រាជធានីភ្នំពេញ ៖ នៅលើសង្វៀនស្ថានីយទូរទស្សន៍ CTN នាថ្ងៃអាទិត្យទី២ កញ្ញា ខាងមុខនេះ ការប្រកួតប្រដាល់ក្បាច់ខ្មែរបុរាណដណ្តើមខ្សែក្រវាត់ខារ៉ាបាវ ទម្ងន់៥៤គីឡូក្រាមសម្រាប់ពូល A បានឈានចូលដល់ជុំទី៣ហើយ។ កីឡាករឆាំ រ៉ែម មកពីក្លិបសិង្ហកីឡា និងកីឡាករឯម ចាន់រស្មី មកពីក្លិបគ្រុឌមានជ័យ តើអ្នកណាមានសំណាងរកបាន៣ពិន្ទុបន្ថែមទៀតដើម្បីគេចឱ្យផុតពីការហាលខោ?
រវាងគូនេះធ្លាប់ចាញ់ការប្រកួតម្នាក់មួយលើករួចមកហើយ ជាពិសេសឆាំ រ៉ែម ដែលបានជួបអឹុង បូរ៉ា មកពីក្លិបព្រះខ័នរាជ លើកទី១ ត្រូវបានលោកម៉ាសេរី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍ CTN ព្រមានយ៉ាងចាស់ដៃ ហើយអ្នកមើលភាគច្រើនក៏មិនសូវជាសប្បាយចិត្តប៉ុន្មានដែរ ដោយសារតែពួកគេជាអតីតសិស្សរួមគ្រូ ដូច្នេះការប្រកួតរបស់គេមិនបានពេញដៃពេញជើងឡើយ ពោលគឺចាញ់ហើយត្រូវគេបន្ទោសទៀត ។
ពេលនេះទើបតែរកបានមួយពិន្ទុប៉ុណ្ណោះ ហើយសម្រាប់ការមកប៉ះឯម ចាន់រស្មី លើកនេះមិនទាន់ដឹងថា មានសំណាងអាចរកបាន៣ពិន្ទុបន្ថែមទៀត ឬយ៉ាងណានោះទេ ។ ចំណែកឯអ្នកប្រដាល់ចាស់វស្សាឯម ចាន់រស្មី វិញ មានវាសនាមិនខុសពីឆាំ រ៉ែម ប៉ុន្មានឡើយ គឺទើបតែរកបានមួយពិន្ទុប៉ុណ្ណោះ ។ រស្មី បានប្រកួតចាញ់ពិន្ទុអ្នកប្រដាល់ជំនាន់ក្រោយឈិត ង៉ុយ មកពីក្លិបអប្សរាក្បាច់គុនខ្មែរ កាលពីថ្ងៃអាទិត្យទី១៩ សីហា ។ លើកនេះទាំងឆាំ រ៉ែម និងឯម ចាន់រស្មី សុទ្ធតែចង់ឈ្នះរៀងខ្លួនដើម្បីគេចឱ្យផុតពីការហាលខោ ប៉ុន្តែគេនៅមិនទាន់ដឹងថា អ្នកណាមានសំណាងជាងអ្នកណានោះឡើយ ។ ទោះបីជារស្មី មានប្រវត្តិឡើងសង្វៀនយូរជាងឆាំ រ៉ែម មែន ប៉ុន្តែក៏មិនប្រាកដថា អាចយកឈ្នះឆាំ រ៉ែម បានដែរ ។
រីឯគូប្រកួតមិត្តភាពប្រចាំសប្តាហ៍នេះដែរ ឡេះ តើក មកពីក្លិបពុទ្ធសេរីវង្សព្រែកតាទែន ឡើងសាកកម្លាំងជាមួយផាវ ភឿត មកពីក្លិបកងពលធំអន្តរាគមន៍លេខ៣ព្រះវិហារ ។ ចាន់ សុខហួន មកពីក្លិបនិរោធមានជ័យ ជួបប្រកួតជាមួយម៉ាប់ ឆៃយ៉ា មកពីក្លិបបក្សីស្លាបដែក ។ ទូច សក្តិ មកពីក្លិបរស្មីកុមារកំព្រា ជួបប្រកួតជាមួយអាន សុផល មកពីក្លិបមិត្តប៉ូលិស។ ឈិត ទូច មកពីសមាគមកីឡាប្រដាល់ក្រសួងការពារជាតិ ប្រកួតជាមួយឈិន ណាក់ មកពីក្លិបកូនខ្មែរអ្នកតស៊ូ និងពេជ្រ សំរិទ្ធ មកពីសមាគមកី ឡាប្រដាល់ក្រសួងការពារជាតិ ប្រកួតជាលក្ខណៈសាកលជាមួយណា បូរី មកពីក្លិបរមាសខេត្តកំពង់ឆ្នាំង ៕
ចែករំលែកព័តមាននេះ