ក្រុងប៉ោយប៉ែត ៖ ជនជាប់សង្ស័យ២នាក់នាំមនុស្សឆ្លងដែនខុសច្បាប់ ត្រូវបានប៉ូលិសក្រុងប៉ោយប៉ែតឃាត់ខ្លួនជាបន្តបន្ទាប់កាលពីល្ងាចថ្ងៃទី៧ ឧសភា ក្នុងភូមិក្បាលស្ពាន១ សង្កាត់ប៉ោយប៉ែត ដែលជនសង្ស័យម្នាក់ជាស្ត្រីបានប្រកែកឡាំប៉ាអង្គុយធាក់ក្រាញមិនឱ្យសមត្ថកិច្ចឃាត់ខ្លួនទេ សុខចិត្តក្រាញននៀលនៅលើដងផ្លូវ
ក្រុងប៉ោយប៉ែត ៖ ជនជាប់សង្ស័យ២នាក់នាំមនុស្សឆ្លងដែនខុសច្បាប់ ត្រូវបានប៉ូលិសក្រុងប៉ោយប៉ែតឃាត់ខ្លួនជាបន្តបន្ទាប់កាលពីល្ងាចថ្ងៃទី៧ ឧសភា ក្នុងភូមិក្បាលស្ពាន១ សង្កាត់ប៉ោយប៉ែត ដែលជនសង្ស័យម្នាក់ជាស្ត្រីបានប្រកែកឡាំប៉ាអង្គុយធាក់ក្រាញមិនឱ្យសមត្ថកិច្ចឃាត់ខ្លួនទេ សុខចិត្តក្រាញននៀលនៅលើដងផ្លូវជាតិធ្វើឱ្យមានការភ្ញាក់ផ្អើលពីមនុស្សម្នាចោមរោមមើលយ៉ាងកុះករ ។
ជនសង្ស័យប្រុស-ស្រីទាំង២ ម្នាក់ឈ្មោះស៊ាន សុភ័ក្ត្រ ភេទស្រី អាយុ៤៥ឆ្នាំ មានទីលំនៅភូមិផ្សារកណ្តាល សង្កាត់ផ្សារកណ្តាល និងម្នាក់ទៀតឈ្មោះយូ ម៉ន ភេទប្រុស អាយុ៤០ឆ្នាំ ជាកម្មករអូសរទេះ មានទីលំនៅក្នុងភូមិក្បាលស្ពានទី១ ។ ជនសង្ស័យទាំង២ ត្រូវបានសមត្ថកិច្ចឃាត់ខ្លួនឈ្មោះយូ ម៉ន មុនគេនៅវេលាម៉ោងជាង៦ល្ងាចថ្ងៃទី៧ ឧសភា ខណៈកំពុងទំនាក់ទំនងគ្នាតាមទូរស័ព្ទជាមួយពលករដែលគាត់ប្រុងនាំចេញតាមច្រករបៀង ប៉ុន្តែពុំទាន់ទាំងបានចេញផង ក៏ត្រូវឃាត់ខ្លួនតែម្តង ។ ដោយឡែកស្ត្រីឈ្មោះស៊ាន សុភ័ក្ត្រ វិញសមត្ថកិច្ចបានឃាត់ខ្លួននៅចំណុចបរិវេណកាស៊ីណូហ្គោលឌិនក្រោនវេលាម៉ោងប្រហែល៧យប់ថ្ងៃដដែល ដោយសមត្ថកិច្ចចោទថា ស្រ្តីរូបនេះជាមេខ្លោងក្នុងការបែងចែកពេលករចំណាកស្រុកទៅឱ្យអ្នកផ្សេងៗដូចជាឈ្មោះយូ ម៉ន ក្នុងការនាំបន្តតាមព្រំដែន ។ ខណៈពេលសមត្ថកិច្ចធ្វើការឃាត់ខ្លួនស្ត្រីមេក្លោងមិនព្រមឱ្យសមត្ថកិច្ចចាប់ទេ សុខចិត្តដើរតាំងពីចំណុចកើតហេតុរហូតដល់មុខផ្សាររ៉ា ក៏អង្គុយអុកគូទស្រែកឡាំប៉ា ហើយប៉ូលិស៥-៦នាក់ចាប់ក៏ចាប់មិនឈ្នះដែរ សូម្បីវាយខ្នោះក៏បានតែដៃម្ខាង ពេលលូកដៃចាប់វាយខ្នោះត្រូវស្ត្រីនោះ ព្យាយាមខាំ ធ្វើឱ្យប៉ូលិសលំបាកក្នុងការនាំខ្លួន ។ ទោះបីជាបែបណា ទីបំផុត ប៉ូលិសប្រើវិធីនិយាយលួងលោម រហូតស្ត្រីនោះសុខចិត្តដើរតាមមិនជិះរថយន្ត ឬឱ្យប៉ូលិសចាប់ទេ ។ លុះល្បួងទៅដល់ប៉ុស្តិ៍រដ្ឋបាលសង្កាត់ ទើបចាប់វាយខ្នោះបាន ។
ជុំវិញការឃាត់ខ្លួនជនសង្ស័យទាំង២នាក់ ប៉ូលិសបានប្រាប់ថា ធ្វើឡើងក្រោយពីទប់ស្កាត់ពលករចំណាកស្រុកប្រុងឆ្លងដែនខុសច្បាប់ចំនួន១៣នាក់ នៅរសៀលថ្ងៃដដែល ។ ប៉ូលិសបន្តថា ក្រោយការហៅពលករទាំងអស់ខាងលើមកសួរនាំដោយសហការជាមួយប៉ូលិសការពារព្រំដែនគោកវរសេនាតូចលេខ៨៩១ ទើបកំណត់បានមុខសញ្ញា រហូតឈានដល់ការឃាត់ខ្លួនជនសង្ស័យទាំង២នាក់ ។
