ខេត្តព្រះសីហនុ ៖ ភាពអនាធិបតេយ្យនៅចំណុចដីទំនេរជុំវិញបឹងព្រែកទប់នៅតែបន្តកើតមានដដែល ខណៈពេលអាជ្ញាធរ និងស្ថាប័នពាក់ព័ន្ធ ហាក់ដូចជាបណ្តោយឱ្យក្រុមជនខិលខូចឃុបឃិតគ្នាជាមួយមន្ត្រីមានអំណាចខ្លះ នាំគ្នាសម្រុកចូលទៅបោះបង្គោលរបងហ៊ុមព័ទ្ធរំលោភចាក់ដីចូលផ្ទៃបឹង ចែកគ្នាកាន់កាប់យ៉ាងអនាធិបតេយ្យបំផុត ។ សកម្មភាពនេះពិនិត្យឃើញថា កន្លែងខ្លះត្រូវគេយកបង្គោលទៅបោះចូលទៅដល់ពាក់កណ្តាលផ្ទៃបឹងតែម្តង ។
សកម្មភាពរំលោភបំពានយកដីចំណីបឹងខាងលើនេះ បានកើតឡើងបន្ទាប់ពីមានកិច្ចប្រជុំពិភាក្សាមួយរបស់អន្តរក្រសួង ធ្វើឡើងកាលពីថ្ងៃទី១២ មីនា ឆ្នាំ២០១២ កន្លងទៅ នៅទីស្តីការក្រសួងរៀបចំដែនដី នគរូបនីយកម្ម និងសំណង់ ក្រោមអធិបតីភាពលោកទេសរដ្ឋមន្ត្រី អ៊ឹង ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។ ក្នុងកិច្ចប្រជុំនេះបានសម្រេចប្រគល់ដីនៅជុំវិញបឹងព្រែកទប់ ស្ថិតនៅក្នុងភូមិ១ សង្កាត់លេខ៣ ក្រុងព្រះសីហនុ ទៅឱ្យប្រជាពលរដ្ឋរស់នៅពិតប្រាកដចំនួន៥១គ្រួសារដែលកាន់កាប់ស្របច្បាប់ តាមការស្នើសុំរបស់អាជ្ញាធរខេត្តព្រះសីហនុ ។
មន្ត្រីសាលាខេត្តបានបញ្ជាក់ថាអ្វីដែលសាលាខេត្តដាក់សំណើទៅឱ្យអន្តរក្រសួងពិនិត្យ និងសម្រេចនោះ គឺមានប្រជាពលរដ្ឋរស់នៅពិតប្រាកដចំនួនប្រមាណ៥១គ្រួសារប៉ុណ្ណោះ ភាគច្រើនជាគ្រួសារអតីតមន្ត្រីរដ្ឋាករទឹក ដែលបានមកតាំងទីលំនៅ ខ្លះតាំងពីឆ្នាំ១៩៧៩ ខ្លះតាំងពីឆ្នាំ១៩៨០មកម៉្លេះ ហើយពួកគាត់ទាំងនោះបានបង្កើតកូនពូនជាចៅរហូតមកដល់បច្ចុប្បន្ន។ប្រភពដដែលបានបន្តថា រាជរដ្ឋាភិបាលគប្បីពិនិត្យឱ្យបានច្បាស់លាស់ ចំពោះករណីតំបន់បឹងព្រែកទប់នេះ តើមានប្រជាពលរដ្ឋក្រីក្រពិតប្រាកដប៉ុន្មានគ្រួសារដែលបានកាន់កាប់សព្វថ្ងៃហើយគប្បីពិនិត្យមើលដីជុំវិញបឹង តើមានពាក់ព័ន្ធអ្វីខ្លះ ? ជាក់ស្តែងដូចជាដីក្នុងរបងទីតាំងអតីតកីឡដ្ឋានក្រុមមឿង តើមានអាថ៌កំបាំងអ្វីខ្លះ? បើតាមដឹងដីអតីតកីឡដ្ឋានក្រុមមឿងនោះ គេសាងសង់របងគ្រាន់តែជាការបន្លំភ្នែកប្រជាពលរដ្ឋតែប៉ុណ្ណោះ ។
ប្រជាពលរដ្ឋខេត្តព្រះសីហនុ បានសំណូមពរដល់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន សូមមេត្តាពិនិត្យចំពោះការសម្រេចពីបញ្ហាដីបឹងព្រែកទប់នេះផង ព្រោះអ្នកដែលកំពុងរំលោភដីចំណីបឹងកំពុងតែសម្អាងទៅលើសេចក្តីសម្រេចរបស់លោកអ៊ឹម ឈុនលឹម ធ្វើជាលេស មិនខុសពីត្រីងៀតឆ្លៀតពងនោះទេ ហើយធ្វើឱ្យសង្ស័យថាអ្នកដែលកំពុងរំលោភយកដីចំណីបឹង គឺសុទ្ធតែក្រុមមន្ត្រី អាជ្ញាធរ និងអ្នកមានអំណាចមួយចំនួន ពុំមែនជាប្រជាពលរដ្ឋក្រីក្រឡើយ ។ បើតាមដឹង គ្រួសារដែលរំលោភដីអចលនទ្រព្យអង់តែនវិទ្យុជាតិ និងដី១៦ហិកតារបស់អតីតក្រុមហ៊ុនថៃប៊ុនរ៉ុងនៅជិតៗនោះ កំពុងចាត់ចែងដោយឃុបឃិតគ្នាចាប់តាំងពីក្រោមដល់លើក្នុងការរំលោភដីបឹងព្រែកទប់នេះ ។
ទាក់ទិនទៅនឹងបញ្ហានេះ ពុំមានស្ថាប័នណាមួយហ៊ានចេញមុខបកស្រាយឱ្យបានច្បាស់លាស់នោះទេ ដោយរុញឱ្យទៅសួរស្ថាប័ននេះ ឬស្ថាប័ននោះ ។ ថ្នាក់ភូមិឆ្លើយដាក់ថ្នាក់សង្កាត់ ថ្នាក់សង្កាត់ឆ្លើយដាក់ទៅលើសេចក្តីសម្រេចរបស់អន្តរក្រសួង ដែលមានស្ថាប័នពាក់ព័ន្ធចំនួន៣បូករួមទាំងសាលាខេត្តផង ៕
ចែករំលែកព័តមាននេះ