ខេត្តកណ្តាល ៖ សំឡេងផ្ទុះបានលាន់កក្រើកប្រឹថពី ធ្វើឱ្យមានការភ្ញាក់ផ្អើលនៅវេលាម៉ោង២ និង៣០នាទីរសៀលថ្ងៃទី១០ កញ្ញា នៅក្នុងដីឡូត៍មួយកន្លែង ស្ថិតក្នុងភូមិលំហាច ឃុំលំហាច ស្រុកអង្គស្នួល ។ ក្រោយពីមានសំឡេងផ្ទុះនោះមកទើបគេដឹងថា បុរសម្នាក់ឈ្មោះគិត គិន អាយុ៦០ឆ្នាំ បានធ្វើអត្តឃាតដោយបោកគ្រាប់បែកសម្លាប់ខ្លួននៅលើរទេះរុញ ដោយជើងនិងដៃបានដាច់ជាបំណែកគួរឱ្យញាក់សាច់ ចំណែករាងកាយក៏ត្រូវសុសដោយអំបែងគ្រាប់បែកដែរ ។
ទាក់ទិននឹងការធ្វើអត្តឃាតនេះត្រូវបានដឹងថា ដោយសារតែបុរសចំណាស់រូបនេះអស់សង្ឃឹមក្នុងជីវិត បន្ទាប់ពីត្រូវគ្រូពេទ្យកាត់ជើងឆ្វេងដោយសារតែដំបៅព្យាបាលមិនជា ព្រោះគាត់មានជំងឺទឹកនោមផ្អែមធ្ងន់ធ្ងរ ។
តាមប្រភពព័ត៌មានឱ្យដឹងថា ដោយសារតែគាត់មានជំងឺទឹកនោមផ្អែមធ្ងន់ធ្ងរ ព្រមទាំងមានដំបៅជើង លុះពេលព្យាបាលពុំជាក៏ត្រូវកាត់ជើងឆ្វេងត្រឹមភ្លៅ ព្រមទាំងតម្រូវឱ្យបត់ជើងតូចតាមទុយោទៀតផង លុះដល់ថ្ងៃទី៨ កញ្ញា ជនរងគ្រោះបានត្រឡប់មកផ្ទះវិញ ។ នៅថ្ងៃកើតហេតុ បុរសចំណាស់រូបនេះអង្គុយលើរទះរុញ ហើយឱ្យកូនប្រុសអាយុ១២ឆ្នាំ រុញជូនទៅក្រោយផ្ទះ ដោយប្រាប់ថា ទៅមើលកម្ទេចក្រណាត់។ ពេលកូនរុញទៅដល់ក្រោយផ្ទះ គាត់ក៏ដេញកូនឱ្យមកវិញ លុះរយៈពេលប្រហែល៣០នាទីក្រោយមកស្រាប់តែឮសំឡែងផ្ទុះគ្រាប់ ហើយពេលកូនរត់ទៅមើលក៏ឃើញឪពុកស្លាប់បាត់ទៅហើយ ។
លោកមាន សំណាង អធិការនគរបាលស្រុកអង្គស្នូល ឱ្យដឹងថា ទឹកទិននឹងគ្រាប់បែកដែលយកមកបំផ្ទុះសម្លាប់ខ្លួននេះ គឺជាគ្រាប់បែកដែលបានកប់ទុកយូរមកហើយ បន្ទាប់ពីបុរសរូបនេះឈប់ពីការងារជាសេនាជនឃុំ ។ តាមប្រភពព័ត៌មានក៏បានឱ្យដឹងដែរថា បុរសឈ្មោះគិត គិន ក៏ធ្លាប់ធ្វើទាហានដែរ ក្នុងសង្គ្រាមទសវត្សឆ្នាំ៧០ ៕
ចែករំលែកព័តមាននេះ