ឈ្មោះយូ ម៉ន បានសារភាពថា ខ្លួនយកពលករបន្តពីឈ្មោះស៊ាន សុភ័ក្រ្ត ។ ឯស្ត្រីឈ្មោះស៊ាន សុភ័ក្ត្រសារភាពថា ខ្លួនបាននាំពលករឆ្លងដែនទៅថៃដោយខុសច្បាប់មែន ទើបតែបាន២ដងប៉ុណ្ណោះ ។ លោកអ៊ុំ សុផល អធិការនគរបាលក្រុងប៉ោយប៉ែតប្រាប់ថា ដោយអនុវត្តតាមបទបញ្ជាណែនាំពីលោកឧត្តមសេនីយ៍ស្នងការខេត្តក៏ដូចជាលោកអភិបាលក្រុងក្នុងការទប់ស្កាត់ពលករចំណាកស្រុកកុំឱ្យឆ្លងដែនខុសច្បាប់ ទើបកម្លាំងរបស់លោកទប់ស្កាត់បានពលករចំណាកស្រុកជាបន្តបន្ទាប់ ពិសេសឃាត់ខ្លួនបានមេខ្យល់ទាំង២ខាងលើតែម្តង ។
លោកអធិការបន្តថា ក្រោយការសួរនាំ និងធ្វើកំណត់ហេតុរួច ជនសង្ស័យទាំង២ត្រូវកសាងសំណុំរឿងបញ្ជូនពួកគេទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធី ។ ចំណែកពលករទាំង១៣នាក់ ក្នុងនោះមានស្រី៤ នាក់ ក្រោយពីសួរនាំនិងអប់រំរួចបានឱ្យពួកគេវិលត្រឡប់ទៅស្រុកកំណើតវិញ ។
តាមប្រភពពីមន្ត្រីបានបង្ហើបថា ក្នុងរយៈពេល១ខែ គិតពីថ្ងៃទី១ រហូតដល់៣០មេសា កន្លងមកនេះភាគីថៃបានចាប់បញ្ជូនពលករខ្មែរខុសច្បាប់ប្រគល់ឱ្យកម្ពុជាវិញជាង១ម៉ឺននាក់ ហើយ ។ ប្រភពបន្តថា ភាគីថៃបានចាប់ពលករខ្មែរស្រីប្រុសដែលលួចឆ្លងដែនចូលទៅក្នុងទឹកដីថៃយកមកប្រគល់ឱ្យប៉ូលិសអន្តោប្រវេសន៍ ស្នាក់ការច្រកប៉ោយប៉ែត ដោយដឹកតាមរថយន្តទ្រុងចំនួន១៦៤លើក សរុបពលករទាំងអស់មានចំនួន១០.៥០៨នាក់ ក្នុងនោះមានស្រី៣.២៤៥នាក់ និងមានកុមារចំនួន៨៧០នាក់ផងដែរ ។ ប៉ូលិសអន្តោប្រវេសន៍ច្រកប៉ោយប៉ែតបានឱ្យដឹងថា ចំពោះពលករខ្មែរដែលលួចឆ្លងដែនចូលទៅក្នុងប្រទេសថៃដោយខុសច្បាប់នោះគឺមានពិតប្រាកដមែនហើយ ត្រូវបានភាគីថៃចាប់ដាក់ក្នុងរថយន្តទ្រុងដែក សម្រាប់ដឹកអ្នកទោសត្រឡប់មកវិញ តាមច្រកប៉ោយប៉ែតប្រគល់ឱ្យសមត្ថកិច្ចរបស់លោកធ្វើការអប់រំណែនាំរួចដោះលែងឱ្យពួកគេវិលត្រឡប់ទៅស្រុកកំណើតរៀងៗខ្លួនវិញ ។
គួរកត់សម្គាល់ផងដែរថា ជារៀងរាល់ថ្ងៃគេសង្កេតឃើញមានក្រុមពលករចំណាកស្រុកមកពីបណ្តាខេត្តផ្សេងៗយ៉ាងគគ្រិកគគ្រេងនាំគ្នាមកកាន់តំបន់ប៉ោយប៉ែត ក្នុងគោលបំណងលួចឆ្លងដែនចូលទៅក្នុងទឹកដីថៃតាមរយៈមេខ្យល់ ស្វែងរកការងារធ្វើ ។ ទោះបីជាបែបណាការចាប់ផ្តើមរឹតបន្តឹងរបស់សមត្ថកិច្ចពាក់ព័ន្ធតាមច្រកព្រំដែនឃើញថា ចំនួនពលករដែលលួចឆ្លងដែនដោយខុសច្បាប់ក៏មានការថយចុះ ពិសេសការបង្ក្រាបមេខ្យល់ ។ មុននេះមន្ត្រីសមត្ថកិច្ចបាននិយាយថា យើងមិនបានហាមឃាត់នោះទេ បើពួកគេចូលទៅដោយស្របច្បាប់ តែបើខុសច្បាប់ហើយត្រូវតែហាមឃាត់ ព្រោះបើពួកគេជួបនូវបញ្ហាគ្រោះ ថ្នាក់ណាមួយពិតជាគ្មានអ្នកណាធានានោះទេ ៕
ចែករំលែកព័តមាននេះ