ខេត្តព្រះសីហនុ ៖ សារធាតុគីមីផ្សំចំនួន៨០ធុង ត្រូវបានសមត្ថកិច្ចធ្វើការឆែកឆេរកាលពីល្ងាចថ្ងៃទី១១ កញ្ញា ឆ្នាំ២០១២ នៅក្នុងកំពង់ផែអន្តរជាតិក្រុងព្រះសីហនុ ដោយមានការសង្ស័យថា ជាសារធាតុគីមីសម្រាប់ផ្សំគ្រឿងញៀន ។
តាមប្រភពពីសមត្ថកិច្ចប៉ូលិសជំនាញនៃស្នងការដ្ឋានខេត្តបានបង្ហើបជាបឋមថា សារធាតុគីមីមិនទាន់ច្នៃចំនួន៨០ធុង ស្មើនឹងជាង១០តោននាំចូលមកពីប្រទេសម៉ាឡេស៊ីត្រូវបានសមត្ថកិច្ចជំនាញពាក់ព័ន្ធរួមមាន មន្ត្រីប៉ូលិស មន្ត្រីកងរាជអាវុធហត្ថ មន្ត្រីកាំកុងត្រូល និងមន្ត្រីគយ ធ្វើការត្រួតពិនិត្យរកមើលសារធាតុខុសច្បាប់។ ប៉ុន្តែរហូតមកដល់ពេលនេះ សមត្ថកិច្ចនៅពុំទាន់ដឹងថាសារធាតុនៅក្នុងធុងទាំងនោះ ជាអ្វីពិតប្រាកដនៅឡើយទេ ។ ប្រភពដដែលបានបន្តថា សារធាតុទាំងនេះបាននាំចូលមកពីប្រទេសម៉ាឡេស៊ីកាលពីថ្ងៃទី១៣ សីហា ឆ្នាំ២០១២ ហើយមកដល់កំពង់ផែនៅថ្ងៃទី២៣ សីហា ។
សារធាតុទាំងនេះបានផ្ទុកនៅក្នុងកុងតឺន័រទំហំ២០ហ្វ៊ីត មានចំនន៨០ធុង ដោយក្នុងមួយធុងមានទម្ងន់២២១គីឡូក្រាម នាំចូលដោយក្រុមហ៊ុនសា៊ងនុយស៊ាង គ្រប់គ្រងដោយលោកឡូហ៊ីលិន ជនជាតិចិន ដែលដឹកតាមនាវាឈ្មោះ ថាណាប៊ុម ក្នុងជើងដឹកជញ្ជូនទី១២០៦៤ ។ ក្រុមមន្ត្រី មិនទាន់ផ្តល់ព័ត៌មានជាក់លាក់ណាមួយនៅឡើយទេជុំវិញការត្រួតពិនិត្យនេះ ៕
ចែករំលែកព័តមាននេះ