រាជធានីភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានផ្តល់ឱកាសឱ្យលោកជំទាវ អាណា ម៉ារៀ រ៉ាមៀរ៉េ ឯកអគ្គរដ្ឋទូតថ្មីនៃសាធារណរដ្ឋអាហ្សង់ទីនប្រចាំកម្ពុជាជួបធ្វើសវនាការក្នុងគោលបំណងបង្កើតទំនាក់ទំនងចំណងមិត្តភាព សាមគ្គីភាព និងកិច្ចសហប្រតិបត្តិការទ្វេភាគីរវាងប្រទេសទាំង២ឱ្យកាន់តែល្អប្រសើរឡើង ។ ការជួបទ្វេភាគីនេះបានធ្វើឡើងកាលពីថ្ងៃទី១១ កញ្ញា ២០១២ នៅវិមានរដ្ឋសភា ។
សម្តេចអគ្គមហាពញាចក្រី ហេង សំរិន បានសម្តែងនូវការស្វាគមន៍យ៉ាងកក់ក្តៅចំពោះលោកជំទាវ ដែលលោកជំទាវត្រូវបានតែងតាំងជាឯកអគ្គរដ្ឋទូតវិសាមញ្ញ ក្រោយពីលោកជំទាវបានថ្វាយសារតាំងចំពោះព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី១០ កញ្ញា ២០១២ កន្លងមក។
សម្តេចបានថ្លែងអំណរគុណយ៉ាងជ្រាលជ្រៅចំពោះសាធារណរដ្ឋអាហ្សង់ទីនដែលបានគាំទ្របេក្ខភាពកម្ពុជា ជាសមាជិកមិនអចិន្ត្រៃយ៍ក្នុងក្រុមប្រឹក្សាអង្គការសហប្រជាជាតិសម្រាប់អាណត្តិ២០១៣-២០១៤ ជុំទី២ ហើយសម្តេចក៏បានប្រសិទ្ធពរដល់ចំណងសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសទាំងពីរកាន់តែរឹងមាំខ្លាំងឡើង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