រាជធានីភ្នំពេញ ៖ ចោរប្លន់១ក្រុមមានគ្នា៤នាក់ប្រដាប់ដោយអាវុធខ្លីនិងគ្រាប់បែកដៃ បានធ្វើសកម្មភាពតាមប្លន់អាជីវករលក់មាសប្តូរប្រាក់នាក់ប្តីប្រពន្ធដល់ក្នុងផ្ទះដណ្តើមបានកាបូបគ្រឿងអលង្ការ និងប្រាក់ហើយពេលរត់ចេញមកក្រៅបានបាញ់មកលើសាច់ញាតិជនរងគ្រោះ២នាក់ដែលព្យាយាមជួយបណ្តាលឱ្យរងរបួសធ្ងន់ធ្ងរ ។ ប៉ុន្តែក៏ដល់ថ្ងៃអង្សារបស់ក្រុមចោរនេះដែរ ខណៈពេលរៀបរត់គេចខ្លួនក៏បានពើបប្រទះជាមួយកម្លាំងប៉ូលិសកំពុងល្បាតក៏បានបាញ់តដៃគ្នា១ប្រាវ ត្រូវបានប៉ូលិសបាញ់ឱ្យរបួស២នាក់ដួលដេកលើដងផ្លូវ ។ បន្ទាប់មកប្រជាពលរដ្ឋរាប់រយនាក់ដែលភ្ញាក់ផ្អើលបាននាំគ្នាចោមរោមវាយរហូតដល់ស្លាប់នៅនឹងកន្លែងតែម្តងទាំង២នាក់ ចំណែកបក្សពួក២នាក់ទៀតបានជិះម៉ូតូគេចខ្លួនដោយសុវត្ថិភាព ។
ហេតុការណ៍នោះបានកើតឡើងកាលពីវេលាម៉ោង៧និង២០នាទីយប់ថ្ងៃទី១០ កញ្ញា នៅចំណុចផ្ទះលេខ២៨៨ ផ្លូវជាតិលេខ៤ ស្ថិតក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។ នេះជាការកត់សម្គាល់លើកដំបូងហើយដែលក្រុមចោរតាមប្លន់អ្នកលក់មាសពេលចេញពីផ្សារទៅផ្ទះបានជួបគ្រោះអាក្រក់ ក្រោយពេលធ្វើសកម្មភាព ហើយក៏ចាត់ទុកជាលើកដំបូងផងដែរ ដែលចោរប្លន់ពេលរត់មិនរួចត្រូវបានវាយសម្លាប់ដោយមនុស្សរាប់សិបនាក់ ទោះបីជាប៉ូលិសបានព្យាយាមរារាំងក្តីក៏អត់ឈ្នះកំហឹងហ្វូងប្រជាជនដែរ ។
ក្រុមចោរប្លន់មានគ្នា៤នាក់ជិះម៉ូតូ២គ្រឿង ហើយតាមការជាក់ស្តែងសមត្ថកិច្ចប៉ូលិសបង្ក្រាបបានកាំភ្លើងខ្លីម៉ាក កា៥៤មួយដើម គ្រាប់បែកដៃក្រឡាទៀបផលិតនៅប្រទេសរុស្ស៊ីចំនួន៤គ្រាប់ និងម៉ូតូម៉ាកហុងដាសេ១២៥ ស៊េរី២០០៥ ពណ៌ខ្មៅមួយគ្រឿង ។ ចោរប្លន់ត្រូវបានតុលាការរាស្ត្រកាត់ទោសប្រហារជីវិតនៅនឹងកន្លែង២នាក់ ឯ២នាក់ទៀតបានជិះម៉ូតូគេចខ្លួនបាត់ស្រមោល ។ ចោរដែលត្រូវវាយសម្លាប់ម្នាក់ក្នុងចំណោម២នាក់ត្រូវបានមន្ត្រីប៉ូលិសប្រាប់ឱ្យដឹងថា ជនម្នាក់នេះឈ្មោះ ពៅ ភាង អាយុ៣០ឆ្នាំ មានអាសយដ្ឋានភូមិច្រកក្រសាំង ឃុំទួលព្រិច ស្រុកអង្គស្នួល ខេត្តកណ្តាល ។ ជននេះគឺជាមេខ្លោងរបស់ក្រុមចោរប្លន់ ហើយក៏ជាអ្នកកាន់កាំភ្លើងទៅភ្ជង់ប្លន់យកកាបូបលុយ និងគ្រឿងអលង្ការដល់ក្នុងផ្ទះនិងបានបាញ់បណ្តាលឱ្យរងរបួសអ្នកស្លូតត្រង់២នាក់ផងដែរ ។ តាមប្រវត្តិខ្លះៗទាក់ទិននឹងមេខ្លោងក្រុមចោរប្លន់អ្នកលក់មាសឈ្មោះ ពៅ ភាង នេះបានឱ្យដឹងថា ឈ្មោះនេះមានប្រពន្ធ២ដែលប្រពន្ធដើមនៅភូមិច្រកក្រសាំង មានកូន២នាក់ និងប្រពន្ធចុងនៅស្រុកសំរោងទង ខេត្តកំពង់ស្ពឺ ដែលពេលនេះមានផ្ទៃពោះ៥ខែ ។ តាមមន្ត្រីសមត្ថកិច្ចបានឱ្យដឹងថា សម្រាប់ប្រពន្ធដើមនោះលែងមានការទាក់ទងគ្នា២ឆ្នាំមកហើយ តែបានទទួលព័ត៌មានថា ជននេះបានលួចមកផ្ទះប្រពន្ធតែពេលយប់ម្តងៗ និងភាគច្រើនទៅស្នាក់នៅជាមួយប្រពន្ធចុងនៅខេត្តកំពង់ស្ពឺ ។ បានជាជននេះលួចចូលផ្ទះប្រពន្ធដើមនៅពេលយប់ដោយសារតែជននេះបានដឹងថាខ្លួនគឺជាមុខសញ្ញាដែលសមត្ថកិច្ចស្វែងរកចាប់ខ្លួនផងដែរ ។
ប្រភពព័ត៌មានឱ្យដឹងថា មេខ្លោងម្នាក់នេះក៏បានជួលផ្ទះស្នាក់នៅក្នុងភូមិព្រៃទា ក្នុងសង្កាត់ចោមចៅ ខណ្ឌពោធិ៍សែនជ័យ ។ នៅក្នុងកាបូបដែលត្រូវបានរឹបអូសដោយសមត្ថកិច្ច ក្រៅពីការរកឃើញគ្រាប់បែកដៃទាំង៤គ្រាប់ក៏មានគ្រឿងអលង្ការប្លាទីនចំនួន៥តម្លឺង ប្រាក់ខ្មែរ៤លានរៀល និងប្រាក់អាមេរិក១.០០០ដុល្លារ។
ចំណែកអាជីវករលក់មាសប្តូរប្រាក់ និងប្លាទីនប្តីឈ្មោះ ហួ គឹមឃុន អាយុ៣៣ឆ្នាំប្រពន្ធឈ្មោះផែង ស្រីស្រស់ អាយុ២៩ឆ្នាំ ពួកគេលក់ដូរគ្រឿងអលង្ការនៅក្នុងផ្សារត្រពាំងពោធិ៍ ភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ មានទីលំនៅផ្ទះកើតហេតុខាងលើ ។ ចំណែកជនរងគ្រោះដែលត្រូវក្រុមចោរបាញ់ឱ្យរបួសនោះម្នាក់ឈ្មោះផែង សុថី ភេទប្រុស អាយុ១៦ឆ្នាំ រងរបួសស្មាខាងឆ្វេងមួយគ្រាប់ និងម្នាក់ទៀតឈ្មោះម៉ៅ ខួច ភេទប្រុស អាយុ៣១ឆ្នាំ រងរបួសភ្លៅមួយគ្រាប់ និងត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ។
តាមប្រភពព័ត៌មានបានឱ្យដឹងថា នៅមុនពេលកើតហេតុអាជីវករលក់មាសទាំង២នាក់ប្តីប្រពន្ធនោះ បានប្រមូលគ្រឿងអលង្ការនិងប្រាក់ដាក់នៅក្នុងកាបូបមួយ ហើយជិះម៉ូតូម៉ាកស្គូពីមួយគ្រឿងឌុបគ្នាចេញពីតូបលក់ដូរនៅផ្សារត្រពាំងពោធិ៍ឆ្ពោះទៅផ្ទះដូចធម្មតា ។ តាមទម្លាប់រាល់ដងពេលដែលពួកគេចាកចេញពីកន្លែងលក់ដូរម្តងៗតែងបានទូរស័ព្ទប្រាប់ឱ្យអ្នកផ្ទះបើកទ្វារផ្ទះឱ្យរួចជាស្រេច ពេលពួកគេទៅដល់បានជិះចូលទៅក្នុងផ្ទះតែម្តងព្រោះមានការប្រុងប្រយ័ត្នណាស់ ។ ដោយឡែកនៅថ្ងៃកើតហេតុពួកគាត់មិនបានប្រាប់ឱ្យអ្នកផ្ទះបើកទ្វាររង់ចាំនោះទេ ដោយសារទ្វារចំហរស្រាប់ ព្រោះឈ្មោះ ម៉ៅ ខួច ដែលជាសាច់ញាតិកំពុងធ្វើលូទឹកនៅខាងក្រៅ ឯអ្នកផ្សេងទៀតកំពុងនាំគ្នាផឹកស៊ីនៅជិតនោះដែរ ។
ប្រភពដដែលបានបន្តថា ខណៈនោះក្រុមចោរបានជិះម៉ូតូតាមពីក្រោយតាំងពីពេលជនរងគ្រោះទាំង២នាក់ប្តីប្រពន្ធចេញពីផ្សារមកម៉្លេះហើយពេលមកដល់ផ្ទះក៏បានជិះម៉ូតូចូលទៅក្នុងផ្ទះតែម្តង ។ ឯក្រុមចោរបានឈប់នៅខាងមុខហើយបក្សពួកម្នាក់ បានកាន់កាំភ្លើងក្នុងដៃចូលទៅតាមជនរងគ្រោះដល់ក្នុងផ្ទះ ។ ឯម្នាក់ទៀតអង្គុយចាំនៅលើម៉ូតូដោយកាន់គ្រាប់បែកក្រឡាទៀប១គ្រាប់នៅក្នុងដៃផង ។ ចោរប្លន់ម្នាក់ដែលកាន់កាំភ្លើង បានរត់ចូលទៅតាមអាជីវករនោះបានភ្ជង់កាំភ្លើងដណ្តើមយកកាបូបលុយ និងគ្រឿងអលង្ការរត់ចេញមកក្រៅវិញ និងបានបាញ់គំរាមជាច្រើនគ្រាប់ ប៉ុន្តែខ្លះផ្ទុះខ្លះមិនផ្ទុះ។ ឯជនរងគ្រោះ និងក្រុមគ្រួសារក៏បាននាំគ្នាស្រែកឆោឡោ បង្កការភ្ញាក់ផ្អើលដល់អ្នកដែលអង្គុយផឹកស៊ី និងអ្នកកំពុងធ្វើលូនៅខាងមុខនាំគ្នារត់ទៅជួយ ក៏ត្រូវបានក្រុមចោរបាញ់ប្រហារស្រោចមកលើបណ្តាលឱ្យរងរបួសដេកដួល២នាក់ ។
ប្រភពព័ត៌មានដដែលបានបន្តថា ខណៈនោះកម្លាំងប៉ូលិសល្បាតដែលនៅជិតនោះឮសូរបាញ់ក៏ចេញអន្តរាគមន៍ទាន់ពេល ហើយបានពើបប្រទះជាមួយក្រុមចោរនោះត្រូវពួកចោរបាញ់ទៅលើសមត្ថកិច្ចទៀត ទើបមានការបាញ់តបតគ្នាទៅវិញទៅមក ធ្វើឱ្យចោររងរបួសដេកដួលលើដងផ្លូវ២នាក់ ។ បន្ទាប់ពីមានការបាញ់តគ្នាដូចការប្រយុទ្ធគ្នានៅក្នុងសមរភូមិ បានធ្វើឱ្យប្រជាពលរដ្ឋរាប់រយនាក់បានរត់ប្រសាចទៅកាន់ទីនោះ ហើយនៅពេលឃើញក្រុមចោរកំពុងដេកដួលប្រជាពលរដ្ឋបាននាំគ្នាកាត់ទោសប្រហារជីវិតចោរគ្មានបង្អង់ ដោយអ្នកខ្លះប្រើដំបង ខ្លះទៀតប្រើដុំថ្ម និងបេតុងជើងឆត្រលើកគប់ លើកទម្លាក់លើចោរ រហូតដល់ស្លាប់ក្នុងថ្លុកឈាម ។ ការប្រហារជីវិតចោរប្លន់អ្នកលក់មាសនេះក៏បានបណ្តាលឱ្យសមត្ថកិច្ចដែលព្យាយាមចូលទៅរារាំងត្រូវរងរបួសពេលចូលឃាត់មិនឱ្យវាយចោរនោះ ។ ការខិតខំរារាំងមិនឱ្យប្រជាពលរដ្ឋវាយសម្លាប់ចោរត្រូវបរាជ័យ ព្រោះមិនអាចទប់ទល់ជាមួយកម្លាំងប្រជាពលរដ្ឋដ៏ច្រើននោះបានឡើយ គឺចោរប្លន់ម្នាក់ៗត្រូវតុលាការរាស្ត្រកាត់ទោសបែកខ្លួនដូចគេដំប្រហិត ។
ប្រភពដដែលបានបន្តថា កាបូបដាក់គ្រឿងអលង្ការរបស់ជនរងគ្រោះត្រូវបានដណ្តើមយកមកវិញភ្លាមៗ ។ ឯជនរងគ្រោះដែលរបួសត្រូវគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់។ មិនតែប៉ុណ្ណោះសមត្ថកិច្ចបានដកហូតកាំភ្លើងខ្លីម៉ាកកា៥៤មួយដើម និងកាបូបស្ពាយ១ដែលមានគ្រាប់បែកក្រឡាទៀបចំនួន៤គ្រាប់ពីក្រុមចោរប្លន់ ។ ក្រុមចោរប្លន់ខាងលើពិតជាបានធ្វើឱ្យសមត្ថកិច្ចញាក់សាច់មិនតិចទេ ព្រោះនេះគឺជាក្រុមចោរប្លន់ប្រដាប់អាវុធទ្រង់ទ្រាយធំមួយដែលមានទាំងកាំភ្លើង និងគ្រាប់បែកដៃ ប្រសិនបើមិនអាចបង្ក្រាបបានទេនោះ ។ ប្រសិនបើឱ្យពួកចោររត់គេចរួចនោះប្រាកដជាមានមនុស្សស្លាប់ ឬរបួសមិនតិចនាក់នោះឡើយ ។
ទោះបីជាបែបនេះក្តីមានការវាយតម្លៃថា ក្រុមចោរខាងលើនោះចិត្តស្លុយខ្លាំងណាស់មិនខ្លាចញញើតអ្វីទាំងអស់ ពីមុខផ្ទះជនរងគ្រោះរហូតដល់ខាងក្នុងមានចម្ងាយប្រមាណជាង៤០ម៉ែត្រក៏ពួកចោរនេះហ៊ានរត់ចូលតាមប្លន់ដែរ ទោះបីខាងក្រៅផ្ទះមានមនុស្សនៅច្រើនក៏ដោយព្រោះពួកគេអាងខ្លួនថា មានអាវុធយុទ្ធភ័ណ្ឌគ្រប់គ្រាន់នៅក្នុងដៃ ។ សមត្ថកិច្ចវាយតម្លៃថា ចោរប្លន់នេះមានជំនាញ ឬទំនងមានបទពិសោធន៍ពេញខ្លួន ប៉ុន្តែសំណាងអាក្រក់ត្រូវស្លាប់ភ្លាមៗ ៕
ចែករំលែកព័តមាននេះ