ខេត្តកណ្តាល ៖ កម្មការិនីរោងចក្រកាត់ដេរយីហោវ៉ាន់កូ ចំនួន៦៧នាក់ បានដួលសន្លប់ជាបន្តបន្ទាប់ នៅក្នុងខណៈពេលកំពុងបំពេញការងារនៅក្នុងរោងចក្របណ្តាលឲ្យមានការភ្ញាក់ផ្អើលយ៉ាងខ្លាំង និងត្រូវបានដឹកបញ្ជូនទៅកាន់មន្ទីរពេទ្យស្រុកអង្គស្នួល ដើម្បីសង្គ្រោះភ្លាមៗ ។ ហេតុការណ៍នេះ បានកើតឡើងកាលពីវេលាម៉ោង១០ និង១៥នាទីព្រឹកថ្ងៃទី១១ កញ្ញា ឆ្នាំ២០១២ នៅក្នុងរោងចក្រកាត់ដេរខាងលើ ដែលមានទីតាំងស្ថិតនៅក្នុងភូមិចក ឃុំបែកចាន ស្រុកអង្គស្នួល ។
គេពុំទាន់ដឹងថា តើការដួលសន្លប់នេះ បណ្តាលមកពីមូលហេតុអ្វីនៅឡើយទេ ប៉ុន្តែកម្មការិនីទាំងនោះនិយាយថា មុនពេលកើតហេតុពួកគេបានចូលធ្វើការជាធម្មតា ហើយនៅក្នុងខណៈពេលដែលកំពុងបំពេញការងារ ស្រាប់តែមានកម្មការិនីម្នាក់ឈ្មោះ លន់ សុខា អាយុ៣០ឆ្នាំ មានទីលំនៅក្នុងភូមិអង្គស្លែង សង្កាត់ឪឡោក ខណ្ឌពោធិ៍សែនជ័យ ក្បែររោងចក្រនោះដែរមានសតិមិនសូវប្រក្រតីនិយាយពាក្យប្លែកៗខុសប្រក្រតីបង្កឱ្យមានការភ័យខ្លាចដល់គេឯងគ្រប់ គ្នា។ ស្រ្តីម្នាក់នេះបញ្ចេញចរិតហាក់បីដូចជាព្រលឹងខ្មោចចូលខ្លួនដោយគាត់ដើរសួរគេឯងគ្រប់ៗគ្នាថា តើពួកឯងស្គាល់អញឬទេ? ហើយមើលទៅកែវភ្នែករបស់ស្រ្តីរូបនេះគួរឲ្យខ្លាច ។ លុះក្រោយមកស្រាប់តែបាត់ខ្លួនស្រ្តីរូបនេះហើយបន្ទាប់មកទៀតក៏ឮដំណឹងថាគាត់ទៅចង.ក សម្លាប់ខ្លួននៅក្នុងបន្ទប់ទឹកបាត់ទៅហើយ ។
ប្រភពដដែលបន្តថា បន្ទាប់ពីឮដំណឹងនោះភ្លាមធ្វើឲ្យអ្នកដែលមានស្មារតីខ្សោយភ័យរន្ធត់រួចក៏ដួលសន្លប់ជាបន្តបន្ទាប់។ ភ្លាមៗនោះ សមត្ថកិច្ចមូលដ្ឋានបានចុះទៅកាន់រោងចក្រនោះដើម្បីស៊ើបអង្កេត ហើយត្រូវក្រុមកម្មករប្រាប់ថា ស្ត្រីរូបនេះព្យាយាមចង.កសម្លាប់ខ្លួនមែន ប៉ុន្តែមិនបានសម្រេចទេ ត្រូវបានគេជួយសង្គ្រោះទាន់ពេល ដោយមានមូលហេតុបណ្តាលមកពីខឹងប្តី។ ទោះបីបែបណា គេមិនទាន់បានដឹងថា រឿងនោះកើតឡើងពិតប្រាកដ ឬបែបណានោះឡើយ ហើយភ្លាមៗស្រ្តីរូបនេះត្រូវបានគេជូនទៅឲ្យសម្រាកនៅផ្ទះ ។
ក្រោយពេលដឹងខ្លួនឡើងវិញ កម្មការិនីដែលដួលសន្លប់នោះបានឲ្យដឹងថា ពួកគេមានអាការវិលមុខ ងងឹតមុខ ឈឺក្បាល តឹងណែនទ្រូង ថប់ដង្ហើម និងទន់ដៃទន់ជើងរួចក៏ដួលសន្លប់តែម្តង។ ដើមហេតុដំបូងគឺបន្ទាប់ពីឮថាមានអ្នកចង.កសម្លាប់ខ្លួនធ្វើឲ្យពួកគេភ័យរន្ធត់ញ័រដើមទ្រូង និងមានអាការមិនស្រួលខ្លួន ទោះបីជាខំប្រឹងទប់អារម្មណ៍បែបណាក៏មិនអាចទៅរួចដែរ ។
ទាក់ទិនទៅនឹងហេតុការណ៍នេះដែរ ត្រូវបានប្រភពផ្សេងមួយទៀតនិយាយថា ការដែលកម្មការិនីដួលសន្លប់ជាបន្តបន្ទាប់នេះមិនត្រឹមតែដោយសារការភ័យរន្ធត់ប៉ុណ្ណោះទេ តែអាចពាក់ព័ន្ធទៅនឹងបញ្ហាបរិស្ថាន ឬខ្យល់អាកាសនៅក្នុងរោងចក្រមិនសូវល្អផងដែរ ។ ជាងនេះទៅទៀតគេក៏មានការសង្ស័យថា បង្កឡើងដោយសារក្លិនជាតិគីមីនៅក្នុងក្រណាត់ជាដើម ។ ទោះបីជាបែបណា មូលហេតុពិតប្រាកដនឹងដឹងនៅក្រោយពេលដែលមន្ត្រីជំនាញចុះទៅពិនិត្យជាក់ស្តែង ។
កន្លងមកមានហេតុការណ៍ដួលសន្លប់ដូចគ្នានេះជាញឹកញាប់មកហើយនៅក្នុងរោងចក្រដទៃផ្សេងពីរោងចក្រនេះ ហើយក្រោយពេលមន្ត្រីជំនាញធ្វើការពិនិត្យរួច ទើបដឹងថាមិនមែនមកពីព្រលឹងខ្មោចព្រាយបិសាចអ្វីទេ គឺបង្កឡើងដោយបរិស្ថាន និងខ្យល់អាកាសមិនល្អ ឬក្លិនជាតិគីមីនៅក្នុងក្រណាត់ប៉ុណ្ណោះ ។
សមត្ថកិច្ចបានឲ្យដឹងថា នៅពេលទទួលបានដំណឹងថា មានកម្មការិនីដួលសន្លប់កម្លាំងបានចុះទៅកាន់រោងចក្រនោះដើម្បីធ្វើកំណត់ហេតុភ្លាមៗ ប៉ុន្តែពេលទៅដល់សួរខាងរដ្ឋបាលរោងចក្រត្រូវបានពួកគេលាក់មិនប្រាប់ការពិតនោះប៉ុន្តែទោះបីជាខំប្រឹងលាក់យ៉ាងណាក៏ដោយ ក៏មិនអាចជិតដែរ ។ កម្មករនៅក្នុងរោងចក្រនោះមានចំនួនសរុប១.៩៥០នាក់ ក្រោយពេលមានកម្មការិនីដួលសន្លប់បែបនេះអ្នកផ្សេងដែលមិនសន្លប់បាននាំគ្នារត់សម្រុកចេញទាំងការភិតភ័យ ហើយអ្នកខ្លះមិនបានសន្លប់នៅរោងចក្រទេ តែពេលទៅដល់ផ្ទះទើបដួលសន្លប់ហើយក្រុមគ្រួសារក៏នាំទៅកាន់មន្ទីរពេទ្យជាបន្តបន្ទាប់ទៀត ៕
ចែករំលែកព័តមាននេះ