ខេត្តបន្ទាយមានជ័យ ៖ជាផ្នែក១នៃការជំរុញផលិតកម្មស្រូវដើម្បីកម្ពុជានាំអង្ករចេញឱ្យបាន១លានតោននៅឆ្នាំ២០១៥ សមាគមក្រៅរដ្ឋាភិបាល ក្រុមហ៊ុនជំនាញកសិកម្ម និងអាជ្ញាធរដែនដី បានរួមគ្នាធ្វើសិក្ខាសាលាមួយជាមួយកសិករចំនួន៥៥០នាក់នៅ ឃុំស្រះរាំង ស្រុកមង្គលបុរី កាលពីថ្ងៃទី ៥ កញ្ញា កន្លងមកអំពីការធ្វើស្រែតាមវិធីសាស្ត្រដែលមានប្រសិទ្ធភាព និងនិរន្តរភាព ។
ខេត្តបន្ទាយមានជ័យ ៖ជាផ្នែក១នៃការជំរុញផលិតកម្មស្រូវដើម្បីកម្ពុជានាំអង្ករចេញឱ្យបាន១លានតោននៅឆ្នាំ២០១៥ សមាគមក្រៅរដ្ឋាភិបាល ក្រុមហ៊ុនជំនាញកសិកម្ម និងអាជ្ញាធរដែនដី បានរួមគ្នាធ្វើសិក្ខាសាលាមួយជាមួយកសិករចំនួន៥៥០នាក់នៅ ឃុំស្រះរាំង ស្រុកមង្គលបុរី កាលពីថ្ងៃទី ៥ កញ្ញា កន្លងមកអំពីការធ្វើស្រែតាមវិធីសាស្ត្រដែលមានប្រសិទ្ធភាព និងនិរន្តរភាព ។
លោកបណ្ឌិត ហង្ស សុគុណ ប្រធានសមាគម អភិវឌ្ឍន៍ស្រែប្រាំងកម្ពុជាថ្លែងថា រាជរដ្ឋាភិបាល និងក្រសួងកសិកម្មកម្ពុជាបានបំផុសចលនាកសិករឱ្យប្តូរឥរិយាបថពីធ្វើស្រូវឡើងទឹកមកធ្វើស្រូវប្រដេញទឹកនិងស្រូវប្រាំង ពីធ្វើស្រូវធ្ងន់មកធ្វើស្រូវស្រាលវិញ ដើម្បីទទួលបានទិន្នផលនិងគុណភាពខ្ពស់ ក្នុងនោះសមាគមស្រែប្រាំងកម្ពុជាចូលរួមលើកស្ទួយកសិករធ្វើស្រែប្រាំងឱ្យមានប្រសិទ្ធភាពនិរន្តរភាព ។ គោលបំណងរបស់សមាគមគឺ ដើម្បីជោគជ័យទាំងអស់គ្នា ស្វែងរកដៃគូផ្គត់ផ្គង់ ជួយបច្ចេកទេសជូនសមាជិកក្នុងការដាំដុះ ថែទាំ ប្រមូលផល ផ្សព្វផ្សាយចំណេះដឹង ប្រើពូជសុទ្ធជី ថ្នាំ និងជួួយរកទីផ្សារ ។
លោកគង់ វិតាណះ អគ្គនាយកក្រុមហ៊ុន AQIP seed (អេគីបស៊ីដ) បានផ្សព្វផ្សាយពីផលប្រយោជន៍ប្រើពូជស្រូវដែលសុទ្ធ បានទិន្ន ផលខ្ពស់ គុណភាពល្អ មានតម្លៃទីផ្សារខ្ពស់ និងទូលំទូលាយ ។ លោកបានប្រៀបធៀបពូជស្រូវតៗដែលកសិករមួយចំនួនប្រើរាល់ឆ្នាំ ជាយថាផល និងពូជស្រូវផលិតដោយក្រុមហ៊ុនអេគីបស៊ីដ ដែលជាក្រុមហ៊ុនដំបូងផលិតពូជស្រូវ ធានាបំពេញមហិច្ឆតាផលិតផលស្រូវវស្សានិងស្រូវប្រាំង ។
តំណាងក្រុមហ៊ុនរុក្ខជាតិអាងយ៉ាងប្រទេសវៀតណាម លើកពីវិធីជ្រើសរើសពូជ ការធ្វើស្រែប្រើពូជស្រូវ ប្រើជី បច្ចេកទេសដាំដុះថែទាំតាមដំណាក់កាល និងប្រមូលផលស្រូវ ដើម្បីនាំមកនូវទិន្នផល គុណភាពនិងតម្លៃខ្ពស់ បែបប្រពលវប្បកម្មពុំមែនយថាផល ។ ក្នុងឱកាសនោះដែរក៏មានការតាមដានរបស់កសិករ សួរសំណួរនិងចូលរួមមតិពីការធ្វើស្រែប្រាំងនិងវស្សាក្នុងភូមិសាស្រ្តរបស់ខ្លួន។
លោកអ៊ុង អឿន អភិបាលខេត្តមានប្រសាសន៍ថា នយោបាយរាជរដ្ឋាភិបាលកម្ពុជាជំរុញនាំអង្ករចេញឱ្យបានចំនួន១លានតោននៅឆ្នាំ២០១៥ ។ ដោយឡែកខេត្តបន្ទាយមានជ័យ ស្វាគមន៍សមាគម អង្គការ ក្រុមហ៊ុន និងដៃគូដទៃទៀតក្នុងការជួួយកសិករធ្វើស្រែវស្សានិងស្រែប្រាំងឱ្យបានទិន្នផល គុណភាពនិងតម្លៃទីផ្សារខ្ពស់ ។ ខេត្តបន្ទាយមានជ័យមានផ្ទៃដីធ្វើស្រែជិត២៣មឺុនហិកតា តែបច្ចុប្បន្នបានផលត្រឹមជិត៦៣មឺុនតោនប៉ុណ្ណោះ ពោលគឺទិន្នផលទាប បើប្រៀបធៀបនឹងប្រទេសថៃ និងវៀត ណាមជិតខាងយើង។
លោកអ៊ុង អឿន បានស្នើឱ្យគ្រប់ផ្នែកជំនាញជួយកសិករដើម្បីផលិតស្រូវនិងដំណាំចម្ការ ការចិញ្ចឹមសត្វនិងត្រីឱ្យបានខ្លាំងក្លា ហើយចាត់ទុកប្រធានបទនៃសិក្ខាសាលានេះជាជំនួយផ្នែកគំនិតស្មារតី បច្ចេកទេសនិងការជ្រើសរើសប្រើពូជស្រូវនិងជីដល់កសិករនៅក្នុងខេត្ត ៕
ចែករំលែកព័តមាននេះ