៅវិញអ្នករស់នៅក្បែរខាងបានស្រែកហៅ និងប្រាប់ថា ផ្ទះរបស់គាត់ត្រូវខ្យល់បក់ប៉ើងខ្ទាតផ្ងារជើងឡើងលើទៅហើយ ។ ខណៈនោះរូបគាត់រន្ធត់ចិត្តយ៉ាងខ្លាំងព្រោះមិនដឹងថា មនុស្សនៅក្នុងផ្ទះរងគ្រោះយ៉ាងណានោះទេ ។
បុរសឈ្មោះសេង យ៉ុន រៀបរាប់ទៀតថា ក្រោយពីមានឧប្បត្តិហេតុនេះ រូបគាត់និងអ្នកភូមិក្បែរខាង ក៏រត់ទៅជួយ ពេលនោះម្តាយក្មេក និងប្អូនស្រីបានវារចេញពីក្នុងផ្ទះ ចំណែកកូនរបស់គាត់ទាំង៣នាក់យំស្ទើរតែបាត់ស្មារតីទៅហើយ ។ ពេលទៅដល់ គាត់បានលើកបីកូនទាំង៣នាក់ចេញមកក្រៅ និងចូលទៅបីប្រពន្ធចេញមកទៀត ហើយនឹកស្មានប្រពន្ធស្លាប់បាត់ទៅហើយ តែផ្ទុយទៅវិញ នៅមានដង្ហើម ហើយអ្នកភូមិនិយាយថា គ្រាន់តែសន្លប់ទេ លុះ១ម៉ោងក្រោយមកប្រពន្ធគាត់ក៏បានដឹងខ្លួន តែនៅមានស្មារតីរន្ធត់នៅឡើយ ។
តាមប្រភពពីកន្លែងកើតហេតុឱ្យដឹងថា នៅយប់ថ្ងៃកើតហេតុនោះ ខ្យល់បានបោកបក់នៅ ចំណុចគីឡូម៉ែត្រលេខ៨នេះ ធ្វើឱ្យបាក់ដើមឈើជាច្រើនដើម និងមានផ្ទះខ្លះប៉ើងដំបូលស័ង្កសី តែសំណាងល្អមិនមានមនុស្សណាម្នាក់រងរបួសធ្ងន់ ឬស្លាប់នោះទេ ។ ក្រោយកើតហេតុ នាព្រឹកថ្ងៃទី១១ កញ្ញា គេឃើញលោកចៅសង្កាត់ស្ទឹងត្រែង និងអធិការរងនគរបាលក្រុងស្ទឹងត្រែងចុះពិនិត្យ ហើយឱ្យគ្រួសាររងគ្រោះមកសាលាសង្កាត់ដើម្បីធ្វើលិខិតស្នើសុំអំណោយ ។
លោកជា វណ្ណ ចៅសង្កាត់ស្ទឹងត្រែងឱ្យដឹងថា គ្រោះធម្មជាតិនេះ មិនបានធ្វើឱ្យគ្រោះថា្នក់ធ្ងន់ធ្ងរដល់មនុស្ស និងទ្រព្យសម្បត្តិច្រើនទេ តែតាមការមើលឃើញ គឺមានរលំដើមឈើមួយចំនួននៅមុខផ្ទះរបស់ប្រជាពលរដ្ឋ និងរលំផ្ទះមួយខ្នងដែលមានទំហំ៤ម៉ែត្រគុណ៥ម៉ែត្រ ប្រក់ស័ង្កសី ធ្វើឱ្យស្រ្តីម្នាក់រងរបួស ។ លោកបន្តថា នៅព្រឹកថ្ងៃទី១២កញ្ញា លោកនាំយកអំណោយមកជូនក្រុមគ្រួសាររងគ្រោះដល់កន្លែងមានដូចជាកៅស៊ូតង់ និងសម្ភារមួយចំនួនទៀត ៕
ចែករំលែកព័តមាននេះ