ខេត្តសៀមរាប ៖ អគារសិក្សា១ខ្នង មាន៦បន្ទប់ ក្នុងចំណោម៤ខ្នង ជាអំណោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី ជូនដល់ប្រជាពលរដ្ឋនៅស្រុកចំនួន៣ នៃខេត្ដសៀមរាប រួមមានស្រុកបន្ទាយស្រី ស្រុកវ៉ារិន នឹងស្រុកស្វាយលើបានចាប់ផ្ដើមដំណើរការសាងសង់ ហើយបន្ទាប់ពីប្រារព្ធពិធីបញ្ចុះបឋមសិលាទៅតាមប្រពៃណីរួច ។
ខេត្តសៀមរាប ៖ អគារសិក្សា១ខ្នង មាន៦បន្ទប់ ក្នុងចំណោម៤ខ្នង ជាអំណោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី ជូនដល់ប្រជាពលរដ្ឋនៅស្រុកចំនួន៣ នៃខេត្ដសៀមរាប រួមមានស្រុកបន្ទាយស្រី ស្រុកវ៉ារិន នឹងស្រុកស្វាយលើបានចាប់ផ្ដើមដំណើរការសាងសង់ ហើយបន្ទាប់ពីប្រារព្ធពិធីបញ្ចុះបឋមសិលាទៅតាមប្រពៃណីរួច ។
អគារសិក្សាមួយខ្នងដំបូងនេះ ស្ថិតនៅភូមិត្បែងលិច ឃុំត្បែង ស្រុកបន្ទាយស្រី ខេត្ដសៀមរាប ជាប់ជើងភ្នំគូលែន ត្រូវបាននាំយកថវិកាចាត់ចែងសាងសង់ដោយលោកបណ្ឌិត លី ស៊ីណា ទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី និងជាអគ្គលេខា ធិការរងនៃគណៈកម្មាធិការជាតិជំរុញចលនាភូមិមួយផលិតផលមួយទីស្តីការគណៈរដ្ឋមន្ដ្រី ។ ពិធីបញ្ចុះបឋមសិលាសាងសង់អគារសិក្សាថ្មីនោះធ្វើឡើង កាលពីព្រឹកថ្ងៃទី១១ ខែកញ្ញា ឆ្នាំ ២០១២ កន្លងទៅ ក្រោមអធិបតីឧកញ៉ាសៀង ណាំ តំណាងរាស្ដ្រមណ្ឌលសៀមរាប លោកស៊ូ ភិរិន្ទ អភិបាលខេត្ដសៀមរាប និងមានការអញ្ជើញចូលរួមពីអាជ្ញាធរដែនដី កងកម្លាំងប្រដាប់អាវុធ រួមទាំងប្រជាពលរដ្ឋរស់នៅតំបន់នោះជាច្រើនរយនាក់ផងដែរ ។
ថ្លែងទៅកាន់ប្រជាពលរដ្ឋចូលរួមនៅក្នុងឱកាសនោះលោកឧកញ៉ាសៀង ណាំ តំណាងរាស្ដ្រមណ្ឌលសៀមរាបបានមានប្រសាសន៍ថា ថ្ងៃនេះគឺជាថ្ងៃប្រវត្ដិសាស្ដ្រដែលបានបង្កើតឱ្យមានសាលារៀននៅក្នុងភូមិក្បែរជើងភ្នំគូលែនប្រកបដោយបារមីរបស់យើង សម្រាប់អនាគតដ៏យូរអង្វែងរបស់កូនចៅប្រជាពលរដ្ឋនៅក្នុងតំបន់នេះ ។លោកបានបន្ដថា អគារសិក្សាដែលនឹងអាចលិចចេញរូបរាងដ៏ថ្មីសន្លាងនៅពេលឆាប់ខាងមុខនេះ គឺជាចំណងដៃដ៏ថ្លៃថ្លាថ្មីមួយទៀតរបស់សម្ដេចអគ្គមហាសេនាបតីតេជោ ហ៊ុន សែន និងលោកជំនាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បន្ទាប់ពីចាត់ឱ្យក្រុមយុវជនស្ម័គ្រចិត្ដចុះមកធ្វើការវាស់វែងដីជូនបងប្អូនប្រជាពលរដ្ឋនៅទីនេះ ក៏ដូចនៅទូទាំងប្រទេស ។
លោកស៊ូ ភិរិន្ទ អភិបាលខេត្ដសៀមរាបបានមានប្រសាសន៍ថា នេះគឺជាសម័យសាលារៀនលើកមកដល់ភូមិដ្ឋានប្រជាពលរដ្ឋ ក្រោមការដឹកនាំរបស់សម្ដេចតេជោ ដើម្បីជំរុញនិង លើកកម្ពស់ធនធានមនុស្សសម្រាប់យកមកអភិវឌ្ឈន៍ជាតិ ។
លោកបណ្ឌិត លី ស៊ីណា ដែលជាអ្នកនាំយកថវិកាដ៏ថ្លៃថ្លារបស់សម្ដេចតេជោដឹកនាំការសាងសង់អគារសិក្សានៅភូមិត្បែងលិចនោះបានមានប្រសាសន៍ថា «ថ្វីបើខ្ញុំបានបញ្ចប់ការសិក្សាថ្នាក់បណ្ឌិតនៅប្រទេសជប៉ុនក៏ពិតមែន ប៉ុន្ដែខ្ញុំនៅជំពាក់គុណសម្ដេចតេជោ និងគណបក្សប្រជាជនកម្ពុជា រួមទាំងប្រជាពលរដ្ឋខ្មែរច្រើនណាស់ ទំរាំរៀនបានដូចសព្វថ្ងៃ ហើយពេលនេះជាពេលដែលខ្ញុំត្រូងសងគុណតាមលទ្ធភាពដែលអាចធ្វើទៅបាន ។
សូមបញ្ជាក់ថា សាលារៀន១ខ្នង មាន៦បន្ទប់ ដែលសាងសង់ដំបូងនេះ គឺជាសាលាមួយខ្នង ក្នុងចំណោមសាលា៤ខ្នង ដែលជាចំណងដៃដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ដ្រីផ្ដល់ជូនប្រជាពលរដ្ឋក្រីក្រនៅស្រុកចំនួន៣ ក្នុងខេត្ដសៀមរាប ក្នុងនោះមួយខ្នងផ្ដល់ជូនប្រជាពលរដ្ឋ នៅភូមិត្បែងលិច ឃុំត្បែង ស្រុកបន្ទាយស្រី ជើងភ្នំគូលែន ។ ២ខ្នងផ្ដល់ជូនប្រជាពលរដ្ឋនៅភូមិជប់រំដេង ឃុំស្រែណូយ ស្រុកវ៉ារិន និង១ខ្នងទៀតជូនទៅឱ្យប្រជាពលរដ្ឋ នៅភូមិផ្ចិកព្រំ ស្រុកស្វាយលើ ។
ការផ្ដល់ជូននូវអំណោយជាសាលារៀនទាំង៤ខ្នងនោះ ធ្វើឡើងតាមសំណើរបស់ប្រជាពលរដ្ឋទាំង៤ភូមិខាងលើ តាមរយៈក្រុមយុវជនស្ម័គ្រចិត្ដចំនួន៥ក្រុម ដែលបានចុះវាស់វែងដីជូនពួកគាត់នៅក្នុងខេត្ដសៀមរាប ហើយបានបន្ដរាយការណ៍ជូនសម្ដេចតេជោ ដឹងកាលពីថ្ងៃទី២៦ ខែសីហា ឆ្នាំ២០១២កន្លងទៅ ។ ដោយសម្ដេចតេជោបានប្រគល់ជូនអ្នកឧកញ៉ាសៀង ណាំ តំណាងរាស្ដ្រមណ្ឌលសៀមរាបជាអ្នកដឹកនាំ នឹងចាត់ចែងសាងសង់ទាំង៤ខ្នង ។
ថ្វីបើយ៉ាងនេះក្ដី សាលារៀនចំនួន៣ខ្នងទៀត ពុំទាន់អាចសាងសង់បាននៅឡើយទេ ដោយសារនៅរដូវភ្លៀងនេះ រថយន្ដដឹកជញ្ជូនសម្ភារសំណង់ពុំអាចចូលទៅកាន់ទីតាំងត្រូវសាងសង់សាលាទាំងនោះបាន ៕
ចែករំលែកព័តមាននេះ