ខេត្តឧត្តរមានជ័យ ៖ ជនជាប់សង្ស័យ២នាក់ដែលម្នាក់ឈ្មោះហេង បញ្ញា ភេទប្រុស អាយុ២៩ឆ្នាំ រស់នៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង និងម្នាក់ទៀតឈ្មោះប៉ោល ហុន ភេទប្រុស អាយុ៤៧ឆ្នាំ រស់នៅក្នុងភូមិដូង ឃុំបឹងរាំង ស្រុកកំរៀង ខេត្តបាត់ដំបង បានត្រូវនគរបាលស្រុកអន្លង់វែងចាប់ឃាត់ខ្លួននៅចំណតរថយន្តអន្លង់វែងស្ថិតក្នុងភូមិអូរចិញ្ចៀន ឃុំអន្លង់វែង ស្រុកអន្លង់វែង កាលពីវេលាម៉ោង៥និង៣០នាទីល្ងាចថ្ងៃទី៨ កញ្ញា កន្លងទៅដោយជាប់ពាក់ព័ន្ធពីបទប្រើប្រាស់ និងជួញដូរគ្រឿងញៀន ។
លោកវរសេនីយ៍ត្រីស៊ុយ សេង អធិការនគរបាលស្រុកអន្លង់វែង ឱ្យដឹងថា មុនពេលឃាត់ខ្លួនបុរសទាំង២នាក់នេះ សមត្ថកិច្ចរបស់លោកបានធ្វើការស៊ើបអង្កេតជិតមួយខែមកហើយឃើញថា ជាមុខសញ្ញាប្រើប្រាស់និងចែកចាយគ្រឿងញៀននៅក្នុងស្រុកអន្លង់វែង ។ លោកបានបញ្ជាក់ថា បន្ទាប់ពីនគរបាលបានកត់សម្គាល់ច្បាស់ពីមុខសញ្ញាហើយ នៅវេលាម៉ោង៨និង៥០នាទីយប់ថ្ងៃទី៦ កញ្ញា ក៏បានធ្វើការឆែកឆេរឈ្មោះ ហេង បញ្ញា នៅភូមិជើងភ្នំ ឃុំត្រពាំងប្រីយ៍ រកឃើញវត្ថុតាងថ្នាំប្រភេទយ៉ាម៉ាចំនួន៥គ្រាប់នៅជាប់នឹងខ្លួនទើបនាំខ្លួនមកអធិការដ្ឋាននគរបាលស្រុកធ្វើការសាកសួរ ។ បន្ទាប់មកសមត្ថកិច្ចបានចាប់ខ្លួនបក្សពួកម្នាក់ទៀតឈ្មោះ ប៉ោល ហុន អាយុ៤៧ឆ្នាំ នៅចំណតរថយន្តអន្លង់វែងក្នុងភូមិអូរចិញ្ចៀន ឃុំអន្លង់វែង និងឆែកឆេររកឃើញថ្នាំញៀនប្រភេទយ៉ាម៉ាដែលដាក់នៅក្នុងនំប័ុងចំនួន៤៦៦គ្រាប់ រួចនាំខ្លួនមកអធិការដ្ឋាននគរបាលស្រុកធ្វើការសាកសួរ ។
លោកអធិការបន្តថា បន្ទាប់ពីធ្វើការសាកសួរ ជនជាប់សង្ស័យទាំង២នាក់សារភាពថា ខ្លួនពិតជាបានប្រើប្រាស់និងជួញដូរគ្រឿងញៀនពិតប្រាកដមែន ។ យោងតាមចម្លើយសារភាពនិងយោងតាមវត្ថុតាងជនទាំង២នាក់ត្រូវបានកសាងសំណុំរឿងបញ្ជូនទៅសាលាដំបូងខេត្តទៅតាមនីតិវិធី ៕
ចែករំលែកព័តមាននេះ